Abanya-Pologne mu Rwanda bamaze gushora miliyoni 72,3 z’Amadolari

  • KAYITARE JEAN PAUL
  • Gashyantare 8, 2024
  • Hashize ibyumweru 2
Image

Minisiteri y’Imari n’Igenamigambi (MINECOFIN) yatangaje ko Ibigo byo muri Pologne bikorera mu Rwanda bimaze kugera ku ishoramari rya miliyoni 72,3 z’Amadolari y’Amerika, ni ukuvuga hafi miliyari 92 z’amafaranga y’u Rwanda.

Byagarutsweho na Munyeshuri Jeanine, Umunyamabanga wa Leta ushinzwe ishoramari rya Leta muri MINECOFIN, ku mugoroba w’ejo ku wa Gatatu tariki 07 Gashyantare 2024 muri Kigali Convention Center.

Ni nama y’ubucuruzi n’ishoramari yahurije hamwe abashoramari b’Abanyarwanda n’Abanya-Pologne.

Umunyamabanga wa Leta ushinzwe ishoramari rya Leta, Munyeshuri, yagaragaje ko u Rwanda na Pologne bifite imbaraga n’umutungo byabyazwa umusaruro mu nyungu zihuriweho.  

Ati “Mu myaka ishize, u Rwanda rwatanze icyizere cyo kuba icyerekezo cy’ishoramari rituruka mu mahanga, rwibanda ku nzego zirimo ubuhinzi, inganda, ikoranabuhanga n’ingufu zisubira.

Ku rundi ruhande, Pologne ifite urusobe rw’ubukungu bufite uburambe mu nzego nyinshi.”  

Urwego rw’Iterambere (RDB) rutangaza ko imishinga Ine yo muri Pologne yanditswe mu Rwanda ifite Agaciro k’amadolari ya Amerika miliyoni 72,3.

Iyi mishanga yatanze imirimo isaga 330 mu nzego z’ubuzima, ingufu, serivisi n’ubwubatsi.

Perezida Paul Kagame yatangaje ko u Rwanda na Pologne bifite byinshi byakungurana, cyane ko u Rwanda rwaremye umwanya wo gukoreramo ishoramari.

Ati “Mu Rwanda twakoze cyane kugira ngo tureme umwanya ishoramari ryakuriramo, rigahangirwamo udushya.

Bitewe n’ibyago igihugu cyacu cyanyuzemo, ntabwo twabonye amahirwe yo kubaka urwego rw’abikorera rukomeye hakiri kare ariko twashoboye kongera bike twari dufite, dushyira imbere ibyo abaturage bacu bakeneye. Ni ryo shoramari ryiza rwakoze”.

Perezida wa Pologne, Andrzej Duda, yatangaje ko abashoramari batekereje kuza gushora imari mu Rwanda kubera ko umutekano warwo n’isoko ryaho bihagaze neza.

Yagize ati “Ntabwo bitunguranye kuba ibigo by’ishoramari byinshi by’Abanya-Pologne biri gutangiriza imishinga hano mu Rwanda kandi nta handi bishaka kuyishyirira mu bikorwa atari hano mu Rwanda.

Iki gihugu kibaha byinshi bakeneye; ituze, umutekano, icungamutungo ryo ku rwego rwo hejuru, uburyo bw’ishoramari buhambaye, ubukungu bw’umutungo kamere n’abantu bakora cyane kandi bagira gahunda”.

Guverinoma y’u Rwanda n’iya Pologne byagiranye amasezerano y’ubufatanye mu nzego zitandukanye zirimo urw’ubuhinzi, umutekano, ubucukuzi bw’amabuye y’agaciro n’ikoranabuhanga.

  • KAYITARE JEAN PAUL
  • Gashyantare 8, 2024
  • Hashize ibyumweru 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE