BAL 2022: Zamalek, Petro de Luanda, Cape Town Tigers  na FAP zakomeje muri ¼

  • NTAWITONDA JEAN CLAUDE
  • Mata 20, 2022
  • Hashize imyaka 2
Image

Kuva taliki 09 kugeza 19 Mata 2022 i Cairo mu Misiri muri Hassan Mostafa Indoor Sports Complex habereye  imikino y’amajonjora  mu itsinda rya kabiri “Nile Conference” muri BAL 2022.

Nyuma y’iyi mikino y’amajonjora, ikipe ya Zamalek yo mu Misiri ifite igikombe giheruka, Petro de Luanda (Angola), Cape Town Tigers (Afurika y’Epfo) na FAP (Cameroun) zabonye itike ya ¼ cy’irangiza.

Iyi mikino yahuje amakipe 6 ari yo Zamalek (Misiri), BC Espoir Fukash (RDC), Cape Town Tigers (South Africa), Cobra SC (South Sudan), FAP (Cameroun)  na Petro de Luanda (Angola).

Ikipe ya Zamalek yasoje iyoboye itsinda aho yitwaye neza itsinda imikino yayo yose uko ari 5. Iyi kipe yatsinze Cobra SC amanota 80 kuri 63, itsinda Cape Town Tigers amanota 101 kuri 77, itsinda Petro de Luanda amanota 85 kuri 72, itsinda BC Espoir Fukash amanota 101 kuri 92 inatsinda FAP amanota 77 kuri 63.

Ku mwanya wa kabiri hasoreje ikipe ya Petro de Luanda yatsinze imikino 4 muri 5. Iyi kipe yitwaye neza itsinda Cape Town Tigers amanota 90 kuri 61, itsinda Cobra SC amanota 92 kuri 56, itsinda FAP amanota 73 kuri 60 inatsinda BC Espoir Fukash amanota 94 kuri 64. Ikipe ya Petro de Luanda umukino umwe yawutsinzwe na Zamalek.

Carlos Morais ukinira Petro de Luanda

Ikipe ya Cape Town Tigers yitabiriye ku nshuro ya mbere BAL yasoreje ku mwanya wa 3 inabona itike ya ¼  nyuma yo gutsinda imikino 2 muri 5. Iyi kipe yatsinze FAP amanota 73 kuri 70 inatsinda Cobra SC amanota 83 kuri 79. Indi mikino 3, Cape Town Tigers yatsinzwe na Zamalek, Petro de Luanda na BC Espoir Fukash.

Myck Kabongo, ukinira Cape Town Tigers

Ku mwanya wa 4 hari FAP yo muri Cameroun yari yitabiriye n’imikino ya BAL iheruka ari na bwo yabaga ku nshuro ya mbere umwaka ushize wa 2021. Iyi kipe yatsinze imikino 2 muri 5. Yatsinze BC Espoir Fukash amanota 77 kuri 60 inatsinda Cobra SC amanota 71 kuri 64. Iyi kipe yatsinzwe imikino itatu harimo uwa Zamalek, Petro de Luanda na Cape Town Tigers.

Cedric Kenfack (FAP) ahanganye na Arsene Mwamba (BC Espoir Fukash)

Ku mwanya wa 5 hasoreje ikipe ya Cobra SC yo muri South Sudan yari yitabiriye BAL bwa mbere. Iyi kipe yatsinze umukino umwe wa BC Espoir Fukash ku manota 108 kuri 82.

Ku mwanya wa 6 hasoreje BC Espoir Fukash yo muri RDC na yo yari yitabiriye BAL ku nshuro ya mbere. Iyi kipe yatsinze umukino umwe gusa  wa  Cape Town Tigers ku manota 96 kuri 92.

Aya makipe 4 yakomeje muri ¼ akaba azahura n’andi makipe 4 arimo REG BBC (Rwanda), US Monastir (Tunisia), AS Salé (Maroc) na SLAC (Guinea) yabonye itike ya ¼ cy’irangiza nyuma yo kwitwara neza mu imikino y’amajonjora yo mu itsinda rya mbere “Sahara Conference” yabeye  i Dakar muri Senegal kuva taliki 05 kugeza 15 Werurwe 2022.

Imikino ya nyuma izabera muri Kigali Arena

Biteganyijwe ko imikino ya ¼, ½, umukino wo guhatagira umwanya wa 3 n’umukino wa nyuma izabera muri Kigali Arena kuva taliki 21 kugeza 28 Gicurasi 2022.

Muri ¼, ikipe ya REG BBC yo mu Rwanda izakina na FAP  yo muri Cameroun naho  Petro de Luanda yo muri Angola ikine na AS Salé  yo muri Maroc. Imikino izaba taliki 21 Gicurasi 2021.

Taliki 22 Gicurasi 2022, ikipe ya Zamalek yo mu Misiri izakina na SLAC  yo muri Guinea naho US Monastir yo muri Tunisia ikine na Cape Town Tigers yo muri Afurika y’Epfo.

Imikino ya ½ biteganyijwe ko izaba taliki 25 Gicurasi 2022 aho ikipe izatsinda hagati ya REG BBC na FAP izahura n’izatsinda hagati  ya Petro de Luanda na AS Salé   naho izatsinda hagati ya Zamalek na SLAC   ihure n’izakomeza hagati ya US Monastir na Cape Town Tigers.

Umukino wo guhatanira umwanya wa gatatu uzahuza amakipe atabashije kugera ku mukino wa nyuma taliki 27 Gicurasi 2022 naho umukino wa nyuma wo guhatanira igikombe ube taliki 28 Gicurasi 2022.

Ubwo iri rushanwa riheruka muri 2021 ari nabwo ryakinwaga ku nshuro ya mbere, ikipe ya Zamalek ni yo yegukanye igikombe itsinze ku mukino wa nyuma ikipe ya US Monastir amanota 76 kuri 63. Ikipe yari ihagarariye u Rwanda, Patriots BBC yasoreje ku mwanya wa 4 nyuma yo gutsindwa na Petro de Luanda  amanota 97 kuri 68.

  • NTAWITONDA JEAN CLAUDE
  • Mata 20, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE