Amasoko 80% yo kwandikisha ibitabo ajyanwa hanze y’u Rwanda

  • ZIGAMA THEONESTE
  • Werurwe 24, 2024
  • Hashize ibyumweru 4
Image

Inzego zikurikiranira hafi ibijyanye no kwandika no gusohora ibitabo ziravuga ko abakorera muri uru rwego badafitanye imikoranire ihamye na za Banki ngo zibatere inkunga, bigatuma ubushobozi buba buke aho usanga amasoko agera kuri 80% yo kwandikisha ibitabo ajyanwa hanze y’u Rwanda.

Mu biganiro biheruka guhuza bamwe mu bandika bakanasohora ibitabo, Urwego rw’Igihugu rushinzwe guteza imbere uburezi bw’Ibanze (REB) ndetse n’ibigo by’imari bitandukanye, hagarutswe ku mbogamizi yo kubura ubushobozi buhagije kandi ubwo bushobozi buturuka mu bigo by’imari.

Ibyo biganiro byateguwe n’Umuryango USAID Ibitabo kuri Twese, byibanze ku buryo isoko ryo gukora ibitabo mu Rwanda ryadindiye kubera kubura amafaranga yo kubikora aturaka mu bigo by’imari n’amabanki.

Senzeyi Aime Yedidya, Umuyobozi Mukuru wa USAID Ibitabo kuri Twese Umuryango utari uwa Leta wimakaza umuco wo gusoma, avuga kugeza ubu mu Rwanda hari ikibazo cy’uko abikorera bakora mu kwandika no gusohora ibitabo batarahuza na banki mu kwagura isoko ryo gusohora ibitabo.

Ati: “Abakora muri ayo masoko (gukora ibitabo) ntabwo bafite imikoranire na za banki. Iyo tuvuze imikoranire ni ukubitsa amafaranga, iyo batabikora rero nta cyizere banki zibagirira. Ariko hari na banki zidasobanukirwa neza iri soko ry’ibitabo, babifata nk’ibintu bishya nyamara ni ibintu bimaze imyaka myinshi.”

Yongeyeho ati: “Tujya tubona mu nzego z’ubuhinzi ibikorwa bigamije ubukungu ariko ibijyanye no gukora ibitabo kugeza ubungubu ntabyo”.

Uwo muyobozi avuga ko kandi abashaka gutanga amasoko mu gihugu mu gihe batanze isoko bakabura kompanyi yujuje ibisabwa bihagije, ba nyir’ugutanga isoko bahitamo kurijyana hanze y’igihugu.

Ahamya ko kwandikishiriza ibitabo hanze y’Igihugu bituma biza bihenze bityo bikadindiza umuco wo gusoma kuko benshi batabona ubushobozi bwo kubigura.

Ati: “Hagati ya 70 na 80 % by’amasoko y’ibitabo ajyanwa hanze y’Igihugu, ni ukuvaga ngo ni amafaranga ajyanwa hanze. Ni ikibazo, kuko iyo wakoreye igitabo hanze cyinjira mu gihugu cyahenze kikagurishwa gihenze, mbese abantu benshi ntabwo babona ubushobozi bwo kukigura, bigatuma rero umubyeyi ubona nk’amafaranga ibihumbi 5 ku munsi, kuvuga ngo afashe amafaranga ibihumbi 3 agiye kugurira umwana igitabo ari ikibazo. Ubwo rero umuco wo gusoma na wo ukomeza kuba uri hasi.”

Theo Gakire Ntarugera, umwanditsi w’Ibitabo, ati: “Mu mashuri harimo ibikoresho bifasha abarimu kwigisha bikiri bike cyane kandi ubushobozi mu Rwanda burahari bwo kubikora, ariko ibibura ni uko abantu bagomba gukorera hamwe kugira ngo abatanga ayo mafaranga yo gutera inkunga gukora ibitabo, ari Guverinoma cyangwa imiryango itari iya Leta,  bagakorana na banki  n’abikorera kugira icyo kibazo gikemuke.”

Yasabye abahagarariye ibigo bya Leta n’iby’abikorera jya bamenyesha abakora ibitabo hakiri kare mu gihe bakeneye ibitabo kugira ngo bitegure kuko ibikoresho byinshi bitumizwa hanze bityo mu gihe bahawe isoko bitinze ntibabone ibyo gukoresha ibitabo.

Ati: “Ibikoresho byinshi bitumizwa mu Asia cyangwa se mu Bushinwa bikahagera nko mu mezi atatu, rero mu igenamigambi ni ho bipfira, ariko n’ibigo by’imari na byo nibyizere Abanyarwanda ko na bo bashoboye.”

Nkurunziza Pascal, Umuyobozi  Ushinzwe Imishinga (Program Manager) muri Equity Bank Rwanda, avuga ko banki zimwe zitizera abakora ibitabo kubera ko badatanga amakuru ahagije ku mishanga yabo ku buryo Banki yayiheraho ibizera.

Ati: “Kugeza uyu munsi ni bake mu Banyarwanda ushobora kubaza amakuru ajyanye no gucapa ibitabo ,ese biragurishwa?, Abanyarwanda bagura ibitabo bangana bate? Isoko ry’ibitabo rihagaze rite? Ayo makuru yose iyo utayafite ujya gutera umushinga inkunga uzi ikizawuvamo”.

Yongeyeho ati: “Ese ukora ibitabo abasha kubigaragaza, agaragaza ukuri kurimo cyangwa yegera ibigo by’imari gusa mu gihe aje kwaka inguzanyo?Zimwe mu mbongamize ibigo by’imari tugira ni uko aza kwegera Banki mu gihe akeneye amafaranga gusa, nyarama yakagombye kuba yaregereye banki mbere akayereka umushinga we”.

Urwego rw’Igihugu rushinzwe Uburezi bw’Ibanze (REB) rwasabye banki n’ibigo by’imari gushyira hamwe bakanoza imikoranire n’abakora ibitabo babaterana inkunga y’amafaranga,  kugira ngo mu gihe hatanzwe amasoko mu gihugu, babashe kuyapinira nta mbogamizi bikagabanya kujya kwandikishiriza ibitabo hanze y’Igihugu.

  • ZIGAMA THEONESTE
  • Werurwe 24, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE