Frank Gashumba yiyamye abamusaba intwererano y’ubukwe

Umuherwe akaba n’umusesenguzi wa politiki wo muri Uganda Frank Gashumba, yiyamye amatsinda ya Whatsap akoreshwa n’abafite ubukwe bitwerereza aniyama abamuhamagara bya hato na hato rimwe na rimwe mu masaha akuze bamusaba intwererano.

Uyu mugabo uherutse gusaba no gukwa Patience Mutoni ari nabyo ashingiraho abasaba kumuha agahenge ngo kuko na we ntawe yitwererejeho.

Yifashishije imbuga nkoranyambaga ze Frank Gashumba yagaragaje ko bidakwiye kandi bakwiye kumuha agahenge akita ku mugeni we.

Yanditse ati: “Mureke kumpamagara nijoro. Mfite umugeni ngomba kwitaho. Nta mpamvu n’imwe yagombye gutuma umpamagara nyuma ya saa moya z’umugoroba.”

Muri ubwo butumwa Gashumba yakomeje avuga ko uretse igihe habaye ikibazo cyihutirwa, atazongera kwakira cyangwa gusubiza ubutumwa bw’ijoro, kuko arimo kwita ku buzima bushya bw’urugo, anihanangiriza amatsinda ya WhatsApp asabirwamo inkunga z’ubukwe (Intwererano).

Ati: “Mureke kudushyira mu matsinda ya WhatsApp y’ubukwe. Njyewe narashyingiwe sinigeze nsaba inkunga n’imwe. Niba ubukwe utabushoboye, wihubuka ubukora. Gushaka ni igikorwa gikomeye, ntikigomba kuba umutwaro ku bandi.”

Uretse kuba Gashumba atumva neza ibijyanye no kwitwerereza ku muntu ugiye gukora ubukwe yagiye yumvikana mu biganiro byinshi avuga ko gushaka umugore ari ukwishyira mu bubata kandi ko nta mugore wamuhindurira ibitekerezo ibyatumye abantu bibaza ku mpinduka ze zagejeje ku gusaba akanakwa Patience Mutoni.

Frank Gashumba na Mutoni Patience bamaze amezi agera muri abiri babana nk’umugore n’umugabo kuko bakoze ubukwe tariki 15 Gicurasi 2025.