Abarundi 100 bahungiye mu Rwanda mu myaka 9 ishize baratahuka 

  • NTAWITONDA JEAN CLAUDE
  • Gashyantare 20, 2024
  • Hashize amezi 2
Image

Kuri uyu wa Gatatu tariki ya 21 Gashyantare 2024, uraba umunsi w’amateka ku Barundi 100 bagiye gusubira mu gihugu cyababyaye nyuma y’imyaka 9 yari ishize bari mu buhungiro mu Rwanda. 

Abatahuka biganjemo abahunze umutekano muke wavutse mu mwaka wa 2015 ubwo uwari Perezida w’u Burundi Pierre Nkurunziza yashakaga kwiyamamariza kuyobora Igihugu muri manda ya gatatu.

Abataha kuri uyu wa Gatatu bariyongera ku bandi basaga 30,000 bamaze gutahuka ku bushake nyuma y’aho icyo gihugu cyongeye kugarukamo amahoro n’umutekano. 

Abatahuka barimo 78 babarizwaga mu nkambi ya Mahama iherereye mu Karere ka Kirehe, ndetse n’abandi 20 babaga mu Mujyi wa Kigali. 

Biteganyijwe ko mu gitondo ari bwo imodoka ziberekeza ku mupaka wa Nemba mu Karere ka Bugesera, baherekejwe n’abakozi b’Ishami ry’Umuryango w’Abibumbye ryita ku Mpunzi (UNHCR). 

Inkambi ya Mahama yashinzwe mu mwaka wa 2015 ubwo Abarundi bahungiraga mu Rwanda ku bwinshi kubera ibibazo byatewe n’umugambi wa kudeta wapfubye. 

Muri uwo mwaka, u Rwanda rwakiriye impunzi z’Abarundi zisaga 60,000 zatangiye kwisabira gutahuka mu mwaka wa 2020. 

Uyu munsi, iyi nkambi icumbikiye impunzi z’Abarundi zisaga 40,000 n’iz’Abanyekongo zisaga 20,000. Nanone kandi iyo nkambi icumbikiye impunzi 29 zavuye no mu bindi bihugu nka Sudani, Yemen. 

Abiteguye gusubira i Burundi bishimiye ko bagiye kongera guhura n’inshuti n’abavandimwe bamaze imyaka n’imyaka batabonana. 

Icyemezo cyabo ngo gishingiye ku makuru bakusanyije ku bibera mu Burundi, yabahamirije ko ubu igihugu cyabo ari amahoro by’umwihariko mu bice  babagamo. 

Nzeyimana Emmanuel, umwe mu batahuka, yagize ati: “Nyuma yo kuvugana n’umuntu uri iwacu, nafashe umwanzuro wo gutaha kubera ko ntekereza ko nshobora kugenda nkabaho mu mahoro.”

Ku rundi ruhande ariko, haracyari impunzi zivuga ko zitarizera umutekano w’iwabo kubera ko bazi bagenzi babo batahutse bikarangira bakorewe iyicarubozo cyangwa bishwe. 

Umwe mu basigaye i Mahama yagize ati: “Hari abo twumvise ko bakorewe iyicarubozo nyuma yo gutahuka. Njye sinteganya gutaha vuba…”

U Rwanda ni kimwe mu bihugu byo mu Karere k’Ibiyaga Bigari bicumbikiye impunzi z’Abarundi, UNCHR ikaba itangaza ko  umwaka wa 2023 wasoje muri kano Karere habarurwa impunzi zisaga 323,000 z’Abarundi. 

  • NTAWITONDA JEAN CLAUDE
  • Gashyantare 20, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE