Abagera ku 13,000 bamaze gusaba kwitabira Rwanda Day i Washington DC

  • ZIGAMA THEONESTE
  • Mutarama 29, 2024
  • Hashize ukwezi 1
Image

Ambasade y’u Rwanda muri Leta Zunze Ubumwe z’Amerika yatangaje ko abantu biyandikishije bashaka kwitabira Rwanda Day bamaze kugera ku 13,000.

Rwanda Day iteganyijwe kuba tariki ya 2 kugeza ku ya 3 Gashyantare muri Leta zunze ubumwe z’Amerika (USA) i Washington DC.

Imyiteguro irarimbanyije mu kwitegura iyo nama yo ku rwego rwo hejuru, izahuza Perezida Paul Kagame n’Abanyarwanda babarirwa mu bihumbi, baba hanze y’igihugu (Diaspora) n’ishuti z’u Rwanda bakaganira.

Ni ibiganiro byibanda ku kureba umusanzu Abanyarwanda baba mu mahanga batanga mu iterambere ry’igihugu cyabo, gusigasira  indangagaciro z’umuco wabo ndetse no kongera ubusabane n’ubushuti ku Banyarwanda bose bari hirya no hino ku Isi.

Rwanda Day igiye kuba ku nshuro ya 11, izaba mu gihe igihugu kirimo kwitegura, ibikorwa bikomeye bigomba kuba muri uyu mwaka wa 2024, birimo Kwibuka ku nshuro ya 30 Jenoside yakorewe Abatutsi mu 1994, Amatora y’Umukuru w’Igihugu n’ay’Abadepite azaba mu kwezi kwa Nyakanga ndetse no kwizihiza imyaka 30 u Rwanda rumaze rwibohoye.

Umuyobozi Wungirije muri Ambasade y’u Rwanda muri USA Arthur Asiimwe yashimangiye ko imyiteguro irimo kugenda neza.

Yagize ati: “Twiteguye neza ibi birori bikomeye, Ambasade n’Abayobozi Bakuru b’Igihugu cyacu barimo gukorana kugira byose bizagende neza”.

Ibirori bya Rwanda Day bizaba mu minsi ibiri, bibera muri Gaylord National Resort and Convention Center, aho izaba kandi ari urubaga ruhuriramo abashoramari mu ngeri zitandukanye babarirwa hagati ya 400 na 500.

Ni ibikorwa bizaba kuri uyu wa Gatanu no ku wa Gatandatu w’iki cyumweru.

Asiimwe yavuze ko iri huriro rizahuriza hamwe Abashoramari b’Abanyarwanda bakorera mu gihugu imbere n’abo muri Diaspora ndetse n’abashoramari b’Abanyamerika baganire uko bazamura ishoramari ryabo.

Ati: “Turateganya kwakira Abanyarwanda n’Inshuti z’u Rwanda”.

Uwo muyobozi yongeyeho ko abantu bakomeye barimo kwiyandikisha ku bwinshi, kugira ngo bazabashe kwitabira iki gikorwa cy’ingirakamaro.

Kuri uyu wa Gatandatu, biteganyijwe ko muri Rwanda Day hazaba ibiganiro nyunguranabitekerezo ku ngingo ijyanye n’umutekano w’u Rwanda ndetse n’uburyo ruhagaze ku rwego mpuzamahanga n’amahirwe y’iterambere ahari agenewe urubyiruko.

Kuri uyu munsi kandi ni na bwo Perezida wa Repubulika azageza ijambo ku bitabiriye Rwanda Day ku nshuro ya 11, rikurikirwa no kuganira n’abayitabiriye.

Ni Rwanda Day ya mbere igiye kuba nyuma y’icyorezo cya COVID 19 cyari cyatumye ibikorwa byayo biba bisubitswe. Kuba kandi nyuma y’iminsi 10, habaye Inama y’Igihugu y’Umushyikirano ya 19, aho Abanyarwanda baganiriye na Perezida Kagame ku iterambere ry’igihugu, kwimakaza ubumwe ndetse n’uruhare rw’urubyiruko mu nzego zose z’imiyoborere.

Rwanda Day iheruka yabaye mu kwezi k’Ukwakira 2019 mu mujyi wa Born mu gihugu cy’u Budage.

Ibirori bibaye mu gihe Minisiteri y’Imari n’igenamamigambi yatangaje ko amafaranga yoherejwe na Diaspora y’u Rwanda yarenga miliyoni  470 z’amadolari y’Amerika yatanzwe  muri 2023 (Arenga miliyari 590 z’amafaranga y’u Rwanda ).

Ni mu gihe aya mafaranga agenda yiyongera kuko nko mu mwaka wa 2010 Diaspora yari yinjije miliyoni 65 z’amadolari.

Mu bindi bikorwa biteganyijwe muri ibyo birori bya Rwanda Day harimo imyidagaduro, imurikabikorwa  ryateguwe na Guverinoma y’u Rwanda ifatanyije n’abikorera.

Rwanda Day kandi ni n’umwanya mwiza wo gufasha abarangije amashuri muri za kaminuza ndetse n’abandi banyamwuga kubona amahirwe y’akazi.

  • ZIGAMA THEONESTE
  • Mutarama 29, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE