Impamvu zatumye Abanyarwanda bitwara nabi muri Tour du Rwanda 2024

  • SHEMA IVAN
  • Gashyantare 26, 2024
  • Hashize amezi 2
Image

Isiganwa mpuzamahanga ry’amagare rizenguruka igihugu “Tour du Rwanda” ryari rimaze iminsi umunani ribera mu gihugu kugeza tariki ya 25 Gashyantare 2024, ryasojwe nta Munyarwanda uri mu bakinnyi 10 ba mbere ku rutonde rusange ku nshuro ya kabiri yikurikiranya.

Kuva Tour du Rwanda igiye ku rwego rwa 2,1 mu 2019, hamaze gukinwa uduce twayo 48 Umunyarwanda Mugisha Moïse, ni we umaze kwegukana agace kamwe muri utwo twose tumaze gukinwa.

Iyo uganira na bamwe bafite aho bahuriye no guteza imbere uyu mukino baba abayobozi ba FERWACY cyangwa abatoza n’abatekinisiye, abenshi bavuga ko “Impamvu isiganwa rikomereye Abanyarwanda ari uko ryajemo amakipe akomeye n’abakinnyi bakomeye kandi babigize umwuga”. Ese ni yo mpamvu yonyine mu by’ukuri?

Ni byo ko na Tour du Rwanda ya 2,2 yegukanywe bwa mbere n’Umunyarwanda Ndayisenga Valens mu 2014 nyuma y’imyaka itanu ibaye mpuzamahanga, ariko se no kuri 2,1 bizasaba gutegereza iyo myaka cyangwa noneho iziyongera kuko iri kuri 2,1?

Imvaho Nshya yagerageje gucukumbura, ishaka impamvu zitandukanye zihishe inyuma y’umusaruro nkene Abanyarwanda bakomeje kugira muri Tour du Rwanda ya 2,1 ndetse yasanze nta gikozwe bigoye kubona impinduka cyangwa umusaruro uhoraho.

1. Imyiteguro mibi ku makipe yahagarariye u Rwanda 

Bamwe mu bakinnyi bitabiriye Tour du Rwanda bagaragaza ko imyiteguro idahagije ari imwe mu mpamvu yatumye batagera ku musaruro Abanyarwanda bari babitezeho urugero ni Munyaneza Didier “Mbappe” wavuze ko imyiteguro ku ruhande rwabo itagenze neza kubera ko nta marushanwa bakinnye mbere yo kuyitabira.  

Yagize ati: “Ibyo twatanze bihura n’imyiteguro tuba twarakoze, Tour du Rwanda ni irushanwa rikomeye ridusaba kwitabira amarushanwa meshi kurusha uko twajya mu mwiherero igihe kirekire, iyo uri mu marushwa uhura n’abakinnyi batandukanye ukabakuraho ubumenyi. Turasaba ko twabona amarushwa meshi tuzajya twitabira mbere yo gukina Tour du Rwanda ndetse na nyuma yayo ndatekereza ko ubuyobozi bushya bwa FERWACY hari icyo buri kubitekerezaho hari ibizahinduka bafanyije n’umutoza w’ikipe y’Igihugu kubijyanye n’imyiteguro.”

2. Isiganwa ryitabiriwe n’amakipe akomeye  

Tour du Rwanda ya 2024 yarimo abakinyi bakomeye n’amakipe abarizwa mu cyiciro cya kabiri cy’ayabigize umwuga ndetse asanzwe akomeye nka Israel-Premier Tech yitabiriye bwa gatandatu, TotalEnergies yitabiriye bwa gatanu, Team Polti Kometa izitabira bwa mbere nk’uko bimeze kuri Bingoal WB.

Amakipe mashya yarimo Polti Kometa, Bingoal WB, Astana Qazaqstan Dev Team, Lotto Dstny Dev Team, Groupama0FDJ, Ibirwa bya Maurice, UCI CMC, Java-Inovotec na UAE Team Emirates Gen Z.

Mu makipe azitabira hahawe umwanya atanu y’ibihugu by’Afurika [yiyongeraho Team Rwanda] mu rwego rwo kuzamura uyu mukino kuri uyu mugabane mu gihe u Rwanda rwitegura kwakira Shampiyona y’Isi ya 2025.

Mu makipe yagiriwe icyizere uyu mwaka harimo ay’abato akomeye i Burayi ku buryo n’abakinnyi b’Abanyarwanda bashobora kubigiraho.

Munyaneza Didier “Mbappe” witabiriye Tour du Rwanda yavuze ko hari byinshi bigiye ku bakinnyi bakomeye ku buryo bizabafasha kwitwara neza mu munsi iri mbere.

Yagize ati: “Abakinnyi twahanganye bafite amazina akomenye urugero nka Chris Froome, kuri twe byaradufashije cyane, hari ubumenyi twabakuyeho.”

Yakomeje asaba Minisiteri ya siporo na FERWACY kubashakira amarushanwa akomeye.

Ati: “Turasaba Minisiteri ya Siporo na FERWACY kutuba hafi bakadufasha tukabona amarushanwa akomeye hanze nakongera ireme ry’amarushanwa imbere mu gihugu kugira ngo bizadufashe kwitwara neza muri Tour du Rwanda 2025.”

Tour du Rwanda 2024 yegukanywe numwongereza Peter Joseph Blackmore w’imyaka 21 ukinira Israel Premier-Tech akoresheje amasaha 17, iminota 18 n’amasegonda 46.

Umunyarwanda wasoreje hafi ni Manizabayo Eric (Rwanda) wa 15, arushwa iminota itanu n’amasegonda 13, Masengesho aba uwa 18 naho Mugisha Moise aba uwa 20.

Tour du Rwanda yatangiye gukinwa mu 1988, yabaye mpuzamahanga kuva mu 2009 aho yashyizwe ku cyiciro cya 2.2 kugeza mu 2018.

  • SHEMA IVAN
  • Gashyantare 26, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE