Icyizere n’ubushobozi by’umugore mu mboni za bamwe mu Banyarwandakazi

  • NYIRANEZA JUDITH
  • Werurwe 8, 2024
  • Hashize ukwezi 1
Image

Abanyarwandakazi bari mu nzego zitandukanye, bagaragaje uko babona ndetse bashima kuba umugore yarahawe agaciro nk’abagabo, akaba agira uruhare mu iterambere.Ni ubutumwa batanze uyu munsi ku ya 8 Werurwe hizihizwa Umunsi Mpuzamahanga w’Umugore.

Minisitiri w’Uburinganire n’Iterambere ry’Umuryango Dr Uwamariya Valentine yavuze ko umukobwa afite uburenganzira kimwe n’umuhungu Kandi ntawuhejwe mu miyoborere.

Ati: “Umugore yahawe agaciro n’amahirwe bingana n’iby’umugabo, umwana w’umukobwa agira uburenganzira nk’ubwa musaza we mu burezi. Ibi byagize uruhare rukomeye mu miyoborere y’u Rwanda.”

Col Stella Uwineza wo mu ngabo zirwanira mu kirere ati ‘Nanjye ndi koloneli w’umugore, ufite inshingano z’akazi n’iz’urugo. Ndubatse, umugabo wanjye nta bwo ari umusirikare. Ni inshingano zitoroshye ariko ndazuzuza.”

Asaba abakobwa kwinjira mu gisirikare cy’u Rwanda ati ‘Ingufu murazifite, igisigaye ni ubushake.’ Anasaba ababyeyi gushyigikira abana bose, abakobwa n’abahungu, babaremamo icyizere, kuko kibafasha kugera ku nzozi zabo. Ntibakwiye kubaca intege kuko uwo yaba ari we wese, yagera kuri byinshi.

Bamwe mu bakora mu Nzego z’ibanze na bo bavuga ko kwigirira no kugirirwa icyizere ari ingenzi.

Guverineri w’Intara y’Amajyepfo Kayitesi Alice Yagizeati: “Gukora mu Nzego z’Ibanze bisaba kwitanga, ariko iyo ukora neza ubona impinduka nziza mu mibereho y’abaturage. Ni amahirwe akomeye kugirirwa icyizere n’abaturage ndetse n’Ubuyobozi bw’Igihugu.”

Yongeyeho kandi ko kwesa imihigo umuntu ari umugore bishoboka ndetse cyane.”

Umunyamabanga Nshingwabikorwa w’Akagari ka Mahambara mu Karere ka Nyaruguru Muhimpundu Immaculee umaze imyaka 20 we yagize ati: “Nishimira ko n’umugore wo mu cyaro yamaze kwisobanukirwa kandi agatinyuka.”

Byashimangiwe na Dusabimana Marina Umukuru w’Umudugudu wa Ruyaga mu Karere ka Gicumbi ko umugore ashoboye.Ati: “Umugore wo mu Nzego z’Ibanze ayoborana icyizere yifitemo kuko arashoboye. Afata ibyemezo nk’iby’abagabo bayobora kandi ntibisubizwa inyuma.”

Abagore mu nzego zitandukanye bakomeza bagaragaza ibyiza byo kuba barahawe agaciro kuko byatumye bigirira icyizere.

Uwingabire Roge ukorera mu Karere ka Gasano yagize ati: “Kuba mu rwego rwa DASSO byampaye kwigirira icyizere, gutinyuka, kuzigama mu buryo bw’amafaranga, gushishoza, gukora cyane, kwaguka mu mitekerereze, gutanga ibitekerezo no gufata ibyemezo.”

Bamwe mu bari mu Ihuriro ry’Urubyiruko rukora ubuhinzi bashima urwego abagore bagezeho mu kuba ba rwiyemezamirimo cyane cyane mu bijyanye n’ubuhinzi.

Abagore bakorera ku cyicaro cy’Akarere ka Rubavu bagize bati: “Ndi Mutima w’urugo, Ndi Nyampinga, Ndi Umugore ubereye u Rwanda. Sinzatesha agaciro, uwakampaye.”

Barashima cyane Imiyoborere myiza, aho igejeje u Rwanda, biyemeza gukomeza kuyishyigikira mu kazi ka buri munsi.

  • NYIRANEZA JUDITH
  • Werurwe 8, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE