Ibihugu 9 byasabwe kwakira Kabuga Félicien biramwanga

  • NTAWITONDA JEAN CLAUDE
  • Werurwe 10, 2024
  • Hashize ukwezi 1
Image

Kabuga Félicien, umwe mu bakurikiranyweho icyaha cya Jenoside yakorewe Abatutsi mu 1994 wafatiwe mu Bufaransa taliki ya 16 Gicurasi 2020, ubu yabuze amajyo nyuma y’aho ibihugu icyenda by’i Burayi n’Amerika y’Epfo byegerewe ngo bimwakire bikanga.

Kuri ubu yaheze mu Rukiko rw’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT) nubwo urwo rukimo rwafashe umwanzuro wo kumurekura ruvuga ko nta bushobozi agifite bwo kuba yaburana.

Byagarutsweho n’itsinda ry’abacamanza 20 ba IRMCT bahuriye mu nama i Arusha muri Tanzania mu cyumweru gishize, mu gushaka umuti w’icyo kibazo, n’ibindi bitandukanye byagaragaye mu nkiko za Loni ziburanisha ibyaha by’intambara n’ibya Jenoside ku Isi.

Kabuga urimo gusatira imyaka 90 y’ubukuru, aracyafungiwe mu igororero ry’agateganyo riherereye i La Haye mu Buholandi, nubwo nta rubanza agitegereje, cyangwa ngo abe ategereje kwimurirwa mu yindi gereza nk’uko bigenda ku bandi bahamwa n’ibyaha.

Ahazaza he ahategereje gusa ku gihugu kizemera kumwakira. Mu nama yahuje abacamanza b’Urukiko rwa IRMCT ku wa 26 Gashyantare, babwiye Umwanditsi Mukuru w’urwo rwego gukomeza gushaka ibihugu byakira uwo mukambwe ushinjwa ibyaha biremereye.

Abacamanza bamenyeshejwe ko ibihugu icyenda byose byegerewe kugira ngo bibashe kumucumbikira muri Amerika y’Amajyepfo n’i Burayi bashwishurije urwo rwego ko bidashoboka.

Kabuga Félicien yari umwe mu bantu bashakishwaga cyane ku Isi akurikiranyweho uruhare rukomeye yagize mu gutera inkunga abakoze Jenoside yakorewe Abatutsi mu Rwanda mu 1994, yasize abasaga miliyoni bambuwe ubuzima.

Yari akurikiranyweho ibyaha birindwi bya Jenoside yashinjwaga n’Urukiko Mpuzamahanga Mpanabyaha Rwashyiriweho u Rwanda (ICTR) kuva mu mwaka wa 1997.

Ibyo byaha birimo ubufatanyacyaha muri Jenoside, gushishikariza mu buryo butaziguye no gukangurira rubanda gukora Jenoside, gushaka gukora Jenoside, umugambi wo gukora Jenoside, gutoteza no gutsemba, byose bifitanye isano n’ibyaha byakozwe mu gihe cya Jenoside yakorewe Abatutsi mu Rwanda.

Nyuma yo gufatwa mu myaka ine ishize, Kabuga yabwiye urukiko rwa IRMCT ko adashaka gusubira mu Rwanda rumushinja gutiza umurindi Jenoside yakorewe Abatutsi.

U Rwanda ni cyo gihugu gishobora kwemerra uyu mukambwe kitajuyaje kuko agifiteho uburenganzira busesuye nka gakondo ye, ariko nyuma yo kwanga kuba yagaruka mu gihugu cyamubyaye, ubu yabaye impezamajyo.

Bivugwa ko ubu adashobora gusubizwa mu Bufaransa aho yafatiwe kubera ko na bwo yahafatiwe nta byangombwa afite, afatwa nk’umwe mu bimukira batubahirije amategeko.

Yafatiwe hafi y’i Paris n’inzego z’umutekano z’u Bufaransa nyuma y’iperereza rihuriweho ryakozwe ku bufatanye bw’Umushinjacyaha wa IRMCT n’inzego z’ubutabera z’icyo gihugu.

Mu gihe guhera mu kwezi gutaha u Rwanda n’inshuti z’u Rwanda bazatangira Icyumweru cy’Icyunamo n’iminsi 100 yo kwibuka ku nshuro ya 30 Jenoside yakorewe Abatutsi, ubutabera butatanzwe kuri Kabuga buracyabereye umutwaro bamwe, by’umwihariko abagezweho n’ingaruka z’ibikorwa yateye inkunga.

Gusa nanone Umuvugizi wa Guverinoma y’u Rwanda Yolande Makolo, yahamirije The East African ko u Rwanda rutagira icyo rutangaza ku birebana no kumwakira kuko nta wigeze arwegera, cyane ko na nyiri ubwite yatangaje ko adashaka kuza mu rwamubyaye.

Yagize ati: “Tuzambuka icyo kiraro nitukigeraho. Ariko nanone twakoranye na ruriya rukiko kuva rwashyirwaho kandi haramutse hari ikintu gisabwa gukorwaho n’ubundi tuzafatanya mu kugikora.”

Yavuze ko u Rwanda rwubaha imyanzuro ya IRMCT nubwo rutanyuzwe n’icyemezo cyafashwe kuri uwo mugabo. Ati: “Birababaje by’umwihariko ku bagezweho n’ingaruka. Bigaragara nk’aho yabashije gucika ibyaha bikomeye akekwaho kuba yarakoze.”

Kugeza magingo aya, IRMCT ikomeje gushaka igihugu kizemera kwakira Kabuga akarekurwa binyuze mu mabwiriza yashyizweho n’urwo rwego.

Biteganywa ko umugororwa urekurwa by’agateganyo, kubera impamvu z’ubuzima, iyo akize agarurwa agafungirwa hamwe n’abandi. IRMCT isanga bitewe n’ubuzima bukendera bwa Kabuga bazamurekura akamarana ubuzima bwe busigaye n’umuryango we.

Ingufu zo kwanga kohererezwa urwo rukiko Kabuga yakoresheje zakomwe mu nkokora nyuma y’aho Urukiko rwo mu Bufaransa rutesheje agaciro ubujurire bwe tariki 30 Nzeri 2020.

Mu kwezi gukurikiyeho urubanza rwahise rwoherezwa mu rukiko rwa IRMCT ruyobowe na Lain Bonomy mu gihe Perezida w’Iburanisha yari Graciela Susana Gatti Santana waburanishaga ari kumwe n’Umucamanza Elizabeth Ibanda-Nahamya.  

Muri Kamena 2023, Urukiko rw’Ubujurire rwa Loni rwategetse ko urubanza rwa Kabuga rwahagarikwa kubera ko ubuzima bwe buri mu kaga, ariko rushimangira ko hari ubundi buryo bw’ubutabera buzakoreshwa.

  • NTAWITONDA JEAN CLAUDE
  • Werurwe 10, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE