Abanyeshuri b’i Nyange ni urugero rw’uko ubutwari budashingira ku myaka

  • NYIRANEZA JUDITH
  • Gashyantare 1, 2024
  • Hashize ibyumweru 3
Image

Umurenge wa Nyange mu Karere ka Ngororero ni ho hizihirijwe ku rwego rw’Akarere Umunsi w’Intwari z’Igihugu, by’umwihariko aho, abanyeshuri b’i Nyange bari mu cyiciro cy’Imena berekanye urugero rw’uko ubutwari bushoboka, buharanirwa kandi butagendera ku myaka.

Intwari u Rwanda rwizihiza kuri iyi nshuro ya 30 ni iziri mu Cyiciro cy’Imanzi kirimo Major General Fred Gisa Rwigema n’Ingabo itazwi. Mu cyiciro cy’Imena harimo Mutara III Rudahigwa, Rwagasana Michel, Uwilingiyimana Agatha, Niyitegeka Félicité n’abanyeshuri b’Inyange.

Icyiciro cy’Ingenzi ho ntawurashyirwamo.

Mu Mirenge yose igize Akarere ka Ngororero kimwe n’ahandi hirya no hino mu gihugu habereye ibirori byo kwizihiza ku nshuro ya 30 Umunsi w’Intwari z’Igihugu ku Nsanganyamatsiko igira iti: “Ubutwari mu Banyarwanda, Agaciro kacu”.

Abanyeshuri b’i Nyange babarirwa mu cyiciro cy’Imena ni abanyeshuri bigaga mu mwaka wa gatanu n’uwa gatandatu bakomeye ku bunyarwanda ubwo bangaga kwitandukanya bakurikije icyitwaga amoko nk’uko babisabwaga n’abacengezi bagabye igitero muri iri shuri mu ijoro ryo ku wa 18 rishyira irya 19 Werurwe1997, bagasubiza ko bose ari Abanyarwanda.

Abanyeshuri 8 biciwe muri icyo gitero, abandi 39 bararokoka. Bose bashyizwe mu ntwari z’u Rwanda mu 2001 mucyiciro cy’Imena.

Muri ibyo birori, Umuyobozi w’Akarere ka Ngororero Nkusi Christophe yagarutse ku ndangagaciro zaranze Intwari z’u Rwanda agira ati “Dufite aho tuvoma indangagaciro nyarwanda kuri Nyakubahwa Perezida wa Repubulika Paul Kagame. Tugomba kuzitoza abakiri bato bakazikurana bakazavamo intwari z’ejo hazaza kuko u Rwanda rukwiye Intwari rukazira ibigwari.

Kwizihiza umunsi w’Intwari z’Igihugu kandi byanaranzwe no gusura inzu y’Amateka y’Ubutwari bw’Abana b’i Nyange, gushyira indabo ku kumva zishyinguyemo imibiri ya zimwe mu Ntwari z’Abanyeshuri b’i Nyange, kugaburira abana indyo yuzuye mu rwego rwo kurwanya imirire mibi n’igwingira, kuremera abaturage amatungo magufi n’amaremare mu rwego rw’agashya “Ngira Nkugire” k’Umurenge wa Nyange.

Nyiragwaneza Solange wo mu Mudugudu wa Bambiro, Akagari ka Gaseke, umwe mu bahawe amatungo yashimiye Ubuyobozi bwiza bwita ku batishoboye, ashimangira ko nabyo ari igikorwa cy’ubutwari.

Yagize ati: “Ibi na byo ni ibikorwa byiza by’ubutwari. Turashima ubuyobozi bwiza bw’Igihugu cyacu buhora buzirikana abafite amikoro make ngo na bo batere imbere.Turabizeza ko natwe tuzaziturira bagenzi babo.”

Hagarutswe kandi ku bikorwa bimaze kugerwaho, abantu bashishikarizwa gukomeza kubisigasira.

Ni ibirori byitabiriwe n’abayobozi bo mu nzego zitandukanye, abaturage b’Umurenge wa Nyange n’abanyeshuri biga mu mashuri yisumbuye muri uyu murenge.

  • NYIRANEZA JUDITH
  • Gashyantare 1, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE