Imibereho ya Yankurije wujukuruje uri mu bakora irondo ry’umwuga

  • KAYITARE JEAN PAUL
  • Werurwe 25, 2024
  • Hashize ibyumweru 4
Image

Yankurije Rose ni umubyeyi w’imyaka 46 afite umwana umwe n’umwuzukuru bombi babana mu nzu imwe. Akazi ke ka buri munsi, akora irondo ry’umwuga mu Murenge wa Kicukiro mu Karere ka Kicukiro mu Mujyi wa Kigali.

Ni akazi kamutunze n’umuryango we kuko abasha kwiyishyurira inzu akanishyura mituweli.   

Amaze kuba imfubyi yahisemo kujya mu Mujyi wa Kigali, mbere ya Jenoside yakorewe Abatutsi, aje gushakisha ubuzima bwisumbuye ku bwo yari abayemo aho avuka mu Karere ka Karongi mu Ntara y’Iburengerazuba.

Yankurije akora akazi k’uburinzi ku biro by’Akagari ka Ngoma akanayobora abagana aka Kagari, aho basabira serivisi.

Yabwiye Imvaho Nshya ko kubera akazi akora ko gucunga umutekano byatumye kunywa agasembuye abihagarika, ibyo kandi bikajyana n’imyaka agezemo.

Yabanje gukora akazi ko gucunga umutekano nijoro ku muhanda (Patrol), nyuma yoherezwa gukorera ku biro by’Akagari. Ni umwuga yagiyemo yabanje gutekerezaho.

Ati: “Nabitekerejeho ndavuga nti ariko akazi k’umutekano ndagakunda, kubera ko narimfite umutware wanjye wagakoraga, nanjye njya kugasaba ngamije gutera ikirenge mu cye no gushaka icyatunga umuryango.”

Umugabo we yamurwaje igihe kinini agashima ubuyobozi bw’Umurenge wa Kicukiro bwamufashije uko bishoboka.

Umurenge wamugeneraga imodoka ikamugeza kwa muganga no mu kumushyingura uramufasha bamuherekeza neza.

Ahamya ko yafashe umwanzuro wo gukora irondo ry’umwuga nyuma y’aho umugabo we yitabiye Imana.

Yabwiye Abayobozi ko ashaka gufatanya na basaza be gucunga umutekano agamije gushaka uko yakwibeshaho  n’umuryango we.

Uwitwa Jean Marie yaramwemereye aragenda akora akazi k’umutekano.

Avuga ko akazi akora kabamo ibizazane kandi kugakora bisaba kwitonda.

Ati: “Nshobora guhura n’umujura akantera icyuma, nshobora kumwirukaho nkagwa hasi nkavunika, hari igihe ufata umuntu ucuruza ibiyobyabwenge wamwirukankana ukaba wagwa cyangwa akagutera icyuma.

Kubera umutekano nabonye biturutse kuri basaza banjye b’Inkotanyi babohoye igihugu nanjye ngomba kubigiramo uruhare”.

Kera yajyaga yumva bavuga ngo nta mugore waba umusirikare agende ijoro acunga umutekano, ngo abe umupolisi ariko yishimira yabibonye.

Ati: “Ku bwanjye umutekano wangejeje kuri byinshi kuko mbasha kwiyishyurira inzu, nkishyura mituweli kandi nkabaho”.

Avuga ko kera atari azi ko yakwambara umwambaro w’abantu bacunga umutekano.

Ntiyiyumvishaga ko yararana n’abahungu ari umugore bacunga umutekano.

Asaba abagore kwitinyuka ntibasuzugure akazi ako ari ko kose kuko barashoboye kandi ubuyobozi bw’igihugu bwabahaye umwanya wo kugaragaza icyo bashoboye.

Ikimushimisha iyo ari mu kazi, ni uko abasore bakorana bamufata nka mushiki wabo.

Ati: “Bituma nitinyuka nkumva ko ndi kumwe na basaza banjye. Ikingora mu kazi ni uko agahimbaza musyi katakiboneka bigatuma hari ibyo ntashobora kugeraho”.

Amateka agaragaza ko mbere ya Jenoside yakorewe Abatutsi, hari imirimo abagore bakumirwagaho ntibahabwe agaciro mu muryango.

Kugeza ubu bashima Perezida wa Repubulika Paul Kagame wabasubije agaciro bakirahira ko batazagatesha uwakabasubije.

Foto: Uwamaliya Cécile

  • KAYITARE JEAN PAUL
  • Werurwe 25, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE