Niyonsaba David na Tuyishimire Claudine begukanye ‘Umusambi Race 2025’ (Amafoto)

Niyonsaba David wa Shaggy Cycling Team mu Bagabo na Tuyishimire Claudine wa Bugesera Cycling Team mu bagore begukanye isiganwa ‘Umusambi Race 2025’, mu rwego rwo kubungabunga inyoni y’umusambi.

Isiganwa ryabaye kuri uyu wa Gatandatu, tariki ya 23 Kanama 2025 ryateguwe n’Ishyirahamwe ry’Umukino w’Amagare mu Rwanda (FERWACY) ndetse n’Umuryango Nyarwanda ushinzwe kubungabunga Ibinyabuzima byo mu Gasozi (RWCA).

Abaryitabiriye mu byiciro bitandukanye, banyuze mu mihanda izengurutse igishanga cy’Urugezi kiri hagati y’Akarere ka Gicumbi n’aka Burera, kibarizwamo ¼ cy’imisambi yose yo mu Rwanda.

Iri siganwa ryakinwe mu byiciro bitatu birimo ababigize umwuga; abagore n’abagabo bakoze intera ingana y’ibilometero 90 bahagurukiye muri Santere y’i Banda, abatarabigize umwuga (abakinnyi badafite impushya za FERWACY) bakoze intera ingana n’ibilometero 46 n’abakoresha amagare asanzwe azwi nka ‘matabaro’ bakoze intera ingana n’ibilometero 37.

Mu bagabo babigize umwuga hatsinze, Niyonsaba David wegukanye umwanya wa mbere akoresheje amasaha atatu iminota ine n’amasegonda 25, akurikirwa na Iradukunda Valens na Habimana Felix yasize iminota 26.

Mu bagore, hatsinze Tuyishimire Claudine.

Mu bagabo n’abagore batabigize umwuga, bakoze ibilometero 45, hatsinze Hakizimana Felcien na Ishimwe Diane.

Mu cyiciro cy’ingimbi, Nkurikiyinka Jackson, Byusa Pacifique na Niyongira Vianney begukanye imyanya itatu ya mbere.

Mu bangavu hatsinze Nyiribambe  Aquiline akurikirwa na Uwizeyimana Ancille na Ahishakiye Claudine.

Mu cyiciro cy’abakinishije amagare asanzwe ku ntera y’ibilometero 45, hatsinze Mufiteyesu Emmanuel wegukanye iri siganwa ku nshuro ya gatatu yikurikiranya, mu gihe mu bagore hatsinze Cyuzuzo Henriette.

Iri siganwa ry’uyu mwaka ryahujwe n’isabukuru y’imyaka 10 ishize RWCA itangiye kubungabunga imisambi, ikaba yaravuye munsi ya 300 ikagera ku 1293 mu 2024.