Cambodia yashimye imiyoborere irangajwe imbere na Perezida Kagame 

  • NTAWITONDA JEAN CLAUDE
  • Werurwe 17, 2024
  • Hashize ukwezi 1
Image

Say Chhum, Umukuru w’Umusigire w’Ubwami bwa Cambodia, yashimye imiyoborere ntangarugero y’u Rwanda mu myaka 24 ishize irangajwe imbere na Perezida wa Repubulika Paul Kagame.

Say Chhum yabigarutseho muri iki cyumweru nyuma yo kwakira inyandiko zemerera Ambasaderi Nkubito Manzi Bakuramutsa guhagararira u Rwanda muri Cambodia.

Muri uwo muhango wabereye mu Ngoro ya Sena ya Cambodia, Say Chhum yanagarutse ku iterambere rihebuje ryagezweho muri iyo myaka kubera imiyoborere myiza. 

Perezida Kagame yabaye Umukuru w’Igihugu guhera mu mwaka wa 2000 nyuma y’imyaka mike yari ishize ayoboye urugamba rwo kubohora u Rwanda no guhagarika Jenoside yakorewe Abatutsi mu 1994.

Igihugu cyari cyarabaye umusaka, ubukungu bwari munsi ya zero ndetse n’icyizere cyo kubaho cyari hasi cyane. 

Nyuma y’imyaka 30 ishize u Rwanda ruvuye muri Jenoside yakorewe Abatutsi, ruri mu bihugu bifite ubukungu bwihuta ku Isi aho icyizere cyo kubaho ku muturage cyavuye ku myaka iri munsi ya 30 kikagera ku myaka hafi 70.

Abikuye ku mutima, Say Chhum yakomeje yifuriza Abanyarwanda kurushaho kugwiza uburumbuke n’amahoro. 

Nanone kandi, yemeje ko Cambodia yiteguye gukorana bya hafi n’u Rwanda mu kurushaho kwimakaza umubano wa gishuti n’ubutwererane hagati y’ibihugu byombi. 

Ambasaderi Bakuramutsa na we yamushyikirije intashyo za Perezida Kagame n’Abanyarwanda bose, kandi yemeza ko na we atazahwema gukomeza kubagarira umubano wa gishuti urangwa hagati ya Cambodia n’u Rwanda. 

Ambasaderi Bakuramutsa yiyemeje kandi gukorana bya hafi na Guverinoma ya Cambodia mu kurushaho kunoza ubutwererane no kongerera imbaraga ubufatanye mu guteza imbere ubucuruzi n’ubutwererane bushingiye ku muco mu nyungu z’abaturage b’ibihugu byombi. 

Mu ruzinduko rwe mu Bwami bwa Cambodia, Ambasaderi bakuramutsa yasuye abayobozi batandukanye muri Guverinoma, barimo Minisitiri w’Intebe wungirije akaba na Minisitiri w’Ububanyi n’Amahanga n’Ubutwererane Mpuzamahanga, SOK Chenda Sophae. 

Ibiganiro bagiranye byabaye amahirwe yo gusuzuma imiterere y’umubano ukomeye ibihugu byombi bisanzwe bifitanye ndetse banaboneraho kugaragaza igenamigambi rihamye rizanyura mu itangizwa ry’ibiganiro bigamije kuzamura ubufatanye n’ubutwererane bw’ibihugu byombi. 

Nanone kandi, Ambasaderi Nkubito yahuye na Guverineri wa Banki Nkuru ya Cambodia Dr. CHEA Serey, basuzumira hamwe ubufatanye iyo banki ifitanye na Banki Nkuru y’u Rwanda (BNR).

Nanone kandi, yanagiranye ibiganiro na Minisitiri w’Intebe wungirije akaba n’Umuyobozi wungirije w’Inama Nkuru ishinzwe Iterambere rya Cambodia (CDC) Chanthol SUN, harebwa ku mahirwe y’ubufatanye ari hagati y’icyo kigo n’Urwego rw’u Rwanda rushinzwe Iterambere (RDB) mu birebana n’ishoramari. 

Yanagiranye ibiganiro n’Umunyamabanga wa Leta muri Minisiteri y’Ubucuruzi Tekreth Kamrang, ndetse n’Umuyobozi Mukuru w’Ishami ry’Abikorera rishinzwe Ubucuruzi. 

Ambasaderi Bakuramutsa kandi yanahuye n’Abanyarwanda baba mu Bwami bwa Cambodia yongera kubahamiriza ukwiyemeza k’u Rwanda ku gukurikirana no gukorana bya hafi n’Abanyarwanda baba mu mahanga, ndetse anabagezaho amakuru mashya kuri gahunda y’amatora ya Perezida wa Repubulika n’ay’Abadepite ategerejwe muri Nyakanga.  

  • NTAWITONDA JEAN CLAUDE
  • Werurwe 17, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE