Robertinho na Hategekimana Corneille birukanywe muri Simba SC

Ikipe ya Simba SC yo muri Tanzania yatandukanye n’Umunya-Brazil Roberto Oliveira Concalves do Calmo uzwi nka “Robertinho” wari umutoza mukuru wayo n’Umunyarwanda Hategekimana Corneille wari ushinzwe kongerera imbaraga abakinnyi nyuma yo kunyagirwa na Mukeba Yanga Africans SC 5-1 muri shampiyona mu mpera z’icyumweru gishize.

Mu gitondo cyo kuri uyu wa Kabiri tariki 7 Ugushyingo 2023, ni bwo ubuyobozi bw’iyi kipe bwasohoye itangazo rivuga ko ku bwumvikane bw’impande zombi batandukanye n’abatoza bombi.

Riti: “Twumvikanye na Robertinho gusesa amasezerano twari dufitanye. Twumvikanye kandi gusesa amasezerano n’umutoza wongerera imbaraga abakinnyi ari we Corneille Hategekimana. Ubuyobozi burabashimira ku musanzu wabo ndetse burabifuriza amahirwe masa mu nshingano nshya bazajyamo.”

Mu gihe cy’inzibacyuho, ikipe izaba iri gutozwa na Daniel Cadena yungirijwe na Seleman Matola. Ubuyobozi kandi bwatangiye gahunda yo gushaka abatoza bashya mu gikorwa kizarangira vuba bidatinze.

Nyuma yo gutsindwa ibitego 5-1 n’umukeba Yanga Africans SC abafana ndetse n’abayobozi bagaragaje ko batanejejwe n’umusaruro w’umutoza Robertinho.

Roberto Oliveira Concalves do Calmo “Robertinho wari umutoza mukuru wa Simba SC yatangajwe nk’umutoza wayo tariki 3 Mutarama 2023 asimbuye Umwongereza Steven Polack wari umaze gusezera ku kazi.

Roberto Oliveira Concalves do Calmo “Robertinho’’ yatoje amakipe atandukanye yo mu karere arimo Rayon sports yo mu Rwanda na Vipers SC yo muri Uganda.

Roberto Oliveira Concalves do Calmo “Robertinho’’ asize Simba SC ku mwanya wa gatatu n’amanota18 mu mikino irindwi.

SHEMA IVAN