CECAFA Kagame Cup: APR FC yatsinze Mlandege FC biyongerera amahirwe yo kugera muri ½

APR FC yatsinze Mlandege FC muri Zanzibar ibitego 2-0 mu mukino wa kabiri wo mu itsinda B, biyongerera amahirwe yo gukina ½ muri CECAFA Kagame Cup ikomeje kubera muri Tanzania.

Uyu mukino wabereye kuri Major General Isamuhyo Stadium kuri uyu wa Gatandatu tariki ya 6 Nzeri 2025.

Umutoza wa APR FC, Abderrahim Taleb, yari yakoze impinduka imwe mu bakinnyi babanje mu kibuga  ugeranyije n’umukino wa mbere wa Bumamuru FC, aho Ngabonziza Pacifique yasimbuye Djribril Ouattara.

Amakipe yombi yatangiye umupira ukinirwa cyane mu kibuga hagati, nta kipe n’imwe irema uburyo bukomeye bwo gutsinda igitego.

Ku munota wa 31, APR FC yafunguye amazamu ku gitego cyatsinzwe na Memel Dao ku mupira mwiza yahawe na Hakim Kiwanuka.

Ku munota wa 35, William Togui wa APR FC yakorewe ikosa mu rubuga rw’amahina ku ikosa ku mupira yari ahawe na Gilbert Byiringiro Umusifuzi yemeza ko ari Penaliti.

Iyi Penaliti yahushijwe na William Togui wateye umupira ukurwamo n’umunyezamu wa Mlandege FC.

Ku munota wa 38, abakinnyi ba Mlandege FC bazamukanye usanga Abed Ama asigaranye n’izamu wenyine gusa Dauda aratabara awushyira muri koruneri itagize icyo itanga.

Igice cya mbere cyarangiye APR FC yatsinze Mlandege FC igitego 1-0.

Ikipe y’ingabo z’Igihugu yakomeje gusatira mu gice cya kabiri bidatsinze ku munota 48, William Togui yatsinze igitego cya kabiri ku mupira mwiza yahawe na Hakim Kiwanuka.

APRFC yarushaga cyane Mlandege FC ku munota wa 60, William Togui yazamukanye umupira ku ruhande rw’ibumoso, awugeza mu rubuga rw’amahina, usanga Memel Dao awuteye uca gato hirya y’izamu rye.

Umukino warangiye APR FC yatsinze Mlandege FC muri Zanzibar, ibitego 2-0 biyongerera amahirwe yo gukina 1/2 cy’iri rushanwa.

Iyi kipe yo muri Zanzibar yahise isezererwa nyuma yo gutsindwa imikino ibiri yikurikiranya.

Hakim Kiwanuka wa APR FC ni we watowe nk’umukinnyi mwiza w’umukino ahabwa ibihumbi 500 by’amashilingi ya Tanzania

Undi mukino wabaye mbere muri iri tsinda Bumamuru FC yo Burundi yatsinzwe na KMC yo Tanzania igitego 1-0 isezererwa muri iri rushanwa.

Kugeza ubu APR FC ni yo iyoboye itsinda n’amanota 6 n’ibitego bine izigamye ikurikiwe na KMC nayo ifite amanota 6 n’ibitego bibiri izigamye.

Ikipe y’ingabo z’Igihugu izagaruka mu kibuga ku wa Mbere, tariki ya 8 Nzeri 2025 ikina na KMC yo muri Tanzania kuri KMC Stadium.

Abakinnyi babanje mu kibuga ku mpande zombi

APR FC

Ruhamyankiko Ivan, Gilbert Byiringiro, Nshimiyimana Yunusu, Niyigena Clement, Bugingo Hakim, Pacifique Ngabonziza, Dauda Seidu, Dao Memel, Ruboneka Bosco, Hakim Kiwanuka na William Togui.

Mlandege

Alex Gidion, Abed Ama, Omar Ramadhan Issa, Raphael Futakamba, Mussa Hassan, Aimar Hafidh, Hamis M’sa, Berry Iziegbuwa, Davi Nascimento, Japhet Manga na Enzo Claude.