Rayon Sports yatsinze Muhazi United, yisubiza umwanya wa mbere (Amafoto)

Rayon Sports yatsinze Muhazi United ibitego 2-0 mu mukino w’umunsi wa 24 wa Shampiyona, yongera kwisubiza umwanya wa mbere ku rutonde rw’agateganyo rwa shampiyona.

Uyu mukino wabaye kuri uyu wa Gatandatu tariki ya 19 Mata 2025, Kuri Stade ya Karere Ka Ngoma.

Ni umukino amakipe yombi yagiye gukina akeneye gutsinda, kuko Rayon Sports yifuzaga gukomeza guhanganira Igikombe cya Shampiyona, Muhazi United FC na yo yari ikeneye kongera amanota ayiha umutekano wo kuguma mu cyiciro cya mbere.

Mbere y’uko umukino utangira, hafashwe umunota wo kwibuka abishwe muri Jenoside yakorewe Abatutsi mu 1994.

Umukino watangiye utuje amakipe yombi akinira umupira hagati mu kibuga nta buryo bufatika buboneka.

Ku munota wa 15, Rayon Sports yabonye uburyo bwa mbere ku mupira Elanga Kanga yazamukanye, uwuhereza Iraguha Hadji ashatse kuwushyira mu izamu, ushyirwa muri koruneri na myugariro wa Muhazi United witambitse.

Iyo Koruneri yatewe Muhire Kevin umupira usanga Rukundo uwukozeho, uca ku ruhande rw’izamu.

Ku munota wa 22, Rayon Sports yahushije uburyo bwo gufungura amazamu ku mupira Biramahire Abeddy yananiwe kubyaza umusaruro uburyo umupira watakajwe na Muhazi United, awuteye ufatwa n’umunyezamu Amani abanje kwiyongeza.

Kugeza ku munota wa 30, Muhazi United yagowe no kwibona mu mukino akazi gakomeye gakorwa n’Umunyezamu Twagirayezu Amani wakugaragamo imipira myinshi.

Ku munota wa 34, Rayon sports yarushaga Muhazi United yabonye uburyo bw’igitego ku ishoti rikomeye ryatewe na Rukundo Abdul Rahman ari muri metero nka 25, umupira ushyirwa muri koruneri n’Umunyezamu wa Muhazi United, Twagirayezu Amani.

Igice cya mbere cyarangiye amakipe yombi anganya 0-0.

Mu igice cya kabiri, Rayon Sports yakomeje gusatira ishaka igitego harimo uburyo bwabonetse ku munota wa 49 ku mupira wahinduwe mu rubuga rw’amahina usanga na Elanga-Kanga ateye ishoti rikomeye umupira  ujya ku ruhande.

Ku munota wa 54, Rayon Sports yakoze impinduka Aziz Bassane na Ishimwe Fiston basimbura Rukundo Abdul Rahman na Iraguha Hadji.

Ku munota wa 56, Rayon Sports yahushije uburyo bwabazwe ku mupira watewe na Youssou Diagne n’umutwe, ukurwamo na Twagirayezu Amani, nyuma ya koruneri yari itewe na Muhire Kevin.

Ku munota wa 64, Umutoza Rwaka Claude yakoze impinduka ya kabiri

Elanga Kanga asimburwa na Adama Bagayogo.

Izi mpinduka zahise zitanga umusaruro nyuma y’umunota umwe Adama Bagayogo yafunguye amazamu atsindishije umutwe ku mupira uteretse watewe Omborenga Fitina, ukurwamo n’Umunyezamu Amani usanga uyu Munya-Mali uwushyira mu izamu.

Rayon Sports yarushaga Muhazi United yatsinze igitego cya kabiri ku munota wa 68, gitsinzwe na Biramahire Abeddy ku ishoti yatereye kure, umunyezamu Amani wari imbere abona umupira ujya mu izamu.

Ku munota wa 78, Rayon Sports yahushije uburyo bwabazwe bw’igitego cya gatatu ku mupira Biramahire Abeddy yacomekewe, yinjira mu rubuga rw’amahina ateye mu izamu, Twagirayezu Amani ashyira umupira muri koruneri itagize icyo itanga.

Umukino warangiye Rayon Sports yatsinze Muhazi United ibitego 2-0, yongera kwisubiza umwanya wa mbere ku rutonde rw’agateganyo rwa shampiyona n’amanota 50 irusha APR FC ya kabiri amanota abiri mbere y’uko ikina na Etincelles FC ku Cyumweru.

Muhazi United yafashe umwanya wa 13 n’amanota 26.

Indi mikino yabaye uyu munsi, Kiyovu Sports yavuye mu murongo utukura nyuma yo gutsinda Mukura VS igitego 1-0, AS Kigali yatsinze Amagaju FC ibitego 2-1, Musanze FC yanganyije na Vision FC 0-0 mu gihe Marines FC yatsinze Gorilla FC igitego 2-1.

Umunsi wa 24 wa Shampiyona uzasozwa ku Cyumweru tariki ya 20 Mata 2025

APR FC izakira Etincelles FC

Rutsiro FC izakira Bugesera FC.