Rally:  Yasin, Karan na Jas Mangat ni bo bagiye guhanganira amanota muri RMGR 2023

Kuva kuri uyu wa Gatanu taliki 22 kugeza 24 Nzeri 2023 mu Rwanda hagiye kubera irushanwa mpuzamahanga ryo gusiganwa mu modoka “ Rwanda Mountain Gorilla Rally 2023”.

Iri siganwa risanzwe riri ku ngengabihe  ya shampiyona y’Afurika “African Rally Championship” rigiye kuba ku nshuro ya 23,  ryitabiriwe n’imodoka 29 harimo 6 zihanganiye amanota ku rwego rw’Afurika naho izindi akaba ari amanota ya shampiyona y’igihugu.

Uko isiganwa rizagenda

Ku munsi wa mbere wa  “Rwanda Mountain Gorilla Rally 2023”, ku wa Gatanu tariki ya 22 Nzeri 2023, haraba  “Super Stage” guhera  saa cyenda (16h00) kuri Kigali Convention Centre.

Ku wa Gatandatu, tariki ya 23 Nzeri 2023, “Mountain Gorilla Rally 2022”  izakomereza mu Karere ka  Bugesera, i Gako, Gasenyi, Nemba na Ruhuha naho ku Cyumweru, tariki ya 24 Nzeri 2023 basiganwe Kamabuye na Gako aho bazasoza muri rusange bakoze intera ya kilometero 348,18.

Uyu mwaka wa 2023, iri rushanwa ryitabiriwe n’abakinnyi baturuka mu bihugu  5 ari byo  Kenya, Uganda, Tanzania, u Burundi n’u Rwanda.

Ubwo iri rushanwa riheruka umwaka ushize wa 2022 ryegukanywe na Karan Patel ukomoka muri Kenya  n’uyu mwaka akaba yaritabiriye aho anahabwa amahirwe yo kuryisubiza.

Abakinnyi batatu bahanganiye amanota ku rwego rw’Afurika

Iri rushanwa  “ Rwanda Mountain Gorilla Rally 2023” ni irya 5 rigiye gukinwa  ku ngengabihe  ya shampiyona y’Afurika nyuma y’irushanwa ryabereye muri Cote d’Ivoire, Kenya, Uganda n’u Burundi.

Kugeza ubu ku rutonde abakinnyi 3 ni bo bahanganiye  bikomeye amanota agomba kubafasha kwegukana shampiyona y’Afurika  izaba isigaje amasiganwa abiri gusa nyuma y’iri  ari yo isiganwa ryo muri Zambia no muri  Tanzania.

Aba bakinnyi ni Yasin Nasser ukomoka muri Uganda kuri ubu uyoboye urutonde rw’Afurika n’amanota 78 akaba yaregukanye isiganwa ryo muri Uganda aba uwa kabiri muri Kenya  n’i Burundi  naho isiganwa ryo muri Cote d’Ivoire ntaryo yakinnye.

Ku mwanya wa kabiri hari Jas Mangat nawe wo muri Uganda ufite amanota 63 aho yabaye uwa gatatu muri Kenya, Uganda n’i Burundi cyo kimwe na Yasin ntabwo yakinnye irushanwa ryo muri Cote d’Ivoire.

Ku mwanya wa 3 hari Karan Patel (Kenya) ufite amanota 60 aho yegukanye amasiganwa abiri, iryo muri Kenya n’i Burundi naho iryo muri Cote d’Ivoire no muri Uganda ntabwo yakinnye.

Abandi bakinnyi bari hafi ni Innocent Bwamiki (Uganda) ufite amanota 38 na Rio Smith (Kenya) ufite amanota 24.

Muri aba batatu ba mbere uzabasha kwegukana “Rwanda Mountain Gorilla Rally 2023” azaba yiyongereye amahirwe yo kwegukana shampiyona y’Afurika 2023.

Umwaka ushize wa 2022, Gomes Leroy ukomoka muri Zambia ni we wegukanye shampiyona y’Afurika n’amanota 150 akaba yarahigitse Karan Patel kuko yasoreje ku mwanya wa kabiri n’amanota 135.

Muri uyu mwaka, Gomes Leroy akaba atari ku rutonde rw’abahatanira amanota yo kwegukana shampiyona y’Afurika.

NYIRANEZA JUDITH