GCF irashima uburyo u Rwanda rubungabunga ibidukikije

  • NYIRANEZA JUDITH
  • Werurwe 7, 2024
  • Hashize amezi 2
Image

Abagize abagize Inama y’Ubutegetsi y’Ikigega cy’Isi cyita ku mihindagurikire y’ibihe GCF barashimira u Rwanda uruhare rugira mu kubungabunga ibidukikije.

Babitangaje uyu munsi ku wa Kane tariki ya 7 Werurwe 2024, ubwo Guverineri w’Intara y’Amajyaruguru Mugabowagahunde Maurice ari kumwe n’Umuyobozi w’Akarere ka Gicumbi, bakiriye Itsinda ry’Abaterankunga b’Umushinga Green Gicumbi, baturutse mu Kigega cy’Isi cyita ku mihindagurikire y’ibihe GCF (Green Climate Fund), aho basuye ibikorwa bitandukanye by’uyu mushinga, biherereye hirya no hino mu Karere ka Gicumbi.

Bashimye uburyo u Rwanda rukoresha amafaranga mu guhangana n’imihindagurikire y’ibihe kubera ibikorwa byo kubungabunga ibidukikije biboneye ubwabo.

Umwe muri bo Victoria Gunderson yagize ati: “Tuzakomeza gukorana na Leta y’u Rwanda kuko ifite ubushake bw’igenamigambi mu kubungabunga ibidukikije, kandi iyo byitaweho biba ari isoko y’ubukungu.”

Hasuwe ubuhinzi bw’ikawa buherereye mu Murenge wa Bwisige, aho Umushinga Green Gicumbi wafashije abahinzi gutera ikawa ku buso bwa ha 40.

Abashyitsi n’abayobozi bifatanyije n’abahinzi gutera ibiti bivangwa n’imyaka kuri site basuye.

Kuri iyo site kandi abanyamuryango ba Koperative Dutuburekawa Gihuke basobanuriye abashyitsi uburyo ikawa bahinze babifashijwemo n’Umushinga Green Gicumbi, zatangiye kubabyarira inyungu no guteza imbere imibereho yabo, kuko batangiye kweza none bakirigita ifaranga.

Mu Murenge wa Kaniga ho hasuwe Umudugudu w’Icyitegererezo ufite inyubako zihanganira imihindagurikire y’ibihe wubatswe ku bufatanye bw’Ikigega cy’Igihugu gitera inkunga imishinga yo kubungabunga ibidukikije FONERWA kibinyujije mu Mushinga wa Green Gicumbi, ukaba waratujwemo imiryango 60 yari ituye mu manegeka.

Ni umudugudu watashywe ku ya 20 Ugushyingo 2023, uri mu Murenge wa Kaniga, Akagari ka Mulindi mu Karere ka Gicumbi, wuzuye utwaye asaga miliyari eshatu z’amafaranga y’u Rwanda.

Umudugudu w’icyitegererezi wa Kaniga

Abagize Inama y’Ubutegetsi y’Ikigega cy’Isi cyita ku mihindagurikire y’ibihe GCF bishimiye ibikorwa by’Umushinga Green Gicumbi basuye, ndetse banashimangira ko u Rwanda ari Igihugu cyiza gifite umurongo usobanutse wo guhangana n’imihindagurikire y’ibihe.

Guverineri Mugabowagahunde yashimiye abagize Inama y’Ubutegetsi ya GCF ku mushinga mwiza wa Green Gicumbi Ikigega bayoboye cyateye inkunga, ashimangira ko uyu mushinga wafashije gukemura ibibazo byinshi byari bibangamiye iterambere n’imibereho myiza y’abaturage.

Guverineri yasabye abagenerwabikorwa b’uyu mushinga wa Green Gicumbi, kwita no kubungabunga ibikorwa byose wabagejejeho no gukomeza kubibyaza umusaruro, hagamijwe kwiteza imbere bo ubwabo n’Igihugu muri rusange.

Ibindi bikorwa by’Umushinga Green Gicumbi byakozwe bigamije kubungabunga ibidukikije harimo amaterasi y’indinganire kuri Hegitari 600 n’amaterasi yikora kuri Hegitari 850, ikawa ihinze kuri Hegitari 40, icyayi kuri Hegitari 50, hatewe ibiti bivangwa n’imyaka kuri Hegitari 5 979, hatanzwe imbabura zirondereza ibicanwa zigera mu 25 400.

Hasazuwe amashyamba kuri Hegitari 1 254, Toni 65 500 z’imyuka ya Co2 zagabanyijwe n’ibikorwa by’umushinga Green Gicumbi.

Hahuguwe abantu 7 215 ku buryo bwo kubungabunga ibidukikije no guhangana n’imihindagurikire y’ibihe, abahawe akazi 26 500 barimo abagore 51% naho 50,7 % ni urubyiruko.

Hubatswe ibigega bifata amazi y’imvura 306, hanatunganywa imiyoboro y’amazi ngo adakushumura ubutaka n’ibindi.

Umushinga Green Gicumbi watewe inkunga na GCF ya miliyoni 32 z’amadolari y’Amerika

  • NYIRANEZA JUDITH
  • Werurwe 7, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE