Huye: Ubutabera ku muryango wahishe amakuru y’ahari imibiri y’abazize Jenoside

  • NTAWITONDA JEAN CLAUDE
  • Mutarama 29, 2024
  • Hashize amezi 4
Image

Urwego rw’Igihugu rw’Ubugenzacyaha (RIB) rwemeje ko rwataye muri yombi abantu barindwi ariko umwe muri bo akarekurwa, aho bakurikiranyweho guhisha amakuru y’ahari imibiri y’inzirakarengane zazize Jenoside yakorewe Abatutsi mu 1994.

Ni nyuma y’aho guhera ku wa 25 kugeza ku wa 28 Mutarama, imibiri 141 y’abishwe muri Jenoside yakorewe Abatutsi yatahuwe munsi mu rugo rw’umuturage mu Karere ka Huye.

Umuvugizi wa RIB Dr. Murangira B Thierry, yabwiye itangazamakuru ko abatawe muri yombi ari Hishamunda Jean Baptiste w’imyaka 86, Dusabemariya Seraphine w’imyaka 61, Habimana Petero w’imyaka 89, Musasangohe Marianne w’imyaka 50, Uwabega Marie Josee 53 na Uwimana Mediatrice 54.

Ni mu gihe uwafashwe ariko akaza kurekurwa nyuma ari Nyirakiromba Sifa w’imyaka 68, ariko bagenzi be bo bakaba bategereje kwitaba urukiko mu minsi iri imbere.

Mu kwezi k’Ukwakira 2023, ni bwo imibiri ya mbere itandatu yabonetse ubwo abakozi bari barimo kubaka igipangu mu rugo rwa Hishamunda Jean Baptiste ruherereye mu Murenge wa Ngoma, Akarere ka Huye.

Nyuma yo gutahura iyo mibiri hafi y’inzu n’igikoni cyayo, hafashwe umwanzuro wo gusenya inzu nini ibikorwa byo gutaburura imibiri birakomeza kandi ni na ko babonekaga ari benshi.

Abatangabuhamya bavuga ko ako gace kari gatuwe n’abasirikare bo ku ngoma ya Habyarimana yateguye ikanashyira mu bikorwa Jenoside yakorewe Abatutsi.

Binavugwa kandi ko muri abo basirikare harimo babiri bazwiho kuba baragize uruhare muri Jenoside yakorewe Abatutsi, harimo n’umuhungu wa Hishamunda ubu ufungiwe mu Igororero rya Huye, aho akomereje igihano nyuma yo guhamwa n’ibyaha bya Jenoside n’ibyibasiye inyokomuntu.

Murangira yagize ati: “Nubwo yahamwe n’ibyaha ariko, ntabwo yigeze atanga amakuru y’aho yajugunye imibiri y’abo yishe bajugunywe mu byobo byacukuwe iwabo. Abafashwe bakurikiranyweho gutesha agaciro ibimenyetso bya Jenoside yakorewe Abatutsi no guhishira amakuru.”

Murangira yasobanuye ko abatawe muri yombi bafitanye isano. Dusabemariya, Musangangohe na Uwabega ni abana ba Hishamunda, mu gihe Habimana na Uwimana bo ari abaturanyi ba Dusabemariya wari waragagabanye ubwo butaka nk’umurage yahawe na se.

Mu minsi ishize rero ni bwo yashatse abakozi bo kumwubakira urupangu, bari mu kazi baba babonye imibiri banahita babimenyesha Inzego z’ibanze.

Murangira ati: “Abafunzwe bamaze gushyikirizwa ubushinjacyaha.”

Perezida wa Ibuka mu Karere ka Huye Siboyintore Theodate, yavuze ko guhisha amakuru y’ahari imibiri y’abishwe muri Jenoside yakorewe Abatutsi bikiri icyaha gikomeye nyuma y’imyaka 30 ishize habaye Jenoside yakorewe Abatutsi mu 1994.

Yagize ati: “Abaturanyi ndetse na ba nyir’urugo bahishe amakuru y’abazize Jenoside bahiciwe.”

Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), irasaba abantu bose n’urubyiruko by’umwihariko, kurushaho kwiga amateka yaranze u Rwanda kugira ngo barusheho gukumira abagerageza kuyapfobya no kuyatesha agaciro.

Minisitiri wa MINUBUMWE Dr Bizimana Jean Damascene yabigarutseho ubwo yatangizaga ibikorwa bitegura Icyunamo n’iminsi 100 yo kwibuka ku nshuro ya 30 Jenoside yakorewe Abatutsi mu 1994 yahitanye abarenga miliyoni mu gihe cy’iminsi ijana gusa.  

Ibikorwa by’imyiteguro byahawe insanganyamatsiko igira iti, “Rubyiruko Amateka Yawe”, byatangirijwe mu Karere ka Huye, aho abaturage bunamiye abishwe muri Jenoside yakorewe Abatutsi baruhukiye mu Rwibutso ruherereye muri Kaminuza y’u Rwanda.

Gushisha amakuru ku birebana na Jenoside yakorewe Abatutsi ni icyaha gihanwa n’Itegeko N° 59/2018 ryo ku wa 22/8/2018 ryerekeranye n’icyaha cy’ingengabitekerezo ya Jenoside n’ibyaha bifitanye isano na yo.

Ingingo ya 5, 6, 7, 8, n’iya 10 zibuza ibikorwa bijyanye no guhakana, gupfobya no gutesha agaciro urwibutso rwa Jenoside cyangwa ahashyinguye imibiri y’abazize Jenoside.

Ingingo ya 8 by’umwihariko ivuga ko umuntu, ku bushake, uhisha, wangiza, usibanganya cyangwa utesha agaciro ibimenyetso cyangwa amakuru byerekeye Jenoside, aba akoze icyaha.

Iyo ahamijwe n’urukiko gukora kimwe mu bikorwa bivugwa mu gika cya mbere cy’iyi ngingo, ahanishwa igifungo kitari munsi y’imyaka irindwi (7) ariko kitarenze imyaka icyenda (9) n’ihazabu y’amafaranga y’u Rwanda atari munsi y’ibihumbi magana atanu (500.000 Frw) ariko atarenze miliyoni imwe (1.000.000 Frw).

  • NTAWITONDA JEAN CLAUDE
  • Mutarama 29, 2024
  • Hashize amezi 4
TANGA IGITEKEREZO
Mwumvaneza j damascene says:
Mutarama 29, 2024 at 11:50 am

Abobantu bahamwe byumwihariye kuko ibintu baba bahishiye nikirazira my Rwanda rwacu

Andika igitekerezo

AMATEGEKO AGENGA IYANDIKA RY'IGITEKEREZO CYAWE