Champions League: Amakipe ane yageze muri 1/8

  • Imvaho Nshya
  • Ugushyingo 9, 2023
  • Hashize amezi 7
Image

Bayern Munich, Real Madrid, Real Sociedad na Inter Milan zageze muri 1/8 cya UEFA Champions League, Manchester United itsindwa na FC Copenhagen ibitego 4-3 bituma ishobora gusezererwa itarenze amatsinda.

Iyi mikino y’Umunsi wa kane w’Amatsinda y’iri rushanwa rihuza ayabaye aya mbere iwayo ku Mugabane w’u Burayi UEFA CHAMPIONS LEAGUE, yabaye kuri uyu mugoroba tariki 8 Ugushyingo 2023.

Ikipe ya Manchetser United yo mu Bwongereza yatangiye neza umukino itsinda ibitego bibiri byatsinzwe na Rasmus Højlund ku munota wa gatatu n’uwa 28, ariko ikarita itukura yahawe Marcus Rashford wakiniye nabi Elias Jelert ku munota wa 42, yahinduye umukino.

Mohamed Elyounoussi na Diogo Gonçalves bishyuriye Copenhagen mu minota 13 y’inyongera mu gice cya mbere amakipe yombi yasoje igice cya mbere anganya ibitego 2-2

Mu gice cya kabiri cy’umukino Manchester United yongeye kuyobora umukino kuri penaliti yatsinzwe na Bruno Fernandes ku munota wa 69, mu minota icumi ya nyuma y’umukino FC Copenhagen yabonye ibitego bibiri byatsinzwe na Lerager na Bardghji ku munota wa 83 n’uwa 87, bituma itsinda Manchetser United 4-3.

Kugeza ku munsi wa kane, ikipe ya Manchester United itozwa na Erik ten Hag iri ku mwanya wa nyuma mu Itsinda A n’amanota atatu, isigaje gusura Galatasaray no kwakira Bayern Munich.

Muri iri tsinda A Bayern Munich yo yamaze kubona itike ya 1/8 nyuma yo gutsinda Galatasaray 2-1 byatsinzwe na Harry Kane, igira amanota 12 kuri 12 mu gihe andi makipe abiri ayikurikiye afite amanota ane.

Mu Itsinda B, Arsenal yagize amanota icyenda ifata umwanya wa mbere nyuma yo gutsinda Seville ibitego 2-0 byatsinzwe na Leandro Trossard na Bukayo Saka ku munota wa 29 n’uwa 64, mu gihe PSV Eindhoven yanganyije amanota atanu na Lens nyuma yo kuyitsinda igitego 1-0.

Real Madrid yageze muri 1/8 nyuma yo gutsinda SC Braga ibitego 3-0 byatsizwe na Brahim Díaz, Vinícius Júnior na Rodrygo, iyobora Itsinda C n’amanota 12 kuri 12, ikurikiwe na Napoli yagize amanota arindwi nyuma yo kunganya igitego 1-1 na Union Berlin yasezerewe kuko ifite inota rimwe.

Andi makipe abiri yakomeje ni ayo mu Itsinda D aho Real Sociedad yagize amanota 10 nyuma yo gutsinda Benfica ibitego 3-1, iyanganya na Inter Milan yatsindiye FC Salzburg iwayo igitego 1-0 cyatsinzwe na Lautaro Martínez kuri penaliti.

Ku wa Kabiri, Manchester City na RB Leipzig ni zo zari zabonye itike ya 1/8, bivuze ko kuri ubu hamaze gukomeza amakipe atandatu mu gihe andi 10 azamenyekana ubwo iri rushanwa rizaba ryakomeje tariki ya 28-29 Ugushyingo n’iya 12-13 Ukuboza 2023.

SHEMA IVAN

  • Imvaho Nshya
  • Ugushyingo 9, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE