Icyateye Col. Muragijimana kwinjira mu Ngabo z’u Rwanda

  • ZIGAMA THEONESTE
  • Gashyantare 2, 2024
  • Hashize ukwezi 1
Image

Col. Muragijimana Marie Claire ni umwe mu basirikare barindwi b’igitsina gore b’u Rwanda, bafite ipeti rya Coloneri, yatangaje ko kwinjira mu gisirikare yabitewe n’uko ingabo zari iza RPA zabohoye u Rwanda, na we yiyemeza gufatanya na zo kubaka igihugu.

Iyo ngabo y’u Rwanda, Col. Muragijimana ni umwe mu basirikare baherutse kuzamurwa mu ntera na Perezida wa Repubulika akaba n’umugaba mukuru w’Ikirenga w’Ingabo z’u Rwanda Paul Kagame, abaha ipeti rya Coloneri.

Mu kiganiro kirambuye yagiranye na RBA, Col. Muragijimana yagaragaje ko mu gihe yari amaze kubona ko ingabo za RPA zitanze zikabohora u Rwanda n’Abanyarwanda na we yahisemo kuba ingabo y’Igihugu, kugira ngo afatanye n’abandi gukomeza kucyubaka.

Yagize ati: “Ni amahitamo y’umuntu kuba umusirikare, nagiye mbitekereza, mu gihe namaze gusobanukirwa nkabona ibyo u Rwanda rwavuyemo, rwari rwasenyutse mu 1994. RDF icyo gihe yari RPA ikarubohora, numva ntekereje kuba umwe muri abo bantu bakomeje gutanga umusanzu mu kubaka Igihugu cyacu.”

Col Muragijima avuga yambara umwambaro w’igisirikare cy’u Rwanda (RDF) bwa mbere byamuteye ishema rikomeye, kubera ko hariho ibirango by’Igihugu cye.

Avuga ko kuva yajya mu gisirikare atigeze acika intege, cyane ko no muri uyu mwuga w’igisirikare babatoza kugira umuhate, ubushake no gukunda Igihugu cyabo.

Col. Muragijimana wubatse urugo yaramaze kuba umusirikare avuga ko gukora igisirikare bitamubuza kuzuza inshingano z’urugo nk’umugore.

Ati: “Ndubatse mfite urugo, mfite abana  n’umugabo, kandi nashinze urugo nyuma y’uko njya mu gisirikare, ni ukuvuga ngo ntabwo kibuza umuntu uburenganzira, waba igitsina gabo cyangwa gore haba uburenganzira bw’ibanze ukenera, igisirikare rero ntabwo kibukubuza.”

Ku myumvire y’uko hari abakobwa bumva ko batajya mu gisirikare, ibyatuma hari abasore babatinya bikabaviramo kubura abagabo.

Col. Muragijimana ati: “Hari imyumvire hakaba n’ukuri, ubona ko njyewe nubatse mfite urugo mfite abana ni ukuvuga ko birashoboka, kuba umusirikare ugakomeza gukorera igihugu ukitanga, ariko ukagira n’urugo ukagira n’umuryango nk’uko abandi bose barugira.”

Col. Muragijimana avuga ko kugira urugo no kugira akazi mu gisirikare, ari  inshingano zibangikanywa kandi zigakunda mu gihe uzikora yazihaye umurongo.

Ati: “Akazi uragakora ukagaha umwanya wako ariko n’umuryango na wo ukakubona, abana bakakubona, uwo mwashakanye akakubona ndumva rero ntawe ukwiye kubigiraho impungenge.”

Col. Muragijimana ahamya ko umwuga w’igisirikare ari umwuga udasanzwe usaba kwemera kwitangira igihugu bityo akagira inama urubyiruko by’umwihariko urw’abakobwa ko baza bagafatanya mu kazi kuko hari imirimo myinshi ikorwa mu gisirikare irimo ubuvuzi, kuba ba injenyeri na we akaba ari we ndetse n’abatwara indege n’indi myuga itandukanye.

Ashishikariza abagore bari mu gisirikare gukomeza gukora no kwitinyuka ndetse n’abandi batarajya mu ngabo z’u Rwanda kuza bagafatanya mu gutanga umusanzu wabo wo kubaka Igihugu.

Col. Muragijimana yishimira kuba mu bagore batanga umusanzu mu kwimakaza umutekano w’u Rwanda
  • ZIGAMA THEONESTE
  • Gashyantare 2, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE