Imbamutima z’abavuye mu Bubiligi bagasura u Rwanda nka gakondo yabo

  • Imvaho Nshya
  • Werurwe 3, 2024
  • Hashize ukwezi 1
Image

“Turanezerewe kuba turi mu Rwanda kuko dukunda igihugu cyacu.”  Ayo ni amagambo y’abana baje mu Rwanda kwiga ikinyarwanda no kwifatanya n’u Rwanda kwizihiza Umunsi Mpuzamahanga w’ururimi kavukire.

Ku bufatanye na Minisiteri y’Ububanyi n’Amahanga (MINAFFET) n’Inteko Nyarwanda y’Umuco, abo bana bavukiye mu mahanga bigishijwe umuco n’amateka by’u Rwanda, ndetse batemberezwa mu bice bitandukanye ari na ko bagenda barushaho kwiga ururimi rw’Ikinyarwanda.

Abo bana basanzwe bafite imiryango yabo mu Rwanda kuko si ubwa mbere bahaje ariko ni ubwa mbere batemberejwe ahantu nyaburanga, bagasobanurirwa amateka y’aho u Rwanda rwakomotse n’uko rwaje kwaguka bakaba barubona uko ruri uyu munsi.

Abo bana mu myaka mikeya bafite bagaragaje umunezero udasanzwe batewe no kuzana n’abavandimwe mu gihugu cya gakondo yabo bagaragiwe n’ababyeyi babo.

Benny Nshuti ufite imyaka 12 y’amavuko, yagize ati: “Nazanye n’abavandimwe banjye hamwe na mama, ndanezerewe kuba ndi mu Rwanda kuko nkunda  igihugu cyanjye. Uyu munsi twagiye ahantu u Rwanda twatangiriye, twize ukuntu habagaho abami benshi, ku Ngoro Ndangamateka y’Urugamba rwo guhagarika Jenoside twize ukuntu Jenoside yakorewe Abatutsi yatangiye, badusobanuriye amateka batubwira ko FPR ari yo yabohoye igihugu. Batweretse amafoto birababaje ariko nubwo byafashe igihe kinini byararangiye.”

Abo bana n’ababyeyi babo banasuye i Ntunga mu Karere ka Gasabo aho beretswe, ku munyinya w’i Rwanda aho bavunyishirizaga mbere yo kujya i bwami.

Bakomeje berekeza ku “giti cy’umuhigo” cyangwa “umusumba” aho baruhukiraga bavuye ku rugamba, banitoza uko bari buvuge amacumu, iyo babaga bamaze kuruhuka berekeza ibwami gutarama.  

Mukashyaka Marie Claire, umwe mu babyeyi bazanye n’abana  babo muri uru rugendoshuri, yavuze ko uretse abana n’ababyeyi banezerewe cyane ariko akababazwa n’uko bari bafite iminsi mike ugereranyije n’ubukungu bw’umuco n’amateka bw’u Rwanda abo bana bakeneye kumenya.

Yagize ati: “Ntabwo mu minsi mike dufite twamara amatsiko yabo, kuko buri umwe wese afite ibibazo byo kubaza ariko ikibazo ni igihe kuko kitubanye gito. Tubyuka mugitondo kare tukongera kuruhuka nyuma ya saa kumi n’imwe kugira ngo turebe ko twakwiga byinshi mu gihe gito gusa turabibona ko bitashira kuko bitahura n’igihe dufite.”

Abajijwe niba babona umwanya uhagije wo gusobanurira abana babo amateka y’igihugu cya gakondo yabo, yavuze ko bagerageza kubasobanurira ibijyanye n’imyaka bafite.

Ati: “Umwana mukuru yiga mu mashuri y’isumbuye ariko usanga ambaza ibibazo byinshi kubera amatsiko, ugasanga n’iyo ahuye n’abandi bana batangira kuvuga amateka ugasanga amenye amateka yo mu Rwanda no muri Afurika. Usanga bafite ibibazo bikomeye kandi bashaka kumenya vuba, bisaba rero kubasobanurira neza ntacyo ubakinze kuko ibyo utababwiye bashobora kubibwirwa n’abandi kandi bakaba babibabwira uko bitari.”

Yakomeje avuga ko abana babo batahanye amatsiko menshi akaba ateganya ko ayo matsiko azabakanguramo ubushake buruseho bwo kumenya u Rwanda.

Abana bababaza impamvu bataba mu Rwanda

Mukashyaka akomeza yemeza ko abana babo bajya bababaza ikibazo kitoroshye cy’impamvu bataba mu Rwanda, kikababera ihurizo kugisobanura.

Ati: “Inshuro zose tumaze kuhaza bahora babaza icyo kibazo kubera iki tutaba mu Rwanda cyangwa hakaba  igihe tuganira ibyiza byo mu Rwanda bagahita bibaza impamvu tutahaba. Ariko icyo kibazo ntiwahita ugisobanurira umwana impamvu utahaba ngo abyumve, impamvu ni nyinshi zituma ataba mu gihugu kandi agikunze cyane.”

Yagaragaje ko zimwe mu mpamvu bigoye gusobanurira abana ari uko ari ho ubuzima buberekeza, ari ho akazi kaba ndetse n’abana bakaba bahafite amashuri, cyangwa se ari n’impamvu zishingiye ku mateka byagorana ko umwana ukiri muto cyane yabyumva.

Avuga ko intumbero bafite ari iyo gukomeza gukundisha abana igihugu cyabo byaba ngombwa bakazakura bashaka kuza kugituramo cyane ko ari zo nzozi z’ababyeyi benshi bashakira umugati mu mahanga, kuzagirira amasaziro yabo meza mu Rwanda.

Abo Banyarwanda baba mu mahanga bemeza ko nta hantu heza hashobora kubaho haruta iwanyu kandi ngo babisobanukirwa kenshi iyo bageze mu mahanga.

Barashimira Leta y’u Rwanda n’abafatanyije bose mu gutegura iki gikorwa, bagasaba ko cyajya kibaho nibura buri mwaka kugira ngo buri gihe abakeneye kuza kwigira ku mateka y’u Rwanda bajye babikora.

Umunyamabanga wa Leta ushinzwe Ubutwererane bw’Akarere muri Minisiteri y’Ububanyi n’Amahanga Gen (Rtd) Kabarebe James, ku wa Gatandatu, yifatanyije n’Abanyarwanda baba mu mahanga mu birori byo kwizihiza Umunsi Mpuzamahanga w’Ururimi Kavukire ku nshuro ya 21.

Mu ijambo yabagejejeho, yagize ati: “Ni byiza ko abantu baba mu mahanga mushishikariza abana bacu kwiga ururimi n’umuco, mukabazana no mu Gihugu. Gufata umwanya mu biruhuko mukabazana nk’uku, hakaba isano y’icyo bari cyo nk’Abanyarwanda n’igihugu cyabo, bakagisura, bakagikunda ni na ko n’ururimi bazarushaka kugira ngo barumenye.”

Yashishikarije ababyeyi kongera imbaraga mu kwigisha abana babo Ikinyarwanda iyo bari mu mahanga kandi bagahora babazana gusura igihugu cyababyaye.

Uwamaliya Cecile

  • Imvaho Nshya
  • Werurwe 3, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE