‘Intambara yo mu Burasirazuba bwa Congo yananiye Perezida Tshisekedi’

  • KAYITARE JEAN PAUL
  • Gashyantare 27, 2024
  • Hashize amezi 2
Image

Abasesenguzi bakurikiranira hafi Politiki n’intambara yo mu Burasirazuba bwa Repubulika Iharanira Demokarasi ya Congo, baravuga ko iyi ntambara yananiye Perezida Tshisekedi nyuma yo kugaragaza ukwivuguruza mu mbwirwaruhame akora.

Ibi kandi babishingira kuba intambara yo muri Congo ihuje Umutwe wa M23 n’ingabo za FARDC ifatanyije n’imitwe ikorana nayo irimo n’Umutwe wa FDLR, ikomeje gushyirwa ku Rwanda, ibyo narwo rukabihakana.

Ku mugoroba wo ku wa Kane w’icyumweru gishize Perezida wa Repubulika Iharanira Demokarasi ya Congo, Félix-Antoine Tshisekedi Tshilombo, yagiranye ikiganiro n’abanyamakuru cyatambutse kuri Televiziyo y’igihugu.

Mu kiganiro cyamaze amasaha abiri, ingingo nyamukuru yari u Rwanda. Yavuze ko u Rwanda rukijijwe n’amabuye y’agaciro ndetse n’ibiribwa rusahura igihugu ayoboye.

Icyo gihe yumvikanishije ko u Rwanda ari rwo ntandaro y’ibibazo RDC ihura na byo ndetse anikoma Umuryango w’Ubumwe bw’Ibihugu by’i Burayi (EU) uherutse gusinyana amasezerano n’u Rwanda.

Iki kiganiro cyabaye mu gihe mu nkengero z’Umujyi wa Goma ndetse no mu duce twa Sake imirwano irimbanyije hagati y’Ingabo za FARDC zifatanyije n’imitwe y’iterabwoba, abacanshuro n’Ingabo zoherejwe n’Umuryango w’Ubukugu w’Ibihugu by’Afurika y’Iburasirazuba n’Amajyepfo (SADC) n’inyeshyamba za M23.

Umusesenguzi mu bya Politiki  Hon. Evode Uwizeyimana, avuga ko buri gihe kuvuga ko ibibazo byawe bituruka ahandi biba ari ukongera ibibi no kwihunza inshingano.

Yavuze ko ibibazo bimwe biri muri Congo Perezida Tshisekedi yabihasanze kandi abisanga bisinziriye, none aho bigeze bikaba birenze ubushobozi bwe bwo kubikemura abihereye mu muzi.

Mu kiganiro ‘Waramutse Rwanda’ cyatambutse ejo ku wa Mbere tariki 26 Gashyantare 2024 kuri Televiziyo Rwanda, yagize ati: “Ibibazo byo muri Congo bikomoka ku gihe cy’Abakoloni, uko imipaka yagabanyijwe, kwemera ko abavuga Ikinyarwanda ku butaka bwa Congo ari abakongomani ubundi akabihakana…”

Avuga ko imyigaragambyo irimo kubera muri DRC iterwa ngo no kuba ibihugu byo mu Burengerazuba bw’Isi n’Amerika bitamagana u Rwanda.

Akomeza agira ati: “Wabonye ko bibasira inyubako za MONUSCO n’imodoka zabo harimo amabendera ya biriya bihugu, ni ukuvuga ko ibyo ngibyo ubwabyo, ni nko gukorwa n’isoni ntiyemere ko intambara yamunaniye kandi ari yo mahitamo yahisemo.”

Uwizeyimana asobanura ko hatsinda impamvu kuruta uko hatsinda intwaro umuntu afite.

Ati: “Nubwo intwaro na zo zigira icyo zimara ariko umwenegihugu urwanira uburenganzira bwe, we aba yiteguye gupfira ku butaka bwe, ku butaka arwanira aba yiyemeje gupfira icyo arwanira kuruta umucanshuro urwanira inyungu no ku kibuga atazi.”

Undi musesenguzi avuga ko gufata ingabo z’ibihugu bitandukanye, zifite imyumvire itandukanye zigahurizwa mu mitwe myinshi yitwaje intwaro rimwe na rimwe itaranatojwe neza kandi itazi iby’urugamba, ngo amabwiriza (Commandement) y’urugamba ntiyahura.

Munyakazi Sadate, agira ati: “Abo bantu bose impamvu bafite yo kuba bari ahongaho, bagiye guhurira mu mitwe irenga magana, ni impamvu zinyuranye zatuma urugamba batarutsinda.

Hari abafite impamvu z’ingengabitekerezo y’urwango, hari abaje gutabara igihugu batazi impamvu baje kugitabara kubera inyungu z’abayobozi b’ibihugu byabo, abo bose kubahuriza hamwe ukabaha amabwiriza ntabwo byashoboka habe na gato.”

Munyakazi asobanura ko urugamba ari impamvu bityo ko niyo wazana ingabo nyinshi, ibikoresho byinshi ariko impamvu zidahuye utatsinda urugamba.

  • KAYITARE JEAN PAUL
  • Gashyantare 27, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE