Gushyira imbere umuturage, ishoramari rikomeye twakoze- Perezida Kagame

  • NTAWITONDA JEAN CLAUDE
  • Gashyantare 8, 2024
  • Hashize ibyumweru 2
Image

U Rwanda rwihaye intego yo kuba rwabaye igihugu gifite ubukungu bwihagazeho bitarenze mu mwaka wa 2035 ndetse rukazaba ruri mu bihugu byateye imbere mu mwaka wa 2050.

Urwego rw’abikorera rwahawe rugari muri icyo cyerekezo aho rufatanya n’inzego zitandukanye za Leta, nubwo intangiriro tari ko yari imeze mu myaka 30 ishize aho Igihugu cyaheraga ku busa nyuma y’amateka mabi yakigejeje kuri Jenoside yakorewe Abatutsi mu 1994.

Perezida wa Repubulika y’u Rwanda Paul Kagame, yakomoje ku buryo u Rwanda rutabonye amahirwe yo kubaka urwego rw’abikorera rukomeye hakiri kare, kubera ayo mateka mabi rwanyuzemo ashingiye ku miyoborere yimakazaga ivangura n’amacakubiri.

Umukuru w’Igihugu yabigarutseho mu ijambo yagejeje ku bitabiriye inama y’ubucuruzi n’ishoramari yahuje abayobozi b’ubucuruzi mu Rwanda n’abo muri Pologne baje baherekeje Perezida wabo Andrzej Sebastian Duda na Madamu Agata Kornhauser-Duda.

Ni inama yabaye ku wa Gatatu tariki ya 7 Gashyantare, yaje ikurikira ibiganiro byahuje Abakuru b’Ibihugu byombi byakurikiwe n’isinywa ry’amasezerano mu nzego zitandukanye.

Perezida Kagame yagize ati: “Kubera amateka mabi igihugu cyacu cyanyuzemo, ntabwo twagize amahirwe yo kubaka urwego rw’abikorera rukomeye cyane hakiri kare. Ariko twabashije gutubura bikeya dufite, dushyira imbere ibyo abaturage bacu bakeneye. Iryo ni ryo shoramari rihebuje twakoze mu mateka yacu.”

Yavuze ko uyu munsi u Rwanda rurimo kwibanda ku  guteza imbere inzego z’ingenzi nk’urw’ubuzima, ubukerarugendo, siporo n’amabanki, rufatanyije n’abafatanyabikorwa batandukanye batanga inkunga ifatika.

Yahishuye ko muri buri rwego u Rwanda rwiyemeje kuba igicumbi cy’Afurika n’Isi yose, aho rutazanatezuka ku gutanga umusanzu warwo mu ishyirwa mu bikorwa ry’Isoko Rusange ry’Afurika (AfCFTA).

Yakomeje agira ati: “Inkuru nziza ni uko abashoramari benshi batangiye kurambagiza ba rwiyemezamirimo b’urubyiruko b’Abanyafurika, bagashora imari mu bushobozi bwabo bwo guhanga ibishya no mu mpano zabo.”

Perezida Kagame yagaragaje ko u Rwanda rutewe ishema no kwakira Perezida Duda Madamu we n’itsinda ry’abashoramari ryabaherekeje, by’umwihariko agashimira Ikigo cy’Ishoramari n’Ubucuruzi cya Pologne.

Ati: “Mu gihe kirekire gishize, abashoramari ba Pologne bagaragaje ubushake bwo kubyaza umusaruro amahirwe mashya bafatanyije n’uwego rwacu rw’abikorera, turabibashimira.”

Yakomeje ashimangira ko u Rwanda na Polonye ari ibihugu bigaragara ko bifite byinshi bishobora guhererekanya uhereye ku bumenyi n’ubunararibonye ukageza ku byo bakorana mu bucuruzi n’ubutwererane.  

Yakomeje agira ati: “Mu Rwanda tumaze igihe dukora cyane mu guhanga ikirere cyiza cy’ubucuruzi kugira ngo ubucuruzi no guhanga udushya bitere imbere. Kuri benshi, ibyo birahanga amahirwe menshi y’imirimo.”

Yaboneyeho no kugaruka ku buryo umugabane w’Afurika ufite imitungo kamere ikenewe mu guhindura ahazaza h’ubukungu bw’Isi, aboneraho kwibutsa ko ibyo bitagerwaho mu gihe hatabayeho ubufatanye mu gucunga umutungo mwinshi bafite.

Yashimiye ibiganiro byahuje abacuruzi bo mu Rwanda n’abo muri Pologne, ashimangira ko ari amahirwe yo gushaka ibisubizo bihamye bibereye abaturage b’u Rwanda na Poland.

Perezida Duda wa Pologne na we yashimiye by’umwihariko Perezida Kagame ku bw’imbaraga akomeje gushyira mu kurushaho kwimakaza umubano w’ibihugu byombi.

Yagaragaje ko bishimiye kugira u Rwanda nk’umwe mu bafatanyabikorwa bizewe bo ku mugabane w’Afurika, cyane ko ari igihugu gisangiye indangagaciro na Pologne.  

Yavuze ko uru ruzinduko rwatangiye ku wa Kabiri rukaba rusoze kuri uyu wa Kane ari ingirakamaro kuri we, cyane ko rwarushijeho gufungura amarembo y’ubutwererane hagati y’u Rwanda na Pologne.

Amafoto: Village Urugwiro

  • NTAWITONDA JEAN CLAUDE
  • Gashyantare 8, 2024
  • Hashize ibyumweru 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE