Ibyiza bya siporo rusange imaze kuba ubukombe mu Mujyi wa Kigali

  • KAYITARE JEAN PAUL
  • Werurwe 4, 2024
  • Hashize amezi 2
Image

“Iyi nkuru ishingiye ku bitekerezo bwite bya Tukamwibonera Léonard, Umukozi w’Umujyi wa Kigali ushinzwe imbuga nkoranyambaga.”

Siporo rusange izwi nka Kigali Car Free Day iba kabiri mu kwezi ku cyumweru cya mbere n’icya gatatu. Mu gihe cya siporo rusange, imihanda imwe n’imwe irafungwa ku binyabiziga bikoresha moteri, igaharirwa abakora siporo yo kwiruka, kugenda n’amaguru n’abagenda n’amagare.

Muri iyi nkuru turarebera hamwe ibyiza bitandatu by’iyi siporo.

Siporo rusange yatangiye mu mwaka wa 2016. Mbere yaho, siporo yakorwaga n’abantu bake kandi biganjemo urubyiruko.

Nyuma y’uko iyi siporo itangiye, umubare w’abakora siporo wariyongereye ku buryo bugaragara kandi ndetse bamwe babigize umuco.

Siporo rusange yatangiye abantu baturutse hirya no hino mu Mujyi wa Kigali bahurira ku mbuga y’Ikigo gishinzwe Imisoro n’Amahoro (RRA).

Uko umuco wo gukora siporo wagiye ukura, yaje kwaguka, ubu hari site enye zihuriraho abayitabiriye ari zo; ku mahuriro y’imihanda ya KCC (Kigali Convention Centre), Tapis Vert i Nyamirambo, kuri Sitade ya IPRC Kigali i Kicukiro ndetse no ku Gisozi muri Kaminuza yigenga ya Kigali (ULK).

Imibare y’Umujyi wa Kigali igaragaza ko nibura Car Free Day imwe mu Mujyi wa Kigali yitabirwa n’abantu basaga ibihumbi 10 ugenekereje.

Kigali Car Free Day ifasha abantu kumenya uko bahagaze mu bijyanye n’indwara zitandura.

Abitabiriye Siporo Rusange bisuzumisha indwara zitandura nta kiguzi.

Indwara zisuzumwa kuri buri siporo, ni umuvuduko w’amaraso (blood pressure), igipimo cy’isukari mu maraso (Blood sugar level) no gupima ngo harebwe niba umuntu adafite umubyibuho ukabije hashingiwe ku burebure bwe n’ibiro afite (Body Mass Index-BMI).

Ikindi kandi kuri siporo imwe muri ebyiri ziba mu kwezi, hapimwa indwara z’amaso.

Imibare igaragaza ko kuri buri siporo rusange abantu bari hagati ya 250 na 300 bisuzumisha indwara zitandura.

Kigali Car Free Day yongereye ubusabane mu miryango n’abantu muri rusange

Siporo rusange ni umwanya abagize umuryango (umugore, umugabo n’abana) bahuza urugwiro ndetse bakaganira ku ngingo zitandukanye.

Bitewe n’akazi abantu bakora, hari abatabona umwanya uhagije wo kuba mu miryango yabo. Siporo rusange rero wabaye umwanya mwiza bongera guhura bityo bikongera ubusabane ku bagize umuryango.

Siporo rusange kandi ifasha n’abantu muri rusange kuganira no guhuza urugwiro.

Umwanya wo gutanga ubutumwa bijyanye n’ubukangurambaga butandukanye.

Nyuma ya siporo rusange, haba igihe hafatwa umwanya muto utangirwamo ubutumwa butandukanye bijyanye n’ingingo y’uwo munsi harimo ubutumwa bushishikariza abatuye Umujyi kugira ubuzima bwiza hirindwa indwara, kurangwa n’isuku, kurwanya ihohoterwa, kurengera no kubungabunga ibidukikije n’ibindi.

Car Free Day igira uruhare mu kurwanya ihumana ry’ikirere.

N’ubwo nta bushakashatsi bucukumbuye bwakozwe kuri iyi ngingo, abahanga bavuga ko Kigali Car Free Day igira uruhare mu kugabanya imyuka ihumanya ikirere yoherezwa n’ibinyabiziga kubera ko imihanda iba yafunzwe ku binyabiziga bikoresha moteri ndetse n’ababa bayitabiriye bagenda n’amaguru.

Car Free Day yagabye amashami hirya no hino mu gihugu ndetse no mu mahanga.

Siporo rusange yakwiriye hirya no hino mu gihugu. Nyuma y’Umujyi wa Kigali, mu Turere dutandukanye mu gihugu bagira umunsi wahariwe siporo rusange.

Hari kandi n’ibihugu bitandukanye byagiye biza kwigira ku Mujyi wa Kigali kugira ngo na bo bagire umuco wo gukora no gukunda siporo.

Niba utahaga umwanya ibikorwa bya siporo nawe ubutaha uratumiwe muri siporo rusange!!

Abagize umuryango bagira umwanya wo gusabana n’abana babo bakora Siporo
Minsitiri wa Siporo, Mimosa Aurore Munyengaju yitabira Siporo Rusange
Abagize Inteko Ishinga Amategeko bakunze kwitabira Siporo Rusange
Hirya no hino mu Mujyi wa Kigali hashyizweho site zikorerwaho Siporo
Abitabira Siporo Rusange bagira umwanya wo kwisuzumisha indwara zitandura

Amafoto: Umujyi wa Kigali

  • KAYITARE JEAN PAUL
  • Werurwe 4, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE