Burera: Abafungiwe ubwiherero bw’isoko baryitumamo iyo bugorobye

  • NGABOYABAHIZI PROTAIS
  • Gashyantare 23, 2024
  • Hashize amezi 2
Image

Abarema Isoko rya Gahunga riherereye mu Murenge wa Gahunga, Akarere ka Burera, batewe inkeke n’umwanda wabazengurutse ukagera no mu isoko hagati nyuma y’aho ubwiherero bakoreshaga bufunzwe, abanywera inzoga mu tubare turikikije bakaba baryitumamo iyo bwije, abantu batashye.

Iryo soko rihurirwaho n’abaturutse mu Turere twa Musanze na Burera, n’abava mu gihugu cya Uganda, nta bwiherero rigira ndetse riremura kare kubera ko nta mashanyarazi rigira.

Ibyo ngo bituma abarigana biherera mu nsina z’abaturage bo hafi aho, bwagoroba abanywera inzoga mu tubari turikikije bakaza kuryihereramo.

Mugabonake Elizaphan, umwe mu bakorera muri iryo soko wahashinze iseta yo gusudira ibikoresho bya pulasitike, yavuze ko yahisemo gushinga iseta imbere y’ubwiherero kubera ko butagikoreshwa.

Yagize ati: “Iri soko nta bwiherero rigira hashize igihe; abayobozi barabizi ko twiherera muri izi nsina z’abaturiye iri soko, abandi iyo udafite igiceri cy’ijana ntiwakwituma. Njye rero maze kubona ko ibyobo byakira umwanda uva mu bwiherero byuzuye bakabifunga, nahisemo kujya nkorera hano. Rwose kutagira ubwiherero muri iri soko bidukururira umwanda n’amakimbirane n’abaturage ba hano”.

Mukandayisenga Marita we avuga ko kutagira ubwiherero muri iri soko rya Gahunga bikurura umwanda mu isoko no mu bicuruzwa byabo.

Yagize ati: “Ntiwakwibeshya ngo uratandika hano, nka twe ubona ko dutandika ku mahema, ngo wizere isuku. Abanywera muri izi kabari iyo bamaze guhaga inzoga baraza bakahiherera mu kabwibwi bakituma hano hose mu isoko, bakagenda borosaho agataka ku buryo hano hose tubyuka dukubura tuyora umwanda.

Abatandika hasi mu isoko rya Gahunga, binubira umwanda basangamo mu gitondo

Yasabye ubuyobozi bw’Akarere kuhakorera isuku kuko umuturage urembejwe n’umwanda no gusora neza ntibyamworohera.

Umwe mu bagabo Imvaho Nshya yasanze mu kabari wanze ko amazina ye atangazwa,  yagize ati: “Sinakubeshya uretse no kuba iri soko bavuga ko nta bwiherero rigira, n’abacuruzi bo hanze y’isoko usanga badapfa gukingura ubwiherero kuko akenshi na bwo buba bwanduye cyane burimo umwanda.”

Yakomeje agira ati: “Nkatwe tunywera hano kubera ko iri soko uko urireba nta mashanyarazi rinagira, usanga abagore n’abagabo hano bikinze inyuma y’ibisima, bamwe bituma abandi bihagarika. Mbese iri soko mbona rizadukururira indwara ziterwa n’umwanda.”

Umuyobozi w’Akarere ka Burera wungirije ushinzwe imibereho myiza y’Abaturage Mwanangu Theophile, yemeza ko kiriya kibazo cy’ubwiherero bwa Gahunga, kizwi ariko ngo mu rwego rwo kugikemura bari bararihaye rwiyemezamirimo wahawe inshingano zo kwita ku isuku.

Yavuze ko niba bigeze kuri urwo rwego bagiye kuhasura ndetse bagafata ingamba zihutirwa.

Yagize ati: “Kuri ubu isoko rya Gahunga ni rimwe mu masoko ashaje, turimo kureba uburyo ryavugururwa n’ubwo bwiherero bukubakwa mu buryo butanga igisubizo kirambye. Ibijyanye n’amashanyarazi turabizi ko abagizi ba nabi bagenda biba amatara tugiye gukaza amarondo. Ikindi abacururiza muri iryo soko bakwiye kugira ubwiherero aho bakorera, kandi uzafatwa yongeye kwituma mu isoko azahanwa by’intangarugero.”

Iri soko rirema inshuro ebyiri mu cyumweru, rikaba  rihurirwamo n’abaturage basaga 1500 ku munsi.

Ni isoko ricururizwamo ibiribwa, imyambaro, amatungo magufi n’ibindi. Kuba nta bwiherero rigira biteye inkeke abarirema kuko bishobora kubakururira indwara z’ibyorezo ziterwa n’umwanda.

  • NGABOYABAHIZI PROTAIS
  • Gashyantare 23, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE