Ibiti 26% by’ikawa mu Rwanda birengeje imyaka 30

  • ZIGAMA THEONESTE
  • Gashyantare 21, 2024
  • Hashize amezi 2
Image

Minisitiri w’Ubucuruzi n’Inganda (MINICOM) Prof Ngabitsinze Jean Chrysostome, yahishuye ko kugeza ubu mu Rwanda habarurwa ibiti by’ikawa bishaje bituma umusaruro utiyongera uko bikwiye, aho 26% byabyo birengeje imyaka 30.

Yabigarutseho ku wa Kabiri tariki ya 20 Gashyantare 2024, atanga ibisabonuro ku bibazo Abadepite bari bagaragarije Minisiteri ko hari abahinzi b’ikawa mu Rwanda batabona ifumbire mu buryo bukwiye bigatuma umusaruro uhagije utaboneka ku nganda.

Prof. Ngabitsinze yavuze ko mu igenzura bakoze basanze 26%  by’ibiti by’ikawa bimaze imyaka isaga 30 bisoromwa, mu gihe ibindi 44% byo bimaze imyaka 20.

Minisitiri Prof. Ngabitsinze yahamirije Abadepite bari bagaragaje ko byakongerarwamo ifumbire  ko ahubwo  byabanza gusazurwa kugira ngo bitange umusaruro uhagije.

Yagize ati  “Ni yo mbogamizi dufite mu ikawa yacu , ni ukugira ngo  ibanze isazurwe kuko ifumbure uko yaba ingana kose ntacyo byatanga […]. Muri  guhunda dufite nka Guverinoma ni ugushyiraho gahunda yo kugira ngo tuvugurure ibiti.”

Prof Ngabitsinze yabwiye Abadipite ko uretse kuba ibiti by’ikawa bishaje bikaba bikeneye gusazurwa, n’umubare munini w’ababikoramo (abahinzi) na bo barakuze.

Yavuze ko imibare igaraza ko 40% by’ibiti by’ikawa y’u Rwanda byitabwaho n’abafite hejuru y’imyaka 60 y’amavuko.

Uwo Muyobozi yavuze ko gusazura ibiti by’ikawa byaganiriweho  n’inzego bireba muri Guverinoma, bityo bikaba ari byo birimo kwihutishwa kugira ngo bikorwe, hanyuma harebwe uko ifumbire itangwa yajya itanga umusaruro uhagije.

Minisitiri Prof. Ngabitsinze yahamirije intumwa za rubanda ko ubusanzwe ifumbire y’ikawa ishyirirwaho Nkunganire na Leta, ikanongera (ikawa) kunganirwa abahinzi bayijeje ku bashaka kuyohereza hanze y’Igihugu, bityo amafaranga akatwa n’abayijyana agatangwa na Leta.

Yasabye ko n’abahinzi b’ikawa bakwiye kubyumva ko gusazura ikawa ari cyo gikenewe mbere na mbere.

Yagize ati: “Imbogamizi ni uko hari bamwe bavuga ngo ndandure igiti tumaranye imyaka 30 cyampaga ikilo kimwe cyangwa bibiri kandi buri sizeni (Igihe ikawa yeze), nabonaga amafatanga aya n’aya? Ariko nka Leta hari umushinga waje uzafasha kuzisazura kugira ngo na ya fumbire izabashe gutanga umusaruro kurushaho.”

Depite Mukamana Elizabeth yagaragaje ko hakwiye kugira igikorwa cyihuse maze urubyiruko rugashishikarizwa kujya mu buhinzi bw’ikawa kuko ari byo bizatanga umusaruro kurushaho.

Yagize ati: “Tunasura aba bahinzi b’ikawa usanga biganjemo abantu bakuze, ugeraranyije n’akamaro ikawa idufitiye n’amadovize yinjiza, n’ukuntu ikawa y’u Rwanda ikunzwe. Badufashe igiteganywa gukorwa gikorwe kugira ngo rwa rubyiruko rwaba urwize ndetse n’abatarize bashishikarizwe kujya muri iki gikorwa cyo guhinga ikawa.”

Yashimangiye ko bizanatuma inganda zitunganya ikawa ziyongera ndetse na zo zikazaba zifitwe n’urubyiruko.

Mu gihe abakora mu ikawa biganjemo abakuze, urubyiruko rurashishikarizwa kuyoboka iki gihingwa gifatiye runini u Rwanda
  • ZIGAMA THEONESTE
  • Gashyantare 21, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE