AU yasabwe gushishikariza ibihugu koherereza u Rwanda abakoze Jenoside babyihishemo

  • ZIGAMA THEONESTE
  • Werurwe 2, 2024
  • Hashize amezi 2
Image

Abasenateri mu Nteko Ishinga Amategeko y’u Rwanda basabye Guverinoma y’u Rwanda gusaba Umuryango wa Afurika Yunze Ubumwe gushyiramo imbaraga zidasanzwe mu gukukirirana no kohereza abashijwa kugira uruhare mu Jenoside yakorewe Abatutsi mu 1994, bakihishahisha ku mugabane w’Afurika.

Byagarutsweho ku wa Gatanu tariki ya 1 Werurwe ubwo Komisiyo y’Ububanyi n’Amahanga, Ubutwererane n’Umutekano muri Sena yunguranaga ibitekerezo na Minisitiri w’Ubutabera akaba n’Intumwa Nkuru ya Leta, Dr Ugirashebuja Emmanuel ku ngingo ijyanye no kohererezanya abakurikiranyweho ibyaha hagati y’u Rwanda n’ibindi bihugu.

Dr Ugirashebuja yabwiye Abasenateri ko Guverinoma zimwe z’Ibihugu by’Afurika zidafite ubushake bwa Politiki bwo guta muri yombi abakurikiranyweho gukora Jenoside bacyidegembya muri ibyo bihugu, bityo bigatuma badafatwa ngo bashyikirizwe inkiko.

Kuva mu 1994, Leta y’u Rwanda yohereje mu bihugu bitandukanye, dosiye 1 149 zo guta muri yombi abakurikiranyweho ibyaha bya Jenoside bakihishahisha.

Icyakora kuva icyo gihe 59 ni bo bamaze gufatwa bavanwa mu bihugu by’amahanga bahungiyemo boherezwa mu Rwanda.

Mu madosiye 1 090 agikurikiranwa y’abashinjwa kugira uruhare muri Jenoside yakorewe Abatutsi mu 1994, agera kuri 962 ni ay’abantu bakekwaho gukora Jenoside bihishe ku mugabane w’Afurika.

Abo benshi biganje mu bihugu bituranye n’u Rwanda harimo 408 bikekwa ko bari muri Repubulika Iharanira Demokarasi ya Congo, 278 bari muri Uganda.

Hari abari kandi muri Malawi bikekwa ko icumbikiye 63, Tanzania 52, Congo Brazaville 42, Kenya 35 ndetse n’u Burundi bikekwa ko bicumbikiye 16.

Nibura abagera ku 10 bikekwa ko bari mu bindi bihugu  10 by’Afurika birimo Afurika y’Epfo, Zimbabwe, Cameroon n’ibindi.

Minisitiri w’Ubutabera Dr Ugirashebuja Emmanuel

Senateri Havugimana Emmanuel yavuze ko Umuryango w’Afurika Yunze Ubumwe (AU) ukwiye kongera imbaraga za Politiki, mu gusaba Leta z’Ibihugu kuburanisha abakoze Jenoside babihungiyemo cyangwa se bakoherezwa mu Rwanda rukababuranisha.

Ati: “Ni ibintu bibabaza, kumva ko umuntu yishe abavandimwe be akaba akomeje kwidegembya mu bihugu duturanye.”

Yongeyeho ati: “Iyo urebye umubare munini [Abakekwaho gukora Jenoside] bari muri Repubulika Iharanira Demokarasi ya Congo,  bari muri Uganda, Burundi na Tanzania, uribaza icyo bisaba ngo hajyeho ubushake bwa Politiki muri ibyo bihugu maze bacire imanza abo banyabyaha, niba badashoboye kubohereza.

Hakenewe imbaraga z’Umuryango w’Afurika Yunze Ubumwe (AU), ikabigira ibyayo ndetse igashishikariza Leta z’Ibihugu kuzirikana ko icyaha cya Jenoside yakorewe Abatutsi ari icyaha kidasanzwe kandi ko abagikoze bose bagomba guhanwa mu kwerekana ko kitihanganirwa kuri uyu mugabane.”

Mu bihe bya vuba, u Rwanda rwasinyanye amasezerano n’ibindi bihugu 13 yo kohererezanya abanyabyaha, byinshi muri byo bihugu ni ibyo ku mugabane w’Afurika

Minisitiri Dr Ugirashebuja yatangaje ko ikibabaje ari uko mu bihugu bimwe na bimwe bareba inyungu zabo mu gihe batanga ubutabera.

Ati: “Kubura ubushake bwa Politiki biracyari imbogamizi ikomeye ijyanye no kohereza abanyabyaha no kubaburanisha bakaryozwa urahare rwabo muri Jenoside.”

Yongeyeho ati: “Dushyigikiye ko nk’uko indi Miryango Mpuzamahanga u Rwanda rurimo ibikora, na AU igomba kugaragaza uruhare rwayo mu gushishikariza ibihugu kuburanisha cyangwa koherereza u Rwanda abakekwaho gukora Jenoside yakorewe Abatutsi mu 1994 aho bakiri hose.”

Yavuze kandi ko u Rwanda ari kimwe mu bihugu 32 muri Gashyantare 2024 byasinye amasezerano yo kohererezanya abanyabyaha.

Yizeye ko ibihugu byinshi bigiye kongera ubushake mu koroshya kohereza mu Rwanda abakurikinyweho Jenoside yakorewe Abatutsi mu 1994, hashingiwe kuri ayo masezerano agamije ubufatanye mu gukora iperereza no kugeza mu butabera abakoze Jenoside, ibyaha byibasiye inyoko muntu, ibyaha by’intambara ndetse n’ibyambukiranya imipaka.

U Rwanda kandi rwasinye amasezerano y’ubufatanye bw’ibihugu bitandukanye mu kohererezanya abanyabyaha yasinyiwe i London mu Bwongereza  n’i Harare muri Zimbabwe.

Dr Ugirashebuja yavuze ko bidasaba ko u Rwanda rwongera gusinyana amasezerano n’ibyo bihugu kimwe ku kindi kugira byo byemere kohereza abakurikiranyweho  gukora Jenoside yakorewe Abatutsi.

Yatanze urugero rw’ibihugu nka Canada, Leta Zunze Ubumwe z’Amerika byamaze kohereza mu Rwanda ababifatiwemo bakurikiranyweho Jenoside.

Abasenateri bavuze ko bagiye kongera imikoranire na bagenzi babo bagize Inteko Ishinga Amategeko mu bindi bihugu kugira ngo byoroshye gahunda yo kohereza abakekwaho Jenoside yakorewe Abatutsi bakomeje kwihishahisha.

Umuyobozi wa Komisiyo y’Ububanyi n’Amahanga, Ubutwererane n’Umutekano muri Sena y’u Rwanda Senateri Murangwa Hadijaz,  yagize ati: “Twamaze kubona ko hari ibihugu bigiseta ibirenge mu kuba byakohereza cyangwa byaburanisha abakekwaho gukora Jenoside bari ku butaka bwabyo”.

“Iki ni ikibazo gikomeye kandi kitureba. Ubwo bigikomeje, twe nk’abagize Inteko Ishinga Amategeko y’u Rwanda, turashaka gukora dipolomasi inyuze mu Nteko mu kugaragariza bagenzi bacu bo mu bindi bihugu ko iki ari ikibazo gikomeye cyane. Mu gihe bazaba bamaze kumva icyo kibazo, bazaharanira ko na bo batanga umusanzu wabo mu gushishikariza Leta z’Ibihugu byabo kuzirikana amasezerano basinye ndetse n’abanyabyaha benshi bazafatwa.”

Senateri Murangwa yanasabye Abanyarwanda baba mu bihugu byo hanze, aho abo bakekwaho gukora Jenoside bihishe, gutanga amakuru mu gihe hari ayo bamenye kuri abo banyabyaha kuko ashobora gufasha ubutabera.

Ati: “Abakekwaho gukora Jenoside bakoresha uburyo bwose bushoboka kugira bihishe ubutabera, harimo guhindura imyirondoro yabo, bagenda bimuka aho batuye, ibyo bigatuma kubakurikirana bigorana. Ariko buri Munyarwanda  aho ari hose ku Isi, atanze amakuru afite kuri abo bantu n’aho baherereye n’ibyo bakora byatuma  benshi batabwa muri yombi, bakaburanishwa.”

Visi Perezida wa Sena Nyirasafari Esperance
  • ZIGAMA THEONESTE
  • Werurwe 2, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE