Afghanistan: Umutingito umaze guhitana abasaga 2 000

  • Imvaho Nshya
  • Ukwakira 8, 2023
  • Hashize amezi 8
Image

Umutingito ukaze wibasiye uburengerazuba bwa Afghanistan tariki ya 7 Ukwakira, imibare iheruka gusohoka mu ma saa sita yo kuri iki Cyumweru itangaza ko abantu barenga 2000 bapfuye ndetse ukanangiza byinshi. Abantu barenga 9.200 bakomeretse kandi inzu zigera ku 1 300 zangiritse izindi zirasenyuka. Ibikorwa byo gutabara bikomeje gushakisha abarokotse mu matongo y’imidugudu yibasiwe.

Umutingito ufite ubukana bwa 6.3, ukurikirwa n’imitingito umunani ikomeye, ni umwe mu yahitanye benshi muri iki gihugu mu myaka makumyabiri. Kuri iki cyumweru, umwe mu bavugizi ba Guverinoma yavuze ko abantu barenga 2.050 bapfiriye mu midugudu 13, abantu 9.240 bakomeretse kandi ko itsinda ry’abatabazi ryageze aho byabereye.

Umunyamakuru wa Radiyo Mpuzamahanga y’Abafaransa uri muri ako gace, Sonia Ghezali, avuga ko abantu bakomeje kugwa mu matongo mu midugudu yibasiwe cyane. Hashobora kuba hari imidugudu myinshi yangiritse. Abayobozi b’abatalibani batangaje kuri iki cyumweru mu gitondo ko abarusimbutse bakeneye byihutirwa ibiryo, amazi, imiti n’amahema.

Umukozi ushinzwe ubuzima muri Hérat yavuze ko abarimo gukomeza kuboneka mu matongo barenga 200 bajyanywe mu bitaro byo muri ako karere.

Mu midugudu y’akarere yibasiwe cyane, Zendeh Jan, akaba ari naho umutingito watangiriye, ku bilometero 40 uvuye mu mujyi wa Hérat, inzu amagana zarasenyutse.

Uwahoze ari umukozi w’Umuryango utegamiye kuri Leta wo muri ako gace, yavuze ko iyo yari imidugudu ikennye cyane, aho abaturage batunzwe no guhinga inzabibu. Imidugudu yibasiwe cyane n’amapfa imyaka myinshi muri ako gace ka Afghanistan.

Ubuhamya bwatanzwe na bamwe mu bagezweho n’umutingito

Mu mujyi wa Hérat, umurwa mukuru w’intara n’umuco uherereye mu bilometero bike uvuye ku mupaka na Irani, abaturage basobanura ubwoba batewe kuri uyu wa Gatandatu n’umutingito ubwo watigisaga Isi inshuro nyinshi. Telefone ntizakoraga bituma bigorana kubona amakuru ajyanye n’ibice byibasiwe cyane.

Amashusho yashyizwe ku mbuga nkoranyambaga yerekana abantu babarirwa mu magana mu mihanda yo mu mujyi, imbere y’ingo zabo cyangwa ibiro byabo. Muri ayo mashusho, habonekamo inyubako zasenyutse, abantu bashakisha mu matongo ababa barokotse ndetse n’imirambo ikiri munsi y’ibyasenyutse.

Fariba atangaza ko yaraye hanze nyuma yo kubona inkuta z’inzu ye zinyeganyega kandi bigafata iminota myinshi. We n’umuryango we ntibagezweho n’ingaruka z’umutingito cyane kuko inzu yabo ntiyaguye, uretse icyumba kimwe gusa cyangiritse.

Yagize ati: “Mu byukuri, mu gihe umutingito wa mbere wabaga, ntabwo nari mu rugo, nari ku isoko kandi ntawo numvaga rwose. Ariko nabonye abantu barira, bumiwe. Ababyeyi bagerageje gushaka abana babo babuze, nibaza impamvu abantu bitwaye gutya.

Ariko igihe habaye umutingito wa kabiri, twari mu rugo, njye n’umuryango wanjye, twikanze cyane. Twatinyaga ko inzu yacu idusenyukiraho, twihutira gusohoka, tuguma imbere y’inzu yacu. Abaturanyi bose bararira. Nta magambo mfite yo kuvuga ibyabye”.

Ali Reza, umunyeshuri ukiri muto, yari kuri kaminuza igihe umutingito wabaga ku nshuro ya mbere, mu igorofa rya gatatu ry’ikigo. Abahegereye bakwirakwiye imihanda banasakuza. Ageze mu rugo, yasanze inzu ye ntacyo yabaye ariko iy’abaturanyi be yari yaguye, barara hanze, batinya ko imitingito myinshi yasubira.

NYIRANEZA JUDITH

  • Imvaho Nshya
  • Ukwakira 8, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE