Gare ya Muhanga iragereranywa n’ibyuzi by’amafi

  • AKIMANA JEAN DE DIEU
  • Mutarama 3, 2024
  • Hashize amezi 5
Image

Hashize ukwezi kurenga Imvaho Nshya igaragaje impungenge z’abafite imodoka zitwara abantu ndetse n’abakorera muri Gare ya Muhanga bavuga ko yangiritse bikabije, ikangiza imodoka ntoya zabo ziyinjiramo, ku buryo igereranywa n’ibyuzi by’amafi.

Ni mu gihe icyo gihe abahagarariye inyungu z’abacunga iyi gare bemeje ko bigiye gukemuka mu byumweru 2, none batereye agati mu ryinyo, ku buryo uko iminsi ihita ari nako hakomeza kwangirika kurushaho.

Kanani Jean avuga ko bimugora kwinjiza imodoka ye ntoya afite kubera ibinogo bigenda byiyongera akavuga ko iyo imvura ihitutse wagira ngo ni ibyuzi by’amafi baba bahafukuye agasaba ko inzego bireba zikwiye kubihagurukira.

Ati: “Njyewe ntwara imodoka ariko imodoka ntoya yanjye ntabwo nshobora kuyinjizamo kubera ko irangirika nkajya mu i garaji buri munsi kandi namwe nimurebe imvura iyo ihise wagira ngo ni ibyuzi by’amafi ariko turasaba ko inzego bireba zabyinjiramo hagakorwa”.

Ntirikure Pie avuga ko iki kigo cyakira imodoka nyinshi ziva mu Ntara no mu Turere tw’Intara y’Amajyepfo gikwiye gukorwa neza kugira ngo cyorohereze abahakoresha.

Yagize ati: “Iyi Gare ntabwo ikwiye gusa gutya yagombye kubakwa neza kuko hano haca imodoka nyinshi ziva mu Turere twa Huye, Nyanza, Ruhango n’ahandi zose zica muri iyi Gare byerekana ko ikwiye gukorwa neza kuko hakorwa nabi hakangirika cyane kubera umubare w’Imodoka zihakoresha cyane”.

Mujawimana Suzan avuga ko kuba hadakorwa biterwa nuko Ubuyobozi bw’Akarere bumeze nk’ubuhunga iki kibazo bunazi kuko nta munsi numwe wakwira butahanyuze akemeza ko uko babwiye abacuruzi gupfundikira ruhurura zo ku muhanda bakwiye kwibutsa abareberera Gare ya Muhanga na bo gukora inshingano zabo bagasana ahangiritse.

Ati: “Njyewe mbona ubuyobozi bwacu bw’Akarere bukwiye kuba bwarabibonye bugasaba aba bacunga iyi Gare bakahakora kandi nta munsi n’umwe batahanyura kandi baherutse kubwira abakorera muri uyu mujyi gupfundikira imiyoboro y’amazi banagombaga gusaba aba na bo bagakora ahangiritse”.

Umuyobozi w’Akarere ka Muhanga wungirije ushinzwe iterambere ry’Ubukungu,Bizimana Eric avuga ko iki kibazo bakibonye bagiye kwegera abacunga iriya gare basabwe gukosora ibigaragara ko bibangamiye urujya n’uruza rw’abakoresha iki kigo gitegerwamo imodoka zijya mu bice byinshi by’Igihugu.

Yagize ati: “Iki kibazo twarakibonye kandi natwe twifuza ko cyabonerwa igisubizo ariko tugiye kwibutsa ubuyobozi bw’iyi Gare kugira ngo bakosore aha hangiritse bityo byorohereze urujya n’uruza ku bantu n’imodoka zihakoresha zijya mu bice bitandukanye by’Igihugu hagamijwe gukuraho impungenge zigaragazwa n’abahakoresha.

Umuyobozi wa Jali Real Estate ltd, Nsengiyumva Benoit avuga ko mu kwezi kwa 10 umwaka wa 2023 bari babitekerejeho ko bagiye gusana ahangiritse ariko baje kubona ko bakwiye gusana ikibuga cyose cya Gare ya Muhanga ndetse inyigo yarakozwe hasigaye gahunda yo kuhakora kandi bazahakora muri uku kwezi kwa Mutarama 2024.

Akomeza avuga ko mu gihe cyo kuhakora bizagenda neza imodoka zizaba zifata abagenzi muri Gare bakabifatanya no kuhasana nta muntu ubangamiwe.

Gare y’Akarere ka Muhanga yavuguruwe ahagana muri 2016 ndetse itangira gukorerwamo ahagana muri Gicurasi 2018 ikaba yarubatswe ku bufatanye na Jali Holding company Limited n’Akarere ka Muhanga katangiye gafite 15%, byajemo ibibazo Akarere gasigarana 6% bahujwe n’Ubuyobozi bw’Intara y’Amajyepfo n’Ikigo gishinzwe guteza imbere amakoperative mu Rwanda (RCA).

  • AKIMANA JEAN DE DIEU
  • Mutarama 3, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE