Abiga imyuga muri IPRC Kigali TSS bizeye guhangana ku isoko ry’umurimo

  • KAMALIZA AGNES
  • Mutarama 25, 2024
  • Hashize amezi 4
Image

Abiga amashuri y’imyuga n’ubumenyi ngiro bavuga ko imyuga bize izabafasha guhangana ku isoko ry’umurimo binyuze mu guhanga udushya no gushyira mu bikorwa ibyo bize.

Ni bimwe mu byatangajwe n’abanyeshuri biga mu ishuri ryisumbuye ry’imyuga n’ubumenyingiro muri IPRC Kigali TSS kuri uyu wa 24 Mutarama 2024, ubwo bari mu munsi murikabikorwa w’imyuga n’ubumenyingiro muri IPRC Kigali wari ufite insanganyamatsiko igira iti: “Gira Umwuga Ushobore Ejo”.

Aba banyeshuri biga imyuga itandukanye bavuga ko mbere bajyaga bumva bavuga ko amashuri y’imyuga n’ubumenyingiro ari ay’abaswa ariko kuri ubu atari ko biri kuko bo bari guhanga udushya binyuze mu myuga kugira ngo bazabashe guhangana ku isoko ry’umurimo.

Bavuga ko ibyo biga bizafasha koroshya imwe mu mirimo yakorwaga hifashijwe imbaraga za muntu kuko bazajya bakoresha ikoranabuhanga nk’amamashini bityo byihutishe akazi.

Nkunda Allain Jean Gentil wiga ikoranabuhanga ryo mu nganda mu mwaka wa gatanu, avuga ko yishimiye kugaragaza ibikorwa yakoze kandi bizamufasha kwihangira umurimo.

Ati: “Dufite udushya twinshi kuko twebwe tuzi uburyo ibyuma bikoreshwa mu mabuye y’agaciro bikorwa kandi tuzi uburyo twabihinduramo ibindi bintu byinshi birimo nk’imashini ikora amatafari. Kandi imashini dukora zikora ibintu byinshi kandi nta mbaraga nyinshi bitwaye ugereranyije n’izisanzwe.”

Shema Brando Lasac wiga ibijyanye na tekinoroji ikoreshwa mu nganda ati: “Mu byo twiga habamo ibintu byinshi ku buryo nidusoza tutazabura ibyo dukora; wenda ushobora kuburira hamwe, ariko ukabonera ahandi kuko harimo udushya hanze aha tutaragahagera nko gukoresha imashini zihariye zikora amapave n’ibindi.”

Ishimwe Nelly wiga amashanyarazi nawe ati: “Hari abantu bavuga ko abiga imyuga ari abaswa badashoboye ariko sibyo kuko ibintu twiga tunabishyira mu bikorwa bisaba kwiga cyane kugira ngo ubishobore, rero ibyo twiga bifite byinshi bizafasha haba mu gukoreshwa mu nganda kandi bazabikora kinyamwuga.”

Bavuga ko kugeza ubu bagifite imbogamizi z’ibikoresho bidahagije ku buryo babikoresha uko babyifuza bakaboneraho no gusaba ko bongererwa amasaha bashyira mu ngiro ibyo biga ku buryo bigera kuri buri wese.

Bati: “Hari ibikoresho biba bitaboneka ndetse n’imashini zabonewe ibikoresho ni nke ugereranyije n’uko tubyifuza kugira ngo dukore imishinga yacu dufite mu bitekerezo. Biba bigoranye bitewe n’ibikoresho biba bidahari, n’ibibonetse ugasanga tubikoresheje uko biri tubisaranganya. Ikindi amasaha yo kujya gukora ibyo tuba twize si menshi cyane bibaye byiza akiyongera byadufasha kurushaho.”

Niragire Olivier, Umuyobozi w’agateganyo w’Ishuri Ryisumbuye ry’Imyuga rya IPRC Kigali TSS, yavuze ko ku bufatanye n’Ikigo cy’Igihugu Gishinzwe guteza Imbere Imyuga n’Ubumenyingiro (Rwanda TVET Board/RTB) ibikoresho bizagrenda biboneka buhoro buhoro.

Yavuze ko bakoresha amasaha 25 bashyira mu ngiro ibyo bize, ati: “Mu masaha 45 biga, byibuze 25 muri yo bayafata bashyira mu ngiro ibyo biga. Rero bitewe n’uko dusimburana bitewe n’ahantu dukorera bamwe bakora mu byiciro bitandukanye ku buryo uyu munsi abona uko akoresha ibyo bikoresho, ariko hamwe n’igihe bizagenda bikemuka bibe byiza kurushaho.”

Niragire yongeyeho ko umwana waciye mu ishuri akiga imyuga n’ubumenyingiro aba atandukanye n’utarigeze abyiga kuko we aba afite umwihariko w’ubunyangamugayo no gusobanurira uwo akorera ibyangiritse nta kinyoma akoresheje.

IPRC Kigali TSS kugeza ubu ifite abanyeshuri 694, kikaba ari ikigo gifite amashami arindwi arimo amashanyarazi, ubwubatsi bw’amazu n’ibindi.

  • KAMALIZA AGNES
  • Mutarama 25, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE