Amatora 2024: Aho imitwe ya Politiki igeze yitegura

  • ZIGAMA THEONESTE
  • Werurwe 4, 2024
  • Hashize amezi 2
Image

Mu gihe amatora ya 2024 ya  Perezida n’ay’Abadepite abura amezi makeya imitwe ya Politiki na yo ikomeje kwitegura.

Kugeza ubu usibye Ishyaka Riharanira Demokarasi no Kurengera Ibidukikije (Democatic Green Party of Rwanda ) ryagaragaje uzarihagararira mu matora ya Perezida, andi mashyaka akomeje ibikorwa byo guhitamo uzayahagararira muri ayo matora.

Umuvugizi w’Ihuriro ry’Imitwe ya Politiki yemewe mu Rwanda, Hon. Nizeyimana Pie yabwiye itangazamakuru ko ibikorwa byo kwitegura amatora birimbanyije, aho kuri ubu barimo guhugura abarwanashyaka, kubongerera ubumenyi kuri aya matora ndetse bakanaganira ku bakandida bazabahagararira.

Yagize ati: “Ubu ngubu nk’ihuriro turimo mu mahugurwa mu mashyaka atandukanye. Twahuguye abagore, tunabashishikariza kwitabira amatora mu nzego z’ubuyobozi.”

Yongeyeho ati: “Ubu tumaze gukora ayo mahugurwa mu Ntara y’Amajyepfo n’iy’Iburengerazuba, ubu rero dukomereje mu Ntara y’Amajyepfo, guhugura abashinzwe imyitwarire mu mashyaka.”

Uwo Muyobozi ashimangira ho hashize imyaka myinshi abaturage bitabira amatora bityo bakaba bamaze gusobanukirwa icyo gutora ari cyo.

Ati: “Abaturage bamaze gusobanura uko bitorera abayobozi babo. Ndatekereza ko tumaze gutera imbere nk’Abanyarwanda, ubu bafite ubushobozi buhagije bwo gutora abayobozi bihitiyemo kandi bazakomezanya na bo  mu iterambere”.

Ni bwo bwa mbere mu mateka y’u Rwanda amatora ya Perezida n’aya Abadepite  agiye kubera  icyarimwe.

Muri ayo matora rusange hazatorwa Abadepite 53. Inteko Ishinga Amategeko umutwe w’Abadepite igomba kugira Abadepite 80.

Abadepite 27 basigaye bahagarariye ibyiciro bitandukanye by’abagore, urubyiruko n’abantu bafite ubumuga, 24 b’abagore  batorwa n’inzego z’Ubuyobozi zibyemererwa n’amategeko, 2 bagatorwa n’Inama y’Igihugu y’Urubyiruko mu gihe Umudepite umwe atorwa n’Inama y’Igihugu y’Abantu bafite ubumuga.

Imyanya 24 y’abagore batowe, bagabanywa mu Ntara n’Umujyi wa Kigali  hashingiwe ku bwinshi bw’abaturage bazituye. 

Intara y’Amajyaruguru igira Abadepite 4, iy’Amajyepfo iy’Iburasirazuba n’Iy’Iburengerazuba zikagira imyana 6 buri imwe, mu gihe Umujyi wa Kigali uhagararirwa n’Abadepite 2.

Komisiyo y’Igihugu y’Amatora (NEC) yatangaje ko guhera tariki ya 13 kugeza ku ya 30 Gicurasi 2024, ari bwo izatangira kwakira kandidatire z’abakandida ku mwanya wa Perezida n’Abadepite.

Biteganyijwe ko abakandida ntakuka bemewe bazatangazwa tariki ya 14 Kamena 2024.

Mu gihe amatora azaba tariki ya 15 Nyakanga 2024, NEC yatangaje ko ibyavuye mu matora by’agateganyo bizatangazwa tariki ya 20 Nyakanga 2024.

Amajwi  n’abatowe mu buryo budasubirwaho bikazatangazwa tariki ya 27 Nyakanga 2024.

  • ZIGAMA THEONESTE
  • Werurwe 4, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE