UEFA Champions League: PSG na FC Barcelona zageze muri ½

Ikipe ya Paris Saint-Germain yatsinzwe na Aston Villla ibitego 3-2, FC Barcelona itsindwa na Borussia Dortmund ibitego 3-1, zombi zikatisha itike ya ½ muri UEFA Champions League ya 2024/25.

Ku mugoroba wo ku wa Kabiri tariki ya 15 Mata 2025, guhera Saa Tatu  z’ijoro, ni bwo hakomeje gukinwa imikino yo kwishyura ya 1/4 cy’iri rushanwa rihuza amakipe yabaye aya mbere iwayo ku Mugabane w’u Burayi.

Ku kibuga Villa Park mu Bwongereza Aston Villa yari yakiriye Paris Saint-Germain yayitsinze umukino ubanza ibitego 3-1. 

Iyi kipe yo mu Bufaransa yatangiranye imbaraga nyinshi ndetse ku munota wa 11’ ifungura amazamu ku igitego cyatsinzwe na Achraf Hakimi ku mupira wagaruwe nabi n’Umunyezamu Emiliano Martinez.

Paris Saint Germain yabonye igitego cya kabiri ku munota wa 28 gitsinzwe na Nuno Mendes ku mupira wahawe na Ousmane Demble. 

Aston Villa yavuye inyuma ijya gushaka uko yishyura ndetse ibona igitego ku munota wa 34 cyinjijwe na Youri Tielemans, ari na cyo cya nyuma mbere y’uko bajya mu karuhuko.

Iki gitego cyatumye iyi kipe igarukana imbaraga mu gice cya kabiri, ndetse yigaranzura PSG iyobora umukino. 

Igitego cya kabiri yagitsindiwe na John McGinn ku munota wa 55, ikindi gitsindwa na Ezri Konsa ku mupira mwiza yaherewe mu rubuga rw’amahina Marcus Rashford ku munota wa 57.

Umukino warangiye nta kindi kibonetse, Paris Saint-Germain itsindwa na Aston Villa ibitego 3-2, iyisezerera ku giteranyo cy’ibitego 5-4 mu mikino yombi. 

Iyi kipe igomba gutegereza izava hagati ya Arsenal na Real Madrid na byo bizahura mu ijoro ryo ku wa Gatatu.

Undi mukino wabereye kuri Signal Iduna Park aho Borussia Dortmund yari yakiriye FC Barcelona yo muri Espagne yari yanyagiye ibitego 4-0 mu mukino ubanza.

Uyu mukino warangiye Borussia Dortmund itsinze FC Barcelona ibitego 3-1, ariko na yo isezererwa ku giteranyo cy’ibitego 5-3 mu mikino yombi.

Ibitego bitatu bya Borussia Dortmund byatsinzwe na Rutahizamu Serhou Guirassy wujuje ibitego 11 muri iri rushanwa.

FC Barcelona yaherukaga muri ½ cya UEFA Champions League mu mwaka w’imikino wa 2018/2019. 

Iyi kipe yo muri Espagne izahura n’izava hagati ya Bayern Munich yo mu Budage na Inter Milan yo muri Espagne kuri uyu wa Gatatu, tariki ya 16 Mata 2025.