Impirimbanyi y’uburenganzira bw’abagore! Ibyaranze Intwari Uwiringiyimana Agathe 

  • ZIGAMA THEONESTE
  • Gashyantare 1, 2024
  • Hashize amezi 4
Image

Uwiringiyimana Agatha kugeza ubu ni we mugore wenyine wabaye Minisitiri w’Intebe w’u Rwanda. Yabaye Minisitiri w’Intebe w’u Rwanda kuva tariki ya 17  Nyakanga 1993 kugeza yishwe muri Mata 1994.

Ni we warwanyije byeruye umugambi wa   Leta yariho muri ibyo bihe yateguraga Jenoside yakorewe Abatutsi mu 1994.

Amateka ya yamuranze ahamya ko ari umugore wakoraga ibikorwa byiza kandi akaba yaratanze umusanzu we ku gihugu mu ngeri zitandukanye. 

Mu kiganiro The New Times yagiranye n’umukobwa we Umuhoza Lussi Marie Christine, yahishuye byinshi byaranze ubuzima bw’umubyeyi we birenze ibyo kuba umunyapolitiki.

Umuhoza asobanura ko nyina umubyara yari umugore ukunda abantu kandi akagira ubuntu kuko yitaga by’umwihariko ku badafite amafunguro akabaha, barimo abaturanyi be inshuti ndetse n’abo mu muryango we by’umwihariko; yabikoraga muri wikendi igihe atagiye mu kazi.

Nyakwigendera Uwiringiyimana umutima we wa kimuntu warengaga kuba muri Politiki no kuba Minisitiri w’Intebe, akaba umuntu waharaniraga ko abagore batera imbere (Feminist), aho yakundaga kwamagana ubusumbane bw’abagore n’abagabo bwariho mu Rwanda.

Umukobwa we Umuhoza, kuri ubu uba mu gihugu cy’u Busuwisi, atangaza ko nyina yahoraga aharanira ko uburenganzira bw’abagore bwakubahirizwa.

Yagize ati: “Umunsi umwe, hari abanyeshuri bahatiwe gusibira kubera irondamoko ryabaga mu mashuri muri biriya bihe. Maze umwe mu banyeshuri twiganaga amwandikira ibaruwa, ayinyuzaho, ansaba ko nyishyira mama, muri icyo gihe yari Minisitiri w’Uburezi.”

Yakomeje agira ati: “Ubwo yamaraga gusoma iyo baruwa, yaranyitegereje mu maso, maze amabaza uko uyu mwana twiganaga atsinda mu ishuri. Mubwira ko ari umuhanga kandi atsinda neza, ndetse ari na we uhora uza mu myanya y’imbere mu ishuri ryacu. Nyuma yo gutekereza iminota mike, mama yambajije ikindi kibazo, ati: “Uzi ko wimuwe kubera gusa ko uri umukobwa wanjye? Mu gihe abandi basibijwe kubera ubwoko bakomokamo?”

Uwiringiyimana Agathe mu gihe yari Minisitiri w’Uburezi mu Rwanda mu 1992, yakunze kurangwa no kwamagana ibikorwa by’ivanguramoko mu mashuri byiswe iringaniza byibasiraga cyane abanyeshuri bo  mu bwoko bw’Abatutsi mu gihugu hose, nubwo atari yorohewe n’abamuteraga ubwoba  no kumurwanya.

Mu gihe cye, Uwiringiyimana yatumye abaturage batangira gutekereza ku burenganzira bw’ababo by’umwihariko abagore, aho abagore 3000 bakoraniye mu Mujyi wa Kigali bakora imigaragambyo yamagana ikandamizwa bakorerwa.

Umuhoza yagize ati: “Ubutwari bwe bwabaye intangarugero ku bagore hirya no hino mu Rwanda, bubaha imbaraga zo kurwanya igitugu no kubaho nk’Intwari mu mibereho yabo.”

Yibuka nyina nk’umubyeyi utajenjetse kandi ufite amahame, washyigikiraga guharanira ubwigenge no kurwanya ivangura.

Umuhoza ahamya ko ibikorwa byaranze umubyeyi we ari byo byamwigishije kugira ingandagaciro zo kuba na we umubyeyi  mwiza.

Umuhoza, umukobwa wa Uwiringiyimana Agathe

Kuri benshi bamenye Uwingiyimana, bahamya ko yari umugore w’umunyembaraga kandi uzi kuvuga neza mu ruhame akamenya no gutanga ubutumwa bwumvikana ku bo bugenewe.

Bahamya ko ubumenyi bwe butakomotse mu kuba yari umunyapolitiki gusa ahubwo ko yari n’umuntu ufite uburere n’ubumenyi karemano buhambaye.

Mu myigire ye yari umuhanga cyane akaba yarabaye n’umwarimu mbere yo kwinjira mu bikorwa bya Politiki.

Uwiringiyimana yize amashuri yisumbuye muri Lycée Notre Dame de Citeaux, i Kigali, aho yakuye impamyabumenyi mu mibare n’ubutabire.

Yize kandi mu yahoze ari Kaminuza Nkuru y’u Rwanda, aho yabonye impamyabumbyi mu by’ubutabire hanyuma ajya kuba mwarimu ku Kibuye ubu ni mu  Ntara y’Iburengerazuba bw’u Rwanda.

Mu mwaka 1975, Uwiringiyimana yashyingiranwe na Birahira Ignace babyarana abana batanu barimo abahungu bane n’umukobwa umwe.

Mu buryo bubabaje, Uwiringiyimana Agathe n’umugabo we bishwe babanje gukorerwa iyicarubozo mu gihe cya Jenoside yakorewe Abatutsi mu 1994, ubu hasigaye abana babo batatu.

Ni ubwicanyi bakorewe mu ijoro ryo ku itariki ya 6 rishyira iya 7 Mata 1994, bwakurikiye ihanurwa ry’indege y’uwari Perezida w’u Rwanda,  Habyarimana Juvénal.

Icyo gihe Uwiringiyimana n’abandi bayobozi bakuru batavugaga rumwe n’ubutegetsi bwariho bahise batangira kwicwa, inkuru mbi itazibagirana mu mateka y’u Rwanda.

Umukobwa wa Uwiringiyimana Agathe, Umuhoza, ubu ni umubyeyi w’abana 2, ababyeyi  be bishwe afite imyaka 15 y’amavuko.

  • ZIGAMA THEONESTE
  • Gashyantare 1, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE