Imyanya 79.5% gusa ni yo irimo abakozi mu Nzego z’ibanze -MINALOC

  • ZIGAMA THEONESTE
  • Gashyantare 6, 2024
  • Hashize amezi 3
Image

Minisiteri y’Ubutegetsi bw’Igihugu (MINALOC) yatangaje ko mu Nzego z’ibanze harimo ikibazo cyo gutanga serivisi uko bakwiye kubera ubuke bw’abakozi, aho imyanya 79.5% ari yo irimo abakozi, indi 20.5% ikaba ihora nta bakozi igira. 

Ku rwego rw’Akagari MINALOC ivuga ko harimo imyanya 84.9%  ifite abakozi mu gihe ku Mirenge 73,.5% ari yo irimo  abakozi.

Ni ibyatangajwe na Minisitiri w’Ubutegetsi bw’Igihugu MINALOC, Musabyimana  Jean Claude kuri uyu wa Kabiri tariki ya 6 Gashyantare 2024, ubwo yatangaga ibisobanuro mu magambo ku Nteko Ishinga Amategeko, Umutwe w’Abadepite, ku bibazo byagaragaye mu mitangire ya serivisi  itanoze ya bamwe mu bakozi b’Inzego z’ibanze, bigaragara muri raporo y’Urwego rw’Igihugu rw’Imiyoborere (RGB) y’umwaka wa 2021-2022.

Minisitiri Musabyimana yavuze ko ubuke bw’abakozi ku Kagari no ku Mirenge butuma gutanga serivisi bitagenda neza mu gihe abaturage baje babagana.

Ati: “Dufite imyanya igifite ikibazo cy’abakozi bitewe n’impamvu zinyuranye murabizi ugiye mu kazi ntabwo ajyamo kugira ngo asaziremo. Imyanya igera kuri 20.5% ihora itarimo abakozi (Vacant)[…], ibi bikaba bitera ikibazo cyo kujya kwaka servisi”.

Yongeyeho ati: “Tuzi kandi ko gushaka abakozi bikenera umwanya, iyo birimo gukorwa bishobora kudindiza serivisi, ari na yo mpamvu igipimo  cya serivisi ubona kitagera ku cyo twifuza”.

Hon. Depite Munyangeyo Théogène yavuze ko hakwiye no gukorwa ubushakashatsi hakarebwa uburyo abakozi bakongerwa mu Nzego z’ibanze, hashingiwe ku baturage batuye mu gice bakoreramo mu rwego rwo kunoza serivisi.

Ati: “Uturere twose uko tungana tunafite abaturage batangana ugasanga bafite abakozi bamwe hose, tuvuze nk’utu Turere tw’Umujyi wa Kigali, nka Gasabo ifite 58% y’igice cy’umujyi, ni yo ifite n’abaturage benshi, Nyarugenye na Kicukiro bafite 22%. Ariko ugasanga umubare w’abatanga Serivisi urangana kandi umubare w’abaturage batangana.

Yakomeje agira ati: “Ugasanga ushinzwe ubugenzuzi bw’amashuri hari aho afite amashuri atanu, undi afite amashuri 34 aho ndagira ngo ahari tuzarebe, aho kugira ngo tujye dukora igisa no gukoporora mu gihugu hose ahubwo tujyanishanya.”

Minisitiri w’Ubutegetsi bw’Igihugu Musabyimana Jean Claude, yavuze ko harimo gukorwa isuzuma ngo imiterere yo gushyira abakozi mu myanya mu Nzego z’ibanze bajyanishwe n’imitangire ya servisi zikenewe yaba mu mijyi ndetse no mu cyaro hanashingiwe ku mibare y’abaturage.

Kugeza ubu Minisiteri y’Ubutegetsi bw’Igihugu ivuga ko hatangwa serivisi ku Kagari zibarirwa mu ngeri 22, habarurwa abaturage baba bazikeneye nibura bari hagati y’ibihumbi 7 n’ibihumbi 9 ni ukuvuga ingo ziri hagati ya 900 na 1000.

  • ZIGAMA THEONESTE
  • Gashyantare 6, 2024
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE