Inkunga ya mbere ku barokotse Jenoside kwari ukugira uburenganzira ku gihugu

  • KAYITARE JEAN PAUL
  • Werurwe 27, 2024
  • Hashize ibyumweru 4
Image

Dr. Gakwenzire Philbert, Perezida w’Umuryango uharanira Inyungu z’abarokotse Jenoside yakorewe Abatutsi, IBUKA, yasobanuye ko inkunga ikomeye abarokotse Jenoside babonye bwa mbere ari uguhabwa uburenganzira busesuye ku gihugu cyabo.

Ni ingingo yabigarutseho mu kiganiro yagiriye kuri Televiziyo Rwanda.

Inkunga yagenewe abacitse ku icumu rya Jenoside yakorewe Abatutsi, Umuryango IBUKA iwubona mu buryo bwa Politiki rusange y’igihugu.

Ati: “Politiki rusange y’igihugu itandukanye na Politiki Abatutsi babayemo mbere ya 1994, Politiki iha uburenganzira Umunyarwanda uwo ari we wese mu byo agenerwa n’igihugu cye.

Ni muri Urwego n’abari bamaze kurokoka nabo biyumvise nk’abanyagihugu mu gihe bari bamaze imyaka n’imyaka batitwa abanyagihugu ahubwo bikarenga ugasanga batotezwa, babuzwa n’icyo buri wese yakagombye kuba yabona”.

Yavuze ko ibyo byatumye abarokotse abenshi muri bo ahubwo barafashe n’inzira yo kuvuga ngo reka nabo babyaze umusaruro uburenganzira igihugu kibahaye.

Agira ati: “Iyo ni yo nkunga ya mbere abarokotse bari banyotewe kugira uburenganzira ku gihugu ku buryo buri wese n’icyo yatekerezaga yashoboraga kugishyira mu bikorwa, azi ko ntawe uje kumukoma imbere ngo amubuze uburenganzira bwe, iyo ni yo nkunga ya mbere ikomeye.”

Igisubizo cya mbere cya Politiki, ashimangira ko umuntu yakwanzura ko u Rwanda rwasaga nkurutariho kuko mu gihe hariho ubuyobozi butumva ko bugomba guha uburenganzira umuturage uwo ari we wese, ngo icyo gihe umuntu yakwibaza niba cyari igihugu mu by’ukuri.

Akomeza agira ati: “Icyo gihe abarokotse babonye igihugu kimwe nkuko n’abandi banyarwanda bahawe uburenganzira bwuzuye bitandukanye nuko igihe cyari kimeze mbere.”

IBUKA itangaza ko muri ibyo, hiyongeraho ko ubuyobozi bwatekereje ku buryo bw’umwihariko bukurikije aho Jenoside yasize abarokotse.

Ivuga ko Jenoside yasize kure abarokotse, yasize imitungo yabo yarashenywe, yasize abarokotse bafite ibibazo by’ihungabana, bafite ibibazo byo kuba barasigiwe ibikomere bikomeye cyane.

Umuryango IBUKA ugaragaza ko ibyo Leta yabibonye ikumva ko hagomba kwiyongera kuri bwa burenganzira bahabwa nk’abanyagihugu, bahabwa porogaramu yihariye igamije kubafasha.

Minisiteri y’Ubumwe bw’Abanyarwanda n’Inshingano Mboneragihugu, MINUBUMWE,  ivuga ko Leta y’u Rwanda yihutiye gushyiraho gahunda zigamije kwita ku barokotse Jenoside no kubafasha kongera guhobera Ubuzima.

Ni mu gihe mu myaka 30 ishize, izo gahunda zimaze gushyirwamo asaga miliyari 417 Frw.

Abarokotse Jenoside bashimwa ko bataheranwe n’agahinda ndetse bashoboye kwiyubaka ku buryo batanga umusanzu wabo mu kubaka igihugu binyuze mu nzego za Leta ndetse no mu bikorera.

  • KAYITARE JEAN PAUL
  • Werurwe 27, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE