BAL 2025: APR BBC yisanze mu itsinda rimwe na Al Ahli Tripoli

APR BBC ihagarariye u Rwanda mu Irushanwa Nyafurika rya Basketball (Basketball Africa League/BAL) yisanze mu itsinda rimwe na Al Ahli Tripoli yo muri Libya mu mikino y’amajonjora ya BAL 2025 ateganyijwe tariki 17 kugeza 25 Gicurasi 2025, i Kigali muri BK Arena.

Iri rushanwa rigiye kuba ku nshuro ya gatanu hazakinwa imikino 48 ibere mu mijyi ine ariyo Pretoria (Afurika y’Epfo), Rabat ( Morocc), Dakar (Senegal) na Kigali mu Rwanda.

Iri tsinda ryiswe ‘Nile Conference’, aya makipe arihuriyemo na Nairobi City Thunder (Kenya) na Made by Basketball yo muri Afurika y’Epfo.

Ni ku nshuro ya kabiri APR BBC igiye gukina iri rushanwa, mu mwaka ushize yasezerewe mu matsinda i Dakar muri Senegal.

Irindi tsinda ryiswe’ Kalahari Conference rizakinwa i Rabat muri Maroc tariki ya 5 kugeza ya 13 Mata 2025 rigizwe na Al Ittihad yo mu Misiri, Fus Rabat (Morocco), Stade Malien (Mali), Rivers Hoppers (Nigeria).

Ni mu gihe 𝗦𝗮𝗵𝗮𝗿𝗮 𝗖𝗼𝗻𝗳𝗲𝗿𝗲𝗻𝗰𝗲’ izakinirwa i Dakar muri Senegal, tariki 26 Mata kugeza tariki ya 4 Gicurasi 2025, rigizwe na ASC Ville de Dakar (Senegal), Kriol Star Basketball (Cape verde) na US Monastir (Tunisia).

Amakipe abiri ya mbere muri buri tsinda uko ari ane ni yo azakomeza mu mikino ya ¼ yose akaba atandatu.

Kugira ngo yuzure umunani agomba kubona itike y’imikino ya nyuma, amakipe yabaye aya gatatu muri buri tsinda azakina hagati yayo, haboneke abiri yuzuza umunani azahurira i Pretoria muri Afurika y’Epfo mu mikino ya kamarampaka n’iya nyuma kuva tariki 6 Kamena kugeza ku ya 14 Kamena 2025.