UEFA Europa League: Manchester United na Tottenham Spurs zageze kuri Finale

Manchester United (ManU) yanyagiye Athletic Club ibitego 4-1 mu mukino wo kwishyura iyisezerera ku giteranyo cy’ibitego 7-1,  naho Tottenham Hotspur itsinda Bodoe/Glimt ibitego 2-0, iyisezerera ku giteranyo cy’ibitego 5-1. Izi kipe zombi zigera ku mukino wa nyuma wa UEFA Europa League.

Iyi mikino ihuza amakipe agwa mu ntege ibihugu itegurwa n’Impuzamashyirahamwe ya Ruhago i Burayi, yabaye mu ijoro ryo ku wa Kane, tariki ya 9 Gicurasi 2025. 

Athletic Club yatangiye umukino isatira cyane izamu rya Manchester United ishaka igitego cyo mu minota ya mbere cyari kuyigarura mu mukino. 

Ku munota wa 31, iyi kipe yo muri Espagne yafunguye azamu ku mupira watewe nabi na Harry Maguire, usanga Mikel Jauregizar atera ishoti inyuma y’urubuga rw’amahina ukaruhukira mu rushundura.

Igice cya mbere cyarangiye Athletic Club itsinze Manchester United igitego 1-0.

Mu igice cya kabiri, Manchester United yagarukanye imbaga itangira gusatira izamu rya Athletic Club ishaka igitego cyo kwishyura.

Ku munota wa 63, umutoza wa Manchester United, Ruben Amorim, yakoze impinduka eshatu Amad Diallo asimbura Alejandro Garnacho, Luke Shaw asimbura Noussair Mazraoui ndetse na Mason Mount asimbura Manuel Ugarte.

Bidatinze Izi mpinduka zatanze umusaruro kuko munota wa 72’ 

Mason Mount yishyuye igitego ku mupira yahawe na Lenny Yoro ari mu rubuga rw’amahina.

Nyuma y’iminota umunani gusa, Bruno Fernandes yateye Coup-Frank ayishyira ku mutwe wa Casemiro ahita ashyiramo igitego cya kabiri, mugenzi we Rasmus Hojlund ashyiramo icya gatatu ku munota wa 85. 

Ku munota wa 90+1, Mason Mount yashyizemo igitego cyiza cya kane bituma umukino urangira  Manchester United inyagiye Athletic Club Bilbao ibitego 4-1 mu mukino wo kwishyura igera ku mukino wa nyuma ku giteranyo cy’ibitego 7-1.

Manchester United yaherukaga ku mukino wa nyuma w’iri rushanwa mu mwaka w’imikino wa 2020/21 icyo gihe yatsinzwe na Villarreal Penaliti 11 kuri 10 nyuma y’aho bari banganyije igitego 1-1 mu minota 120. 

Undi mukino wabaye, Tottenham yatsinze Bodoe/Glimt ibitego 2-0 byatsinzwe na Dominic Solanke na Pedro Porro, iyisezerera ku giteranyo cy’ibitego 5-1 mu mikino yombi. 

Umukino wa nyuma uteganyijwe ku wa 21 Gicurasi 2025, kuri Sitade San Mames yo mu Mujyi wa Bilbao muri Espagne.