Rayon Sports yatsinze Police FC yisubiza umwanya wa mbere

Rayon Sports y’abakinnyi 10 yatsinze Police FC igitego 1-0 mu mukino w’umunsi wa 27 wa Shampiyona, yisubiza umwanya wa mbere ku rutonde rw’agateganyo rwa shampiyona.

Uyu mukino wabaye ku mugoroba wo kuri uyu iki Cyumweru tariki ya 11 Gicurasi 2025, Kuri Kigali Pele Stadium.

Rayon Sports yagiye gukina uyu mukino isabwa gutsinda igasubira ku mwanya wa mbere, mu gihe Police FC yifuzaga gushimangira umwanya wa kane.

Umukino watangiye ugenda gahoro amakipe yombi akinira cyane mu kibuga hagati.

Ku munota wa 24, Mugisha Didier wa Police FC yacenze Hakim Bugingo, Niyonzima Olivier ‘Seif’ aratabara, ashyira umupira muri koruneri itagize icyo itanga.

Nyuma y’iminota itatu, Rayon Sports yasubije ku mupira Bassane yinjiranye umupira anyuze kuri Msanga na Christian, awuteye mu izamu ukurwaho na Chimeze ujya muri koruneri.

Ku munota wa 41, Police FC yabonye uburyo bwiza bwo gufungura amazamu ku mupira Ani Elijah yahaye asubije Mugisha Didier ateye ishoti rikomeye rifata urushundura rutoya rwo hasi.

Igice cya mbere cyarangiye amakipe anganyije ubusa ku busa.

Mu igice cya kabiri, Rayon Sports yatangiranye impinduka Ishimwe Fiston asimbura Biramahire Abeddy.

Ku munota wa 51, Aziz Bassane wa Rayon Sports yasabye Penaliti nyuma yo kugwa mu rubuga rw’amahina akuweho umupira na Ishimwe Christian, umusifuzi Nsabimana Celestin avuga ko nta kosa ryabaye.

Rayon Sports yakinaga neza muri iyo minota yahushije uburyo bw’igitego ku mupira Muhire Kevin yatwaye Mandela, awuhinduye usanga Rukundo Abdul ateye ishoti rifashe inshundura ntoya.

Ku munota wa 66, Rayon Sports yafunguye amazamu ku gitego cyatsinzwe na Ishimwe Fiston ku mupira yahawe Nshimiyimana Emmanuel “Kabage” uwutsindisha umutwe.

Ku munota wa 78, Rukundo Abdul wa Rayon Sports yahawe ikarita ya kabiri y’umuhondo nyuma yo gukubita Ndizeye Samuel umugeri ku mutwe.

Iminota 10 ya nyuma Police FC yasatiriye izamu rya Rayon Sports y’abakinnyi 10 ishaka igitego kwishyura.

Ku rundi ruhande, Rayon Sports yari yasubiye inyuma kugarira.

Mbere y’uko umukino urangira Umusifuzi wa Kane yongeyeho iminota ine y’inyongera.

Police FC yakomeje gusatira ndetse ku munota 90+2′ Richard Kilongozi yibwiye ko yishyuriye ikipe ye, umupira ukurwamo na Omar Gning wageze mu izamu, abasifuzi barareka umukino urakomeza.

Umukino warangiye Rayon Sports itsinze Police FC igitego 1-0, yisubiza umwanya wa mbere ku rutonde rw’agateganyo rwa shampiyona n’amanota 59 irusha APR FC ya kabiri inota rimwe.

Police FC yagumye ku mwanya wa Kane n’amanota 40.

Undi mukino wabaye kuri iki Cyumweru ni uwo Muhazi United yabonye amanota atatu y’ingenzi mu rugamba rwo kuguma mu Cyiciro cya Mbere, itsinda Rutsiro FC ibitego 2-1 kuri Stade Umuganda mu Karere ka Rubavu.