Amatora 2024: Menya uwemerewe gutora n’utabyemerewe mu Rwanda

  • ZIGAMA THEONESTE
  • Werurwe 5, 2024
  • Hashize ukwezi 1
Image

Muri uyu mwaka wa 2024, u Rwanda rurimo kwitegura amatora aho Abanyarwanda bazaba bafite uburenganzira busesuye bwo kwitorera Perezida wa Repubulika na 53 bagize Inteko Inshinga Amategeko, umutwe w’Abadepite.

Abakandida Depite n’abakandida Perezida bazaba batanzwe n’imitwe ya Politiki cyangwa abakandida bigenga, bazatorwa tariki ya 14 Nyakanga ku Banyarwanda baba mu mahanga na tariki 15 ku baba mu gihugu imbere.

Imyiteguro yayo matora irarimbanyije, mu bikorwa biteganyijwe harimo gutanga no kwakira kandidatire ku bazahatana mu matora, ibikorwa byo kwiyamamaza, kwikosoza ku malisiti y’itora byo birimo gukorwa hakiri kare kugira ngo amatora azabe byose biri ku murongo.

Kwiyandikisha ku ilisiti y’itora bifasha umuturage guhabwa uburenganzira bwo gutora.

Kwemererwa gutora

Hashingiye ku mategeko n’amabwiriza agenga amatora mu Rwanda, umuntu wemerewe gutora n’uri kuri lisiti y’itora yo ku Mudugudu atuyemo cyangwa muri Ambasade y’u Rwanda mu Gihugu atuyemo.

Komisiyo y’Igihugu y’amatora (NEC) itangaza ko umuntu wemerewe gutora ari Umunyarwanda w’Imyaka 18 y’amavuko cyangwa uzaba yayujuje ku munsi w’itora ndetse atuye mu Mudugudu yibarurijemo cyangwa se atuye ahantu hose Ambadasade y’u Rwanda iri cyangwa ifitiye ububasha bwo kugenzura.

Gutora kandi umuntu abyemererwa nyuma yo kumureba niba ari ku ilisiti y’itora hanyuma akagaragaza ikarita Ndangamuntu cyangwa se ikindi cyemezo kimuranga gitangwa n’inzego zibifitiye ububasha, cyemeza ko ari Umunyarwanda.

Utemerewe gutora

Hari abantu badafite uburenganzira bwo gutora kubera ko bafite imiziro yo kwandikwa kuri lisiti y’itora.

Hagendewe ku mategeko n’amabwiriza agenga amatora, abantu batemerewe kwandikwa kuri Lisiti y’Itora ni abantu bose bambuwe n’inkiko ububasha bwo gutora kandi bakaba batarabusubijwe ,abahamwe n’ibyaha by’ubwicanyi n’ubuhotozi kandi bakaba batarahawe imbabazi zibahanaguraho ubwo busembwa n’inzego zibifitiye ububasha, abantu bahamwe n’ibyaha bya Jenoside n’ibyaha byibasiye inyokomuntu.

Hari kandi n’abandi itegeko ritemerera kwiyandikasha ku ilisti y’itora byagateganyo.

Abo barimo abantu bafunzwe bategereje kuburana, abantu bafunze bategereje kurangiza igihano n’umuntu uhungabanye ituze ry’abantu baje kwiyandikije ku ilisiti y’itora.

NEC ivuga ko umuntu ushaka guhungabanya ituze bigaragaye amenyekanishwa mu nyandiko bigakorwa n’inzego zibifite ububasha.

  • ZIGAMA THEONESTE
  • Werurwe 5, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE