Intare ebyiri mu za mbere zagaruwe muri Pariki y’Akagera zarapfuye

Ubuyobozi bwa Pariki y’Igihugu y’Akagera bwatangaje ko intare ebyiri, Ngagari na Ntwali, zapfuye mu mwaka ushize wa 2023 zishaje nyuma y’imyaka umunani zimaze zigejewe muri Pariki.

Ntwari yashaje ku myaka 13 na Ngangari yari ifite imyaka 12, zikaba zari muri ndwi zazanywe muri Pariki mu mwaka wa 2015.

Bivugwa ko intare ziri muri iyo Pariki zirimo gukabakaba 60, ikaba ari intambwe ikomeye cyane n’umusaruro wigaragaza w’imbaraga u Rwanda rwashyize mu gusigasira urusobe rw’ibinyabuzima.

Intare zongeye kugarurwa muri Pariki y’Igihugu y’Akagera nyuma y’imyaka isaga 15 yari ishize umuryango wazo uzimye muri icyo cyanya kirangwamo urusobe rw’ibinyabuzima bitandukanye.

Bivugwa ko intare zabaga muri iyo Pariki zagiye zicwa na ba rushimusi, bahoranaga amakimbirane na zo kubera kuzisagarira mu buturo bwazo.

Ni muri urwo rwego Leta y’u Rwanda yakajije ingamba mu bijyanye no kubungabunga urusobe rw’ibinyabuzima, ndetse no guhangana na ba rushimusi binyuze mu kwigisha abaturiye Pariki ku byiza byo kubungabunga urusobe rw’ibinyabuzima.

Nanone kandi hashyirwaho gahunda ziteza imbere abo baturage binyuze mu madovize yinjizwa n’iyo Pariki mu bukerarugendo.

Uretse Intare, ubuyobozi bwa Pariki y’Igihugu y’Akagera bwatangaje ko guhera mu mwaka wa 2010 inyamaswa zo muri iyo Pariki ziyongereye ku kigero cya 127%.

Mu myaka 13 ishize Pariki y’Igihugu y’Akagera yabarurwagamo inyamaswa z’inyamabere ziri munsi ya 5 000, ariko ubushakashatsi bwa vuba bwagaragaje ko iziheruka kubarurwa zibarirwa mu 11 338.