Igitaramo gisingiza Intwari z’u Rwanda: Urubyiruko rwibukijwe ko ubutwari ari umuco (Amafoto)

  • KAYITARE JEAN PAUL
  • Gashyantare 1, 2024
  • Hashize ibyumweru 3
Image

Minisiteri y’Ubumwe bw’Abanyarwanda n’Inshingano mboneragihugu (MINUBUMWE) yashimiye urubyiruko rwitabiriye Igitaramo gisingiza Intwari z’u Rwanda mu mugoroba ubanziriza umunsi w’Intwari wizihizwa tariki ya 01 Gashyantare buri mwaka.

Mbere y’igitaramo urubyiruko rwasuye Urwibutso rwa Jenoside yakorewe Abatutsi rwa Kigali ku Gisozi n’Ingoro y’Amateka y’Urugamba rwo guhagarika Jenoside.

Ni igitaramo cyahuriranye no gusoza ukwezi kwahariwe ibikorwa by’ubutwari.

Igitaramo gisingiza Intwari z’u Rwanda cyabereye muri Camps Kigali cyitabiriwe na Minisitiri Dr Bizimana Jean Damascène, Umuyobozi Mukuru w’Urwego rushinzwe Intwari z’igihugu, imidali n’impeta by’ishimwe, Ngarambe François, Meya w’Umujyi wa Kigali Dusengiyumva Samuel.  

Col (Rtd) Jeannot Ruhunga, Umunyamabanga Mukuru w’Urwego rw’Ubugenzacyaha, Nirere Madeleine, Umuvunyi Mukuru, Abagize Inteko Ishinga Amategeko Umutwe w’Abadepite, Ingabo, Polisi n’Urwego rushinzwe igorora (RCS) ndetse n’urubyiruko rwaturutse hirya no hino mu Mujyi wa Kigali bitabiriye igitaramo.

Umuhanzi Eric Senderi, Alyn Sano, Army Jazzy Band, Itorero ry’Igihugu, Urukerereza, basusurukije abitabiriye igitaramo gisingiza intwari z’u Rwanda.

Minisitiri Dr Bizimana yashimiye urubyiruko rwitabiriye ku bwinshi, arwibutsa ko ubutwari ari umuco waranze Abanyarwanda bo ha mbere.

Yavuze ko urubyiruko narwo rukwiye kurangwa n’uwo muco kugira ngo u Rwanda rukomeze rutengamare.

Dr Bizimana yagaragaje ko ubutwari bukwiye kugaragarira mu bikorwa byabo bya buri munsi. Yabasabye kurinda no kubungabunga ibyagezweho kugira ngo intambwe u Rwanda rwateye idasubira inyuma.

Umuhanzi Eric Senderi yashimishije urubyiruko ndetse n’abandi bitabiriye igitaramo gisingiza Intwari z’Igihugu.

Alyn Sano yasabye urubyiruko rugenzi rwe gukoresha intwaro rufite nkuko na we akoresha iy’ubuhanzi kugira ngo bakomeze basigasire ibyagezweho.

Itorero Indatirwabahizi ry’Umujyi wa Kigali ryataramiye abitabiriye igitaramo gisingiza Intwari z’u Rwanda, mu mivugo n’ibisingizo bivuga imyato ababohoye u Rwanda.

Abitabiriye igitaramo gisingiza Intwari z’u Rwanda biganjemo urubyiruko n’abayobozi mu nzego zitandukanye bishimiye indirimbo zigaruka ku butwari bwaranze ingabo zari iza RPA zabohoye u Rwanda.

Minisitiri wa MINUBUMWE Dr Bizimana Jean Damascene
Urubyiruko rwanyuzwe n’Igitaramo gisingiza Intwari z’u Rwanda
Army Jazzy Band yasusurukije abitabiriye Igitaramo Gisingiza Intwari
Urubyiruko rwabyinnye karahava
Abayobozi mu nzego zitandukanye bafatanyije n’Umuhanzi Eric Senderi barabyina mu gusingiza Intwari z’u Rwanda
Umuhanzi Alyn Sano yasabye urubyiruko gukomera ku byagezweho
  • KAYITARE JEAN PAUL
  • Gashyantare 1, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE