Abaturiye Pariki y’Igihugu y’Ibirunga bategereje kwimurwa baraheba

  • NGABOYABAHIZI PROTAIS
  • Gashyantare 4, 2024
  • Hashize amezi 4
Image

Abaturiye ahazagurirwa Pariki y’Igihugu y’Ibirunga bamaze imyaka itatu bari mu gihirahiro cyo kitagira aho babariza ingurane bemerewe mu gihe hari n’ibikorwa batemerewe gukorera ku butaka bwateguriwe kwagurirwaho iyo Pariki.

Binubira ko nyuma y’aho bamenyesherejwe ko hari gahunda yo kwagura iyi pariki hashize imyaka itatu nta gikorwa bemerewe gukorera mu masambu yabo, bikaba biri mu bibadindiza mu iterambere.

Abaturage bafite iki kibazo ni abo mu Turere twa Burera, Musanze na Nyabihu, baturiye umukandara wa Pariki bavuga ko kugeza ubu batazi icyo bakora ngo babe batuye batuje, kuko kugeza ubu bumva bameze nk’abacumbitse.

Nsabiyeze Elizaphan, Umwe mu baturage bo mu Murenge wa Kinigi, Akarere ka Musanze, yavuze ko atewe impungenge no kuba inzu igiye kumugwaho akaba adashobora kubona uburenganzira bwo kuvugurura cyangwa kubaka indi.

Yagize ati: “Kuri ubu ntabwo nshobora kuvugurura inzu yanjye kuko nta cya ngombwa nahabwa. Batwijeje ko bazatwimura muri gahunda yo kwagura Pariki y’Igihugu y’Ibirunga ndumva hashize nk’imyaka 3. Banze kutureka ngo twubake banga no kutwimura, ibintu njye mbona bizatuma duhera muri za nzu za kiramujyanye nibadukure mu gihirahiro twimuke cyangwa se duture.”

Nsabimana wo mu Murenge wa Kabatwa na we avuga ko biteye impungenge kuba umuntu afite ubutaka bwe, afite ubushobozi bwo kubaka ariko ntahabwe uburenganzira bwo kubaka.

Yagize ati: “Twabwiwe ko bazatwimura hano kugira ngo bagure Pariki y’Igihugu y’Ibirunga, ariko no gucukura umusarani usanga hano Mutwarasibo yaguhize kugeza ubwo baguca n’amande. Ubuyobozi nibudufashe dukomeze kwiteza imbere.”

Umuyobozi w’Akarere ka Nyabihu wungirije ushinzwe iterambere ry’Ubukungu Habanabakize Jean Claude, avuga ko kuba iki kibazo kitabangamiye abaturage gusa kuko n’ubuyobozi bubura uko butanga ibisobanuro kuri iki kibazo mu gihe umuturage aje abagana.

Yagize ati: “Iki kibazo buri munsi inzego zinyuranye turakibazwa ariko igisubizo twarakibuze, bariya baturage inzu zabo usanga zitameze neza. Iyo aje akugana ashaka kuvugurura cyangwa kubaka inzu atahabwa icyangombwa, kuko niba iki kibazo inzego bireba zitagikurikiranye aba baturage bazasigara inyuma mu iterambere.

RDB rero na yo yagombye guhumuriza aba baturage iki kibazo ikagiha umurongo kuko rwose ndakubwiza ukuri ntawahirahira ngo araha icyemezo cyo kubaka umuturage wo muri biriya bice.”

Ngoga Telesphole, Umukozi ushinzwe ibikorwa byo kubungabunga ibinyabuzima muri RDB, avuga ko hakiri gukorwa inyigo ijyanye no kurushaho gushyirwa mu bikorwa iyagurwa rya Pariki y’Igihugu y’ibirunga akizeza abaturage ko ibikenewe byose byamaze gutegurwa.

Yagize ati: “Uyu mushinga ni muremure ntabwo uratangira uracyanozwa; ni umushinga uzamara igihe kirekire biteganyijwe ko uzamara imyaka hagati y’irindwi n’icumi, ariko uracyanozwa. Hari inyigo zikiri gukorwa hari n’izarangiye ku buryo duteganya ko Pariki uyu mushinga umaze kunozwa izagukaho 26%”.

Aba baturage bavuga ko kudatangiza ibikorwa bikomeje kubadindiza mu iterambere kuko badashobora kubaka cyangwa ngo basane

Uyu Mukozi akomeza avuga ko hari agace k’icyitegererezo mu Murenge wa Kinigi kagizwe na hegitari 510 kazaherwaho muri uyu mwaka wa 2014, nyuma harebwe  uburyo abaturage bahatuye bakwimurwa  bahareke barebe ko hagenda hisubira.

Biteganijwe ko kwagura Pariki y’Igihugu y’Ibirunga bizakorerwa ku butaka busaga kilometerokare 37.4, ibi ngo bikazaba ari ingirakamaro mu rwego rwo kubungabunga urusobe rw’ibinyabuzima n’umubare w’ingagi zinjiriza u Rwanda amadovize ukiyongera ku kigero kiri hagati ya 5 na 20% ndetse  n’impfu z’abana b’ingagi  bikazagabanukaho 50%.

Nyuma y’iki gikorwa kandi biteganyijwe ko amafaranga ava mu bukerarugendo na yo aziyongeraho  kugeza kuri  miliyoni 34  z’amadolari y’Amerika mu mwaka wa 2024.

Ikindi ni uko imibereho y’Abanyarwanda batuye mu nkengero za Pariki y’Igihugu y’Ibirunga bagizwe n’imiryango ibihumbi 18, na yo izahinduka binyuze mu ishoramari mu miturire igezweho ndetse no mu gutanga ubumenyi.

Umushinga wo kwagura Pariki y’Igihugu y’Ibirunga witezweho kumara imyaka 10 ukazarangira ushizwemo miliyoni 299 z’amadolari y’Amerika, asaga miliyari 382 z’amafaranga y’u Rwanda.

Ubuyobozi bw’Urwego rw’Igihugu rw’Iterambere (RDB) buratangaza ko umushinga wo kwagura Pariki y’Igihugu y’Ibirunga igiye kwagurwa ku kigero cya 26%, aho igiye kuva ku buso bungana na kilometekare 160 yari ifite uyu munsi ikagera kuri kilometero kare 197.4.

Iyi Pariki ibonekamo ingagi zo mu misozi yemejwe bwa mbere mu mwaka wa 1925. Muri icyo gihe yari agace gato kari hagati y’Ibirunga bya Kalisimbi, Bisoke na Mikeno, ikaba ari na yo  Pariki y’Igihugu yashinzwe bwa mbere muri Afurika.

  • NGABOYABAHIZI PROTAIS
  • Gashyantare 4, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE