Intumwa ya Portugal yatangiye uruzinduko rw’iminsi 2 mu Rwanda 

  • NTAWITONDA JEAN CLAUDE
  • Gashyantare 12, 2024
  • Hashize amezi 3
Image

Minisitiri w’Ububanyi n’Amahanga wa Portugal João Gomes Cravinho, yatangiye uruzinduko rw’akazi rw’iminsi ibiri mu Rwanda.

Kuri uyu wa Mbere, yakiriwe na Minisitiri w’Ububanyi n’Amahanga n’Ubutwererane  Dr Vincent Biruta wamwakiriye kuri uyu munsi wa mbere w’uruzinduko. 

Ba Minisitiri b’Ububanyi n’Amahanga b’ibihugu byombi baganiriye ku nzego zitandukanye z’ubutwererane hagati y’u Rwanda na Portugal, banagaruka ku ngingo z’ibibazo byugarije Akarere n’Isi yose muri rusange. 

Baganiriye ku buryo umubano w’u Rwanda n’uwa Portugal ukomeje gutera imbere mu nzego zirimo ingufu, ishoramari n’ubucuruzi, umutekano n’ibyagisirikare.

Nanone kandi muri iyo gahunda baganiriye ku bibazo birimo ibya Repubulika ya Santarafurika aho u Rwanda rwagiye gutanga ubutabazi kimwe no mu Ntara ya Cabo Delgado muri Mozambique, hamwe n’uko umutekano uhagaze mu Karere k’Ibiyaga Bigari.

Uyu munsi biteganyijwe ko Minisitiri João Gomes Cravinho aragirana ibiganiro n’abandi bayobozi batandukanye ndetse aranasura imishinga inyuranye iterwa inkunga n’Umuryango w’Ubumwe b’u Burayi binyuze muri Gahunda ya Global Gateway hakaba harimo n’umusanzu w’ibigo byo muri Portugal.

Umubano w’u Rwanda na Portugal mu bya dipolomasi si uw’uyu munsi kuko itariki nk’iyi yo ku wa 12 Gashyantare 1976 ari bwo watangijwe ku mugargaaro.

Minisitiri João Gomes Cravinho ageze mu Rwanda akubutse muri Nigeria akazakomereza muri Ethiopia ku cyicaro Gikuru cy’Umuryango w’Afurika Yunze Ubumwe (AU).

Uyu muyobozi ni umwe mu banyacyubahiro bazitabira Inama Nshingwabikorwa y’Umuryango w’Afurika Yunze Ubumwe itegerejwe I Addis Ababa ku wa Gatatu no ku wa Kane, nyuma y’ubutumire Portugal yahawe n’abayobozi ba Comoros iyoboye uyu Muryango.

Azitabira ibiganiro bivuga ku miyoborere ishingiye ku ikoreshwa ry’inyanja ndetse n’ubukungu buzishingiyeho.

Biteganyijwe ko Minisitiri João Gomes Cravinho ari umwe mu bazageza ijambo ku Baminisitiri bazitabira iyo nama izabanziriza iy’Abakuru b’Ibihugu na Guverinoma bya AU.

Mu byo azibandaho ni ukurushaho kwimakaza umubano w’Afurika n’u Burayi by’umwihariko mu bijyanye no gukoresha amazi magari cyane cyane ko Uturere twombi dusangiye inyungu n’amahirwe menshi tubona mu mikoranire ya bugufi.  

Muri iyo naman ama kandi Minisitiri João Gomes Cravinho azahura n’abandi Maninisitiri b’Ububanyi n’Amahanga ndetse n’Umuyobozi mushya wa Komisiyo ya Loni ishinzwe Ubukungu muri Afurika (UN ECA) Amb. Claver Gatete, Komiseri ushinzwe Amahoro n’Umutekano na Komiseri wa AU ushinzwe Ubuhinzi, Iterambere ryo mu Cyaro, Ubukungu bushingiye ku Biyaga ndetse n’Ibidukikije.

Ayo azaba amahirwe yo kongera gushimangira ukwiyemeza kwa Portugal mu mikoranire ihamye na AU muri izo nzego ndetse no mu birebana no kwimakaza ururimi rw’Igiporutigali.

  • NTAWITONDA JEAN CLAUDE
  • Gashyantare 12, 2024
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE