Gasabo: Amasomero yatwaye miliyoni 22 Frw yabahinduriye ubuzima  

  • KAYITARE JEAN PAUL
  • Mutarama 18, 2024
  • Hashize amezi 4
Image

Umushinga w’amasomero watangiye muri Gicurasi 2023, ugeza ibitabo 4,235 mu masomero atandatu mu Tugari tugize Umurenge wa Rutunga, Akarere ka Gasabo, Umujyi wa Kigali.

Bivugwa ko uwo mushinga watwaye miliyoni 22 z’amafaranga y’u Rwanda ukomeje gufasha abana, urubyiruko n’abakuze kugira umuco wo gusoma muri uyu Murenge uvugwaho kuba wari ukiri imbere mu kugira abantu benshi batazi gusoma no kwandika.

Mu muhango w’ihererekanyabubasha hagati y’Umuryango UMUHUZA n’Umurenge wa Rutunga ku wa Gatatu tariki 17 Mutarama 2024, byashimangiwe ko ayo masomero akomeje kwimakaza umuco wo gusoma by’umwihariko ku bana basoma inkuru mu dutabo twihariye tw’abana.

Nyampinga Princesse umwana w’imyaka 9 utuye mu Kagari ka Kibenga akaba yiga mu mwaka wa 4 w’amashuri abanza muri G.S Rutunga, yabwiye Imvaho Nshya ko nyuma yo gusoma ibitabo bitandukanye byamuhinduriye ubuzima.

Amaze kumenya gukubura no kugira umuco wo kubaha ababyeyi no kuganira n’abagenzi be.

Agira ati: “Nkunda gusoma ibitabo. Maze gusoma icyitwa ‘Menya Umukobwa w’Intwari’ kirimo inyigisho zo gufashanya, kuvugisha ukuri no kwitonda. Nasomye icyitwa ‘Mariza Abona Isomo’, Abana b’Inkubaganyi, Ubwoba bwa Ntwari n’ibindi. Ibi bituma nkomeza no kuba uwa mbere mu ishuri”.

Shumbusho Alex na we wo mu Murenge wa Rutunga avuga gusoma ibitabo bimufasha kumenya ibyo atazi kandi akabikuramo inyigisho.

Abihurizaho na Muhoza Ange, aho avuga ko amaze kumenya uturimo two mu rugo turimo koza ibikoresho byo mu gikoni.

Ati: “Mu bitabo nsoma haba harimo udukuru tw’abana bakunda imirimo no kumvira ababyeyi. Gusoma izo nkuru byatumye mfata umuco w’abo bana”.

Nyiramajyambere Marie Claire, wakira abantu bakuru bagana isomero rya Rutunga, avuga ko mu bitabira isomero haba harimo n’abantu bakuru.

Abahinzi ni bamwe mu bashobora gukoresha isomero kugira ngo bamenye amakuru y’ubuhinzi ndetse n’ay’ikirere.

Karibwende Janvier umwe mu bakunda kugana isomero agira ati: “Njye maze kujya mu isomero inshuro nk’eshatu ariko namenye uko nagera ku musaruro ushimishije, ibyo nabisomye mu gitabo cy’umuhinzi nasanze mu isomero.”

Nyiramajyambere yahamirije Imvaho Nshya ko ubwitabire bw’abakuru bukiri buke.  Agira ati: “Ku munsi abantu bakuru ntibashobora kurenga 4 mu gihe abana iyo ari mu mpera z’icyumweru usanga bagera kuri 30.”

Imvaho Nshya yamenye Amakuru ko amasomero y’Umushinga UMUHUZA mu Murenge wa Rutunga, adaheza abantu bafite ubumuga.

Ubuyobozi bw’Umurenge wa Rutunga buvuga ko igikurikiyeho ari ugusigasira igikorwa cyiza cyagezweho.

Nsabimana Matabishi Desire, Umunyamabanga Nshingwabikorwa w’Umurenge wa Rutunga, avuga ko bagiye guhera ku rubyiruko rw’abanyeshuri barushishikarize kugana amasomero.

Agira ati: “Tugiye kongera ubukangurambaga mu rubyiruko, umwanya rubonye bawukoreshe rwitabira amasomero”.

Ashimangira ko n’abaturage bazakangurirwa kwitabira amasomero bijyanye n’imyuga bakora cyane cyane ubuhinzi, ubworozi ku buryo byabafasha guteza imbere uwo murimo usanzwe ubatunze.

Iribagiza Jolly, Umuyobozi ushinzwe Porogaramu mu Muryango UMUHUZA, asobanura ko bari basanzwe bafite ibikorwa by’amasomero rusange.

Asobanura ko UMUHUZA wari warashyize amasomero Atatu mu Murenge wa Rutunga ariko nyuma yo gusanga harimo icyuho cy’abantu bafite ubumuga ndetse n’ikoranabuhanga, bahisemo gutangiza umushinga bagamije kugera ku bantu bose.

Iribagiza avuga ko baje bubakira ku byari bihari. Agira ati: “Bimwe mu byo Umuryango UMUHUZA ukora, twubakira ku byari bihari. Ibyo bitabo twatanze, ni ibyiyongeraga ku mushinga wari wararangiye”.

Bifuza ko ibyo bakoze biramba kandi bikagirira umumaro abagenerwabikorwa.

Ati: “Ni yo mpamvu mwabonye habaye ihererekanyabubasha kugira ngo Umurenge wumve ko ari ibyawo. Bimwe mu byahawe Umurenge mu ihererekanyabubasha ni intebe, utubati, ameza byose byo mu isomero, mudasobwa na telefoni ibyo byose twabishyize mu biganza by’umurenge wa Rutunga kugira ngo bazabikurikirane”.

  • KAYITARE JEAN PAUL
  • Mutarama 18, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE