Burera: Akarere kagurishije Agakiriro urubyiruko rubura aho rukorera

  • NGABOYABAHIZI PROTAIS
  • Gashyantare 9, 2024
  • Hashize ibyumweru 2
Image

Nyuma y’aho Akarere ka Burera kagurishije rwiyemezamirimo Agakiriro ka Rugarama, urubyiruko rurinubira ko rutakibona aho rukorera ngo rushyire mu ngiro imyuga rwize.

Urwo rubyiruko ruvuga ko uwo rwiyemezamirimo akimara kwegukana ako gakiriro yagahinduyemo uruganda rw’imyenda.

Ni mu gihe urubyiruko rwiga imyuga muri Burera rukomeje kwiyongera, harimo urwiga mu mashuri y’imyuga n’ubumenyi ngiro akabakaba 20 abarizwa muri kano Karere.

Ndahimana Faustin wo mu Murenge wa Kagogo, yabanje gushimira Perezida wa Repubulika Paul Kagame wari wabubakiye ako Gakiriro mu Murenge wa Rugarama.

Yagize ati: “Twari twatangiye gukoreramo nyuma y’aho twumva ngo Akarere kakagurishije rwiyemezamirimo akagura burundu. Tuvamo twarize imyuga turangara ubu, twabuze aho dukorera ku buryo bamwe bahitamo kujya mu tundi Turere twifuza  kubona agakiriro.”

Nsengiyumva Martin we avuga ko kuba barabambuye Agakiriro ka Rugarama, ari na wo Murenge avukamo, byabadindije cyane ndetse bamwe bakaba barahisemo gukorera mu kajagari.

Yagize ati: “Ubundi aka gakiriro kari kaje kuturuhura ingendo zo muri Uganda tujya kwigira yo imyuga ndetse no kujya gushaka yo akazi. Ariko kuri ubu Akarere ka Burera kakagurishije rwiyemezamirimo ashyiramo uruganda rw’imyenda ubwo abasore babaza inzugi n’ibindi bikoresho, abacuzi, abasudira ibyuma n’abandi twarangajwe turashwiragira.

Akomeza avuga ko ababazwa no kuba mu Karere kabo amashuri y’imyuga akomeza kwiyongera ariko ahakabaye hafasha urubyiruko kwimenyereza imyuga no gushyira mu ngiro ibyo bize hakaba hatagihari.

Yemeza ko hari bamwe mu rubyiruko bahisemo kongera kujya za Kisoro muri Uganda gukorera yo ububaji n’ubusuderi, ibintu ngo bibateza igihombo.

Vice Meya Nshimiyimana Jean Baptiste yemeza ko Akarere nta Gakiriro gasigaranye

Yagize ati: “Nzi bamwe muri bagenzi banjye bigiriye i Kisoro nyuma y’aho aka Gakiriro ka Rugarama rwiyemezamirimo akaguze. Ubu hari n’abandi bakorera za Kigali, Musanze n’ahandi nyamara Perezuda wacu yifuza ko iterambere ridusanga aho turi, Akarere ka Burera nigafate iki kibazo nk’igikomereye urubyiruko n’abandi banyabukorikori bo muri Burera.”

Umuyobozi w’Akarere ka Burera wungirije ushinzwe iterambere ry’ubukungu Nshimiyimana  Jean Baptiste, yemeza ko kugeza ubu nta gakiriro urubyiruko rufite muri kano Karere.

Avuga ko bagiye gukorana na Minisiteri y’Ubucuruzi n’Inganda, kuri ubu ngo bakaba barimo gushaka ubutaka  bw’ahazajya icyanya cy’inganda mu Murenge wa Rugarama, ndetse n’ingengo y’imari.

Yagize ati: “Ikibazo cy’Agakiriro ku rubyiruko rwo muri Burera kirazwi kandi karakenewe, gahunda yo kwigisha imyuga na yo irakomeje binyuze muri za TVET cyane ko zigera kuri 19. Agakiriro gakenewe cyane haba mu kwimenyereza imyuga, kuri ubu ni uko gahunda yo kubaka Agakiriro kazubakwa mu Murenge wa Rugarama mu minsi iri imbere.”

Ubwo yari mu nama y’Umushyikirano wabaye muri uyu mwaka 2024, Minisitiri w’Ubucuruzi n’inganda Dr. Ngabitsinze Jean Chrisostome, kuri iki kibazo cy’agakiriro ka Burera, yavuze ko bagiye gukorana n’ikigo NEP harebwe uko igisubizio cyaboneka.

Yagize ati: “Hari urubyiruko ruvuga ko rukeneye kwiga imyuga ariko bakaba badafite aho babikorera tugiye kugikoraho dufatanije na NEP (National Employment Program) duhuriramo turi inzego zitandukanye ku buryo muri Burera n’aho twahabona Agakiriro urubyiruko n’abandi banyabukorikori babe bakoreramo.”

Muri Burera habarurwa ibigo 19 byigisha imyuga inyuranye, abagera kuri 966 bakaba bararangije muri iyi gahunda bakaba ari bo bifuza ko babona agakiriro kugira ngo babone aho bakorera bisanzuye.

Agakiriro konyine kabonekaga muri kano Karere  kakegurirwa rwiyemezamirimo, kahurirwagamo n’urubyiruko rwa Rugarama, Gahunga, Cyanika na Kagogo, none ubu bose basubiye mu bubaji bukoresha iranda mu ngo zabo abandi basuhukira mu gihugu cy’abaturanyi cya Uganda.

Ako Gakiriro kagihari, abagakoreragamo bishimiraga ko kabahaye amahirwe menshi harimo gukoresha imashini zigezweho zibaha umusaruro wihuse ndetse n’imirimo ikarushaho kwiyongera.

Urubyiruko ruvuga ko rubangamiwe no kuba Agakiriro kari gahari kagurishijwe bagasigara amaramasa
  • NGABOYABAHIZI PROTAIS
  • Gashyantare 9, 2024
  • Hashize ibyumweru 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE