Byinshi ku kigo cy’icyitegererezo kizahangana n’indwara zandura byihuse mu Rwanda

  • ZIGAMA THEONESTE
  • Gashyantare 20, 2024
  • Hashize amezi 2
Image

Minisiteri y’Ubuzima mu Rwanda yatangaje ko mu Rwanda harimo kubakwa Ikigo cy’indashyikirwa cyahariwe ubuvuzi bw’indwara zandura cyane (Masaka Medical Hub) kirimo kubakwa ku Bitaro bya Masaka mu Karere ka Kicukiro mu Mujyi wa Kigali.

Uretse kwita ku barwayi banduye, ni ikigo cyitezweho kuzahangana n’indwara zandura harindwa abakozi bo kwa muganga ko bazandura mu gihe barimo kuvura abarwayi.

Biteganyijwe ko kizaba cyuzuye mu mpera z’uyu mwaka wa 2024.

Minisiteri y’Ubuzima n’ubuyobozi bw’Ikigo cy’Igihugu cy’Ubuzima (RBC),  babibwiye Abasenateri bagize Komisiyo y’Imibereho myiza n’Uburenganzira bwa Muntu, ubwo harebwaga imbaraga zirimo gushyirwa mu gukumira no gusuzuma indwara z’ibyorezo.

Dr Rwagasore Edson, Umuyobozi w’Ishami rishinzwe kurwanya indwara z’ibyorezo muri RBC, yatangaje ko ibikorwa byo kubaka icyo kigo bigeze kure.

Ati: “Ibikorwa byo kubaka ikigo cy’icyitegererezo cyo guhangana n’indwara ziterwa na virusi zandura byihuse, igiye kugera ku musozo aho biteganyijwe ko gutangaza kucyubaka ku mugaragaro bizaba muri Werurwe uyu mwaka kikazuzura neza mu mpera z’uyu mwaka wa 2024.”

Uwo Muyobozi kandi yanagaragaje ko ingengo y’imari  yo kubaka icyo kigo ari miliyoni 5 z’Amayero, ni ukuvuga miliyari 6,8 z’amafaranga y’u Rwanda.

Minisitiri w’Ubuzima Dr. Nsanzimana Sabin, yavuze ko uwo mushinga wo kubaka ikigo kigezweho wateguwe na Guverinoma y’u Rwanda ifatanyije n’iy’u

Yabwiye Abasenateri ko igihugu gikeneye ikigo kigezweho nk’icyo, aho abarwayi barwaye izo ndwara zikunze kwandura cyane bazajya basuzumirwa ndetse n’abaganga babitaho bakazaba bafite uburyo bw’ikoranabuhanga bubarinda ko izo ndwara na bo bashobora kuzandura mu gihe barimo kuvura.

Dr. Rwagasore yatangaje ko icyo kigo cy’icyitegererezo  kizajya gitanga serivisi zitandukanye, aho hazaba hari ahantu hihariye hagenewe gushyira umurwayi ari wenyine kugira ngo atanduza abandi (Isolation), ahagenewe isuzumiro, ahagenewe gutanga amahugurwa ku baganga bo mu Karere k’Afurika y’Iburasirazuba kubera ko icyo kigo cy’icyitegererezo ari cyo kizaba kiri muri aka Karere cyonyine.

Ati: “Icyo kigo kizaha umwanya mwiza abaganga wo gusuzuma izi ndwara zandura byihuse kandi bo badashobora kwandura.”

Rwagasore yavuze ko muri icyo kigo ari ho hazaba hashobora gusuzuma indwara zandura byihuse zirimo Ebola, Marburg n’izindi.

Izo ndwara zandura byihuse zagaragaye mu bihugu bituranye n’u Rwanda birimo Repubulika Iharanira Demokarasi ya Congo, Uganda na Tanzania.

Dr. Rwagasore yagaragaje ko mu rwego rwo gukumira ikintu icyo ari cyo cyose cyatuma indwara ikwirakwira, hazubakwa ibikorwa remezo byo ku rwego ruhambaye, bifite ikoranabuhanga rigezweho rizajya ririnda ibihakikije gukwirakwiramo virusi kuko umwuka wose usohoka mu cyumba umurwayi arimo utazaba ushobora kujya hanze.

Ni ikigo cy’icyitegererezo mu buvuzi kizaba gifite ibitanda 10 bigezweho by’abarwayi, aho Dr. Rwagasore avuga ko ibyo bitanda bizongerwa mu rwego rwo kwita ku barwayi benshi.

Ni mu gihe mu Karere ka Bugesera na ho hari ikigo  cy’icyitegererezo (Nyamata Emerging Infectious Diseases [EID] Center) cyita ku barwayi bafite indwara zandura byihuse kizunganirwa n’iki cya Masaka.

Ku kigo cya Bugesera hari ibitanda 100 by’abarwayi, inzego z’ubuzima mu Rwanda zihamya ko kubaka iki kigo cy’icyitegererezo cya Nyamata ari umwanya mwiza wo gutanga amahugurwa ku baganga kugira ngo  batange serivisi zinoze.

  • ZIGAMA THEONESTE
  • Gashyantare 20, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE