Hari abashoferi batira ibyuma bakabitirura bavuye muri ‘Controle technique’

  • KAYITARE JEAN PAUL
  • Ukuboza 5, 2023
  • Hashize amezi 6
Image

Bamwe mu bashoferi bajyana ibinyabiziga muri Controle technique babanje gutira ibyuma bagenzi babo bavayo bakabitirura. Polisi irabihanangiriza ivuga ko iyo migirire iri mu bibangamira ingufu zishyirwa mu gukumira impanuka zo mu muhanda.

ACP Boniface Rutikanga, Umuvugizi wa Polisi, asobanura ko impanuka nyinshi zituruka ku myitwarire n’imigirire y’abakoresha umuhanda. Mu Mujyi wa Kigali habonetse impanuka zoroheje mu gihe izikomeye zigaragara mu Ntara.

Asobanura ko imiterere n’ubuziranenge bw’ikinyabiziga ari imwe mu mpamvu nyamukuru ishobora kuba nyirabayazana w’impanuka bikaba na kimwe mu by’ibanze bigomba kwitabwaho.

Agira ati: “Ubuziranenge bw’ikinyabiziga ni ikintu cya ngombwa umushoferi uwo ari we wese cyangwa umuyobozi w’ikinyabiziga agomba kwitaho; haba iki gihe cy’imvura cyangwa n’ikindi gihe icyo ari cyo cyose.

Hari ibinyabiziga usanga bifite ibyuma atari byo byuma byari mu kinyabiziga igihe cyajyaga mu isuzuma (Controle technique)”.

Agaragaza ko harimo ikintu kimeze nko kwiba kugira ngo ikinyabiziga kibashe kubona icyemezo cy’uko cyanyuze mu Ikigo gishinzwe ubuziranenge bw’ibiziga.

Polisi ihishura ko iyo ibinyabiziga bivuye aho ngaho, bisubizwamo bya byuma ibyo bikaba byagira ingaruka ku kinyabiziga no ku buzima bw’abagitwaye.

Nzayinambaho Daniel, umushoferi mu Mujyi wa Kigali, agira ati “Kontolore tekinike iravura cyane kuko imodoka ushobora kuyibona ugahora ugira ngo ni nzima.

Nk’ubu hari igihe uza muri kontolore tekinike bakakubwira ngo ku mutambiko w’inyuma akaguru kamwe ntigafata kandi wari uzi ngo amaguru yawe yose arafata.

Ukaza wagera hano bakakubwira ngo rotire zirajegera kandi ntiwajyaga ubyumva, ibyo ni ibibazo byinshi. Waza kureba ugasanga sashe yacitsemo kabiri kandi ibyo bintu ntiwari ubisanganywe”.

Nubucyeye Athanase na we ni umushoferi ugira inama bagenzi be ko badakwiye guhindura piyesi z’imodoka ngo bongere bazikuremo bagamije kubona icyemezo cy’ubuziranenge bw’ikinyabiziga.

Ati: “Nk’umuntu utwara imodoka ubutumwa namuha, ni uko ipiyesi bakureze muri kontolore uba ugomba kuyishyiramo kandi wanayishyiramo ukayigumishamo ukayikoresha kubera ko uba urinze ubuzima bwawe”.

Nsengiyumva Emmanuel asaba abashoferi guha agaciro akazi bakora, hanyuma bakubahiriza amategeko y’umuhanda kuko mu mahanda haba harimo ibimenyetso.

Bwiseri Djumaine avuga ko iyo umuntu wese atashye nta mpanuka akoze, natwe ahohoteye mu muhanda arara neza, agatekereza neza.

Ibyo ariko ngo bijyana no kuba ikinyabiziga umuntu agenda kiba gifite ubuziranenge.

ACP Rutikanga, Umuvugizi wa Polisi, agira inama abatwara ibinyabiziga kurushahokubahiriza amategeko y’umuhanda kugira ngo barusheho gukumira no kurwanya impanuka zo mu muhanda.

ACP Boniface Rutikanga, Umuvugizi wa Polisi

Ati: “Nibutse ibintu by’ingenzi, gutwara ikinyabiziga wanyoye ibisindisha biragushyira mu byago byo gufungwa no guhanwa by’intangarugero.

Mu gihe abantu bagana mu minsi mikuru twibutse ko ibikorwa bya polisi byiyongereye kandi byongereye imbaraga n’umuvuduko.

Abo tuzafatira mu byaha bitandukanye navuze n’ibyo ntavuze bigengwa n’amategeko bazabihanirwa”.

Impanuka zose zibera mu gihugu, Polisi itangaza ko zishobora kwirindwa 100%.

Ku rundi ruhande, 80% y’impanuka zo mu muhanda Polisi ishimangira ko ziterwa n’imyitwarire y’abawukoresha, nyamara ariko ko zakwirindwa.

  • KAYITARE JEAN PAUL
  • Ukuboza 5, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE