Abasenateri bo muri Libya bazaza kwigira ku Rwanda 

  • NTAWITONDA JEAN CLAUDE
  • Gashyantare 21, 2024
  • Hashize amezi 2
Image

Itsinda ry’Abasenateri ryaturutse mu gihugu cya Libya ritegerejwe i Kigali aho rije mu ruzinduko rw’akazi rugamije kwigira ku iterambere ry’u Rwanda nyuma y’imyaka 30 ruvuye muri Jenoside yakorewe Abatutsi mu 1994.

Ni amakuru yamenyekanye kuri uyu wa Gatatu, ubwo Ambasaderi wa Libya mu Rwanda Ibrahim Sidy Ibrahim Mattar, yakirwaga na Perezida wa Sena Dr. Kalinda François Xavier ari kumwe na ba Visi Perezida Dr. Nyirasafari Espérence ndetse na Dr. Alvera Mukabaramba. 

Mu biganiro abo bayobozi bagiranye, bashimye umubano mwiza ukomeje kurangwa hagati y’u Rwanda na Libya. 

Baboneyeho umwanya kandi wo kuganira ku nzira zinyuranye zo kurushaho kwimakaza ubutwererane bw’Inteko Zishinga Amategeko z’ibihugu byombi. 

Dr Kalina yavuze ko biteguye kwakira abo Basenateri bazaza kwigira ku Rwanda by’umwihariko ku rugendo rw’ibyagezweho mu mutekano nyuma ya Jenoside yakorewe Abatutsi. 

Yagize ati: “Hari itsinda ry’Abasenateri bo muri Libya rizaza mu ruzinduko rwo kwigira ku Rwanda, bagamije kumenya byinshi ku byagezweho mu mutekano nyuma ya Jenoside yakorewe Abatutsi mu 1994. Twiteguye kubasangiza ubunararibonye bwacu.”

Amb. Ibrahim Sidy I. Mattar yavuze ko amasomo y’u Rwanda ku gihugu cye ari ingirakamaro cyane, kubera ko ari igihamya cy’ukwihangana Libya ikeneye mu rugendo irimo rwo gukira ibikomere no guharanira ubwiyunge. 

Yagize ati: “Twaganiriye ku rugendo rw’u Rwanda rwo gukira ibikomere n’ubwiyunge nyuma ya Jenoside yakorewe Abatutsi mu 1994, kandi ni igihamya cyo kwigira gishobora cyaba ingirakamaro ku gihugu cyacu cya Libya mu guharanira gukira n’ubwiyunge bw’abaturage bacu.”

U Rwanda na Libya bisanzwe bifitanye umubano mwiza kandi ibihugu byombi byiteguye gufatanya mu nzego zinyuranye zifitiye inyungu abaturage. 

Muri Nzeri 2019, u Rwanda rwasinyanye amasezerano y’ubufatanye n’Ishami ry’Umuryango w’Abibumbye (UNHCR) ndetse n’Umuryango w’Afurika Yunze Ubumwe (AU), yo kwakira impunzi n’abashaka ubuhungiro bari baraheze muri Libya nyuma yo kunanirwa kwambuka inyanja ya Mediterranée berekeza i Burayi.

Uyu munsi u Rwanda rumaze kwakira abasaga 1500 barimo umubare munini wamaze kubona ibihugu by’amahanga bibakira. 

  • NTAWITONDA JEAN CLAUDE
  • Gashyantare 21, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE