70% by’abakoresha MoMo mu Rwanda bayifashisha mu kwishyura

  • ZIGAMA THEONESTE
  • Gashyantare 8, 2024
  • Hashize amezi 3
Image

Abantu 70% by’abakoresha konti za Mobile Money (MoMo) zisaga miliyoni 16.5 zibarurwa mu Rwanda bavugwaho kuba bishyura ibicuruzwa na serivisi batarinze gutwara amafaranga mu ntoki.

Iyo mibare ishimangirwa na Minisiteri y’Ikoranabuhanga na Inovasiyo (MINICT) nk’umusaruro w’ubukangurambaga bwo gushikariza abaturage kwishyurana hakoreshejwe ikoranabunga bwiswe (Twagiye Kashiresi) bwatangijwe na Guverinoma y’u Rwanda muri Gicurasi 2022.

Iyo Minisiteti yashimangiye ko abahererekanya amafaranga bakoresheje telefoni bageze kuri 70% bavuye kuri 49% mu myaka itatu ishize.

Byatangajwe kuri uyu wa Kabiri tariki ya 8 Gashyantare 2024, mu biganiro nyunguranabitekero byahuje Minisiteri y’Ikoranabuhanga no Inovasiyo n’ibigo by’imari baganira ku kunoza uburyo bwo kwishyurana hakoreshejwe ikoranabuhanga mu bigo by’imari no mu zindi nzego.

Minisitiri wa MINICT Ingabire Paula, yagaragaje ko n’ubwo hakirimo imbogamizi mu kwishyurana hakoreshwe ikoranabuhanga, abantu bagenda babyitabira ku buryo bushimishije.

Yagize ati: “Urebye mu myaka itatu ishize n’uyu munsi uko bihagaze,mfashe nk’imibare ya Mobile Money, twavuye kuri 49% ubu tugerengeje ijanisha rya 70%.

Bivuze ko hari abantu benshi barushaho kwifashisha uburyo bwo gukoresha telefoni n’ikoranabunga muri uru rugendo rwa Kashiresi,ari na yo mpamvu twatangiye ubukangurambaga.”

Minisitiri Ingabire yagavuze ko mu bukanguramba bakora ari ho babona imbogamizi zihari bakazikemura aho avuga ko ahakiri ikibazo cy’ibikorwaremezo mu itumanaho bigenda byongerwa.

Ati: “Tugenda twongera iminara mu gihugu kugira ngo tuzibe cya cyuho  cya za serivisi z’itumanaho zitahagera.”

Mu mbogamizi MINICT ikagaragaza zikibangamiye gahunda ya yo guhererekanya amafaranga hata harimo kuba ikiguzi kuri serivisi kikiri hejura kuri bamwe na bamwe, ubumenyi buke mu ikoranabuhanga n’ibindi.

Mu kwimakaza iyi gahunda yo guhererekanya amafaranga mu buryo bw’ikoranabuhanga, MINICT yatangaje ko harimo gutegurwa amahugurwa ku bakoresha izi servisi, ndetse no gushaka uko ikiguzi cy’abazifashisha cyagabanyuka.

Minisitiri Paula yavuze ko ibigo by’imari birimo za Banki n’ibindi bigo by’itumanaho bigomba kunoza imikoranire mu by’ikoranabuhanga bagahanahana amakuru ahagije, mu rwego rwo kugabanyiriza ikiguzi cy’ukenera ikoranabuhanga mu kwishyura serivisi muri ibyo bigo.

Umuyobozi Mukuru wungirije wa Banki Nkuru y’u Rwanda (BNR) Soraya Hakuziyaremye, yagaragaje ko ubukangurambaga bwa Twagiye Kashiresi bwabagaragarije imbogamizi zitandukanye.

Ati: “Harimo kuba ikiguzi cyo kwishyurana kikiri hajeru, kuba abantu badasobanukirwa n’ikoranabuhanga aho usanga hari n’abacuruzi badakunda gukoresha ‘Code’ n’iyo bazifite”.

Yakomeje agira ati: “Hari amabanki n’abakoresha servisi za Mobile Money bavuga ko serivisi bakora ziba zihenze, turaganira kugira ngo turebe ukuntu byagabanyuka no gukangirira abantu kumva ko kwishyura kuri Kode za Mobile Money ari ubuntu iyo wishyuye ari munsi y’ibihumbi bine (4000) bitewe na kompanyi.”

Mu bukangurambaga bwiswe ‘Twagiye Kashiresi’ bwatangiye muri Gicurasi 2022, bwageze ku baturage ibihumbi 24 mu Turere 12 tw’u Rwanda.

BRN irimo gutegura kwagura ubu bukangurambaga bwo kwimakagaza gukoresha ikoranabuhanga mu kwishyurana bugakorwa mu nzego zitandukanye zaba iz’ubuhinzi, ubucuruzi buciriritse, uburezi ndetse n’ubuzima kandi bukagera  no mu tundi Turere dusigaye tw’igihugu.

  • ZIGAMA THEONESTE
  • Gashyantare 8, 2024
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE